ଭୁବନେଶ୍ୱର,୪।୯(ବ୍ୟୁରୋ) : ଦୌଡ଼ରାଣୀ ଦୂତୀ ଚାନ୍ଦଙ୍କ ନାମରେ ଅପମାନଜନକ ଖବର ପ୍ରସାରଣ କରିବା ସହ ଧମକ ଦେଇ ବଟି ମାଗିବା ଅଭିଯୋଗରେ ଭୁବନେଶ୍ୱର ମହିଳା ଥାନା ପୋଲିସ ଫୋକସ୍ ପ୍ଲସ୍ ୱେବ୍ ପୋର୍ଟାଲର ସମ୍ପାଦକ ସୁଧାଂଶୁ ଶେଖର ରାଉତଙ୍କୁ ଅଟକ ରଖିଛି। ଶୁକ୍ରବାର ସକାଳେ ଝାରପଡାସ୍ଥିତ ୱେବ୍ ପୋର୍ଟାଲ କାର୍ଯ୍ୟାଳୟରୁ ତାଙ୍କୁ ପୋଲିସ ଉଠାଇ ନେଇଥିଲା। ଏଥିସହ ସେଠାରୁ କମ୍ପ୍ୟୁଟର ଓ ଅନ୍ୟାନ୍ୟ ସାମଗ୍ରୀକୁ ପୋଲିସ ଜବତ କରିଥିଲା। ବିଳମ୍ବିତ ରାତି ପର୍ଯ୍ୟନ୍ତ ତାଙ୍କୁ ପଚରାଉଚରା ଚାଲିଥିବା ଥାନାଧିକାରୀ ବନିତା ମହାରଣା ସୂଚନା ଦେଇଛନ୍ତି। ଥାନାଧିକାରୀ କହିଛନ୍ତି, ବୁଧବାର ଦୂତୀଙ୍କ ଅଭିଯୋଗକ୍ରମେ ୱେବ୍ ଚ୍ୟାନେଲର ସମ୍ପାଦକ ସୁଧାଂଶୁଙ୍କ ସମେତ ରିପୋର୍ଟର ସ୍ମୃତିରଞ୍ଜନ ବେହେରା ଓ ସୂଚନା ଅଧିକାର କର୍ମୀ ପ୍ରଦୀପ ପ୍ରଧାନଙ୍କ ନାମରେ ଆଇପିସି ଦଫା ୨୦୨(ଏ), ୩୫୪(ଏ), ୩୮୫, ୫୦୬, ୫୦୯,୧୨୦(ବି)ରେ ମାମଲା (ନଂ.୧୦୬/୨୧) ରୁଜୁ ହୋଇଛି। ତଦନ୍ତରେ ପ୍ରମାଣ ମିଳିବାରୁ ପୋଲିସ ତାଙ୍କୁ ଥାନାରେ ଅଟକ ରଖି ଅଧିକ ତଥ୍ୟ ଯୋଗାଡ଼ କରୁଛି। ଅନ୍ୟତମ ଅଭିଯୁକ୍ତ ରିପୋର୍ଟର ସ୍ମୃତିରଞ୍ଜନ ଓ ସୂଚନା ଅଧିକାର କର୍ମୀ ପ୍ରଦୀପଙ୍କ ବିରୋଧରେ ତଦନ୍ତ ଜାରି ରହିଥିବା ସେ କହିଛନ୍ତି।
ଦୂତୀ ବୁଧବାର ଏକ ଖବରଦାତା ସମ୍ମିଳନୀ କରି କହିଥିଲେ, ୱେବ୍ ଚ୍ୟାନେଲ ରିପୋର୍ଟର ମୋ ଗାଁକୁ ଯାଇ ବିଭିନ୍ନ ପ୍ରଲୋଭନ ଦେଖାଇ ମୋ ବିରୋଧରେ ମା’ ବାପାଙ୍କ ନିକଟରୁ କିଛି ତଥ୍ୟ ସଂଗ୍ରହ କରିଥିଲେ। ମୁଁ ଅଲିମ୍ପିକ୍ସ ପାଇଁ ଟୋକିଓରେ ଥିବା ସମୟରେ ସମ୍ପାଦକ ମୋ ନିକଟକୁ ଉକ୍ତ ଭିଡିଓ ପଠାଇ ଦେଖିବାକୁ କହିଥିଲେ। ଯେହେତୁ ମୋ ମା’ ଓ ବାପା ମୋ ବିରୋଧରେ କିଛି କଥା କହିଥିଲେ, ତାହାକୁ ଚ୍ୟାନେଲରେ ପ୍ରସାରଣ କରିବାକୁ ଧମକ ଦେଇ ମୋ ନିକଟରୁ ଅର୍ଥ ଦାବି କରିଥିଲେ। ମୁଁ ରାଜି ନ ହେବାରୁ ଗୋଟିଏ ପରେ ଗୋଟିଏ ଭିଡିଓ ପଠାଇ ମୋତେ ମାନସିକ ସ୍ତରରେ ଚାପଗ୍ରସ୍ତ କରିବା ସହ ମୋ ଚରିତ୍ର ସଂହାର କରି ସାମାଜିକ ଗଣମାଧ୍ୟମରେ ବଦନାମ କରିଥିଲେ। ସେହିପରି ସୂଚନା ଅଧିକାର କର୍ମୀ ପ୍ରଦୀପ ପ୍ରଧାନ ସାମାଜିକ ଗଣମାଧ୍ୟମରେ ବିଭିନ୍ନ ନକାରାତ୍ମକ ଟିପ୍ପଣୀ ଦେଇଥିଲେ ବୋଲି ଦୂତୀ କହିଥିଲେ। ଏହାଛଡା ମାନସମ୍ମାନରେ ହାନି ଘଟିବାରୁ ଉପରୋକ୍ତ ୩ ଜଣଙ୍କ ବିରୋଧରେ ୫ କୋଟି ଟଙ୍କାର ମାନହାନି ମକଦ୍ଦମା ମଧ୍ୟ ରୁଜୁ କରିଛନ୍ତି ବୋଲି ସେ କହିଥିଲେ। ଯଦି ଆକ୍ରୋଶମୂଳକ ଭାବେ ମୋ ବ୍ୟକ୍ତିଗତ ଜୀବନକୁ ନେଇ ନକାରାତ୍ମକ ଖବର ପରିବେଷଣ କରାଯାଏ ତେବେ ବାଧ୍ୟ ହୋଇ ସେ ଖେଳ ଛାଡିବେ ବୋଲି ଦୂତୀ ଖବରଦାତା ସମ୍ମିଳନୀରେ କହିଥିଲେ।
