ନୂଆଦିଲ୍ଲୀ,୫।୭: ଭାରତୀୟ କ୍ରିକେଟର ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତ ହୋଇଛନ୍ତି ଅଜିତ ଅଗରକର। ପୁରୁଷ ଚୟନ କମିଟିର ଅଧ୍ୟକ୍ଷ ଭାବେ ଅଗରକରଙ୍କୁ ନିଯୁକ୍ତି ଦିଆଯାଇଛି ବୋଲି କ୍ରିକେଟ ବୋର୍ଡ ଅଫ ଇଣ୍ଡିଆ (ବିସିସିଆଇ) ସୂଚନା ଦିଆଯାଇଛି।
ଅଜିତ ଅଗରକର ୪ ଡିସେମ୍ବର ୧୯୭୭ରେ ମୁମ୍ବାଇରେ ଜନ୍ମଗ୍ରହଣ କରିଥିଲେ। ସେ ନିଜ କ୍ୟାରିୟରରେ ଦକ୍ଷତା ଆଧାରରେ ସମସ୍ତଙ୍କୁ ପ୍ରଭାବିତ କରିଥିଲେ। ତାଙ୍କ ଉତ୍ଥାନ-ପତନରେ ପରିପୂର୍ଣ୍ଣ ଥିଲା। ସେ କେବଳ ୧୦ ବର୍ଷର ଅନ୍ତର୍ଜାତୀୟ କ୍ୟାରିୟରରେ ଅନେକ ରେକର୍ଡ ସ୍ଥାପନ କରିଥିଲେ, ଯାହା ଆଜି ବି ଅତୁଟ ରହିଛି।
୧୪ ଡିସେମ୍ବର ୨୦୦୦ରେ ରାଜକୋଟରେ ଜିମ୍ବାୱେ ବିପକ୍ଷରେ ମାତ୍ର ୨୧ଟି ବଲରେ ଅର୍ଦ୍ଧଶତକ ସ୍କୋର କରିଥିଲେ। ଏହି ମ୍ୟାଚରେ ଅଗରକର ମାତ୍ର ୨୫ ବଲରେ ୬୭ ରନର ଇନିଂସ ଖେଳିଥିଲେ। ଆଜି ପର୍ଯ୍ୟନ୍ତ କୌଣସି ଭାରତୀୟ ବ୍ୟାଟ୍ସମ୍ୟାନ ଅଗରକର ଏହି ରେକର୍ଡ ଅତିକ୍ରମ କରିବାରେ ସକ୍ଷମ ହୋଇ ନାହାଁନ୍ତି। ଏହାପୂର୍ବରୁ ଏହି ରେକର୍ଡ କପିଲ ଦେବଙ୍କ ନାମରେ ଥିଲା। ସେ ୧୯୮୩ରେ ଗୁୟାନାରେ ୱେଷ୍ଟଇଣ୍ଡିଜ ବିପକ୍ଷରେ ୩୮ ବଲରେ ୭୨ ରନ ସଂଗ୍ରହ କରିଥିଲେ। କପିଲ ଏହି ମ୍ୟାଚରେ ୨୨ଟି ବଲରେ ଅର୍ଦ୍ଧଶତକ ରନ କରିଥିଲେ। ୧୭ ବର୍ଷ ପରେ କପିଲଙ୍କ ରେକର୍ଡ ଭାଙ୍ଗିଥିଲା।
ଅଗରକର ତାଙ୍କ କ୍ୟାରିୟରରେ ୩୪୯ ଅନ୍ତର୍ଜାତୀୟ ଉଇକେଟ ନେଇଛନ୍ତି। ସେ ଟେଷ୍ଟରେ ୫୮ ଉଇକେଟ, ଦିନିକିଆରେ ୨୮୮ ଏବଂ ଟି-୨୦ରେ ୩ ଉଇକେଟ ନେଇଛନ୍ତି। ଦିନିକଆ କ୍ରିକେଟରେ ଭାରତ ପାଇଁ କମ ମ୍ୟାଚରେ ୧୦୦୦ ରନ ଏବଂ ୨୦୦ ଉଇକେଟ ନେଇଥିବା ରେକର୍ଡ ଏବେ ମଧ୍ୟ ତାଙ୍କ ନାଁରେ ରହିଛି। ସେ ୧୩୩ ମ୍ୟାଚରେ ଏହି ଉପଲବ୍ଧି ହାସଲ କରିଥିଲେ। ସେ ଦକ୍ଷିଣ ଆଫ୍ରିକାର କ୍ରିକେଟର ଶନ ପୋଲକଙ୍କୁ ପଛରେ ପକାଇଥିଲେ।
