ଉମରକୋଟ, ୧୭।୧୨(ସ୍ବ.ପ୍ର.): ଉମରକୋଟ ମାଟିରେ ବିଦେଶୀ ବରକୋଳି ଫଳାଇ ସଫଳ ଚାଷୀର ପରିଚୟ ସୃଷ୍ଟି କରିଛନ୍ତି ଖାଣ୍ଡା ଗ୍ରାମର ମାଖନ ମଣ୍ଡଳ। ଇଚ୍ଛାଶକ୍ତି ଆଗରେ ହାର ମାନିଛି ବୟସ। ୬୦ ବର୍ଷ ବୟସରେ ଚାଷକରି ଫଳ ଫଳାଇ ଅର୍ଥ ଉପାର୍ଜନ କରି ଯୁବଗୋଷ୍ଠୀଙ୍କ ପାଇଁ ପାଲଟିଛନ୍ତି ଉଦାହରଣ।
ପିଲାଟି ଦିନରୁ ଚାଷ ପ୍ରତି ତାଙ୍କର ଦୁର୍ବଳତା ଥିଲା। ପୂର୍ବରୁ ସେ ଆମ୍ବ,ପଣସ ଭଳି ଫଳ ବ୍ୟବସାୟ କରୁଥିଲେ। ବର୍ତ୍ତମାନ ସେ ବରକୋଳି ଚାଷ କରୁଛନ୍ତି। ଏଥିରୁ କଶ୍ମୀର ଲାଲ ଏବଂ ଅଷ୍ଟ୍ରେଲିୟାନ ବରକୋଳି ବାହାରୁଛି। ୟୁଟ୍ୟୁବରୁ ବରକୋଳି ଚାଷ ବିଷୟରେ ଜ୍ଞାନ ସଂଗ୍ରହ କରିଥିଲେ। ଜିଲାରେ ନିଜର ପରିଚୟ ସୃଷ୍ଟି କରିବାର ଲକ୍ଷ୍ୟ ନେଇ ଥାଇଲାଣ୍ଡ କମ୍ପାନୀର ଚାରାକୁ ପଶ୍ଚିମବଙ୍ଗରୁ ଆମଦାନୀ କରିଥିଲେ। ଗୋଟିଏ ଚାରାକୁ ପ୍ରାୟ ୮୦ ଟଙ୍କାରେ କିଣିଥିଲେ। ଗୋଟିଏ ଗଛରେ ପ୍ରାୟ ୧୦ବର୍ଷ ଯାଏ ବରକୋଳି ଫଳିବ। ଚଳିତ ବର୍ଷ ପ୍ରଥମ ଥର ପାଇଁ ବରକୋଳି ବାହାରିବା ଆରମ୍ଭ ହୋଇଛି। ଗୋଟିଏ ସିଜନରେ ଗୋଟିଏ ଗଛରୁ ୧୦ ରୁ ୩୦ କିଲୋ ପର୍ଯ୍ୟନ୍ତ ବରକୋଳି ବାହାରିବ । ଗଛ ପୁରୁଣା ହେଲେ ଗୋଟିଏ ଗଛରୁ ୫୦ କିଲୋରୁ ଊଦ୍ଧର୍ବ ଫଳ ବାହାରିବ ବୋଲି ମାଖନ କହିଛନ୍ତି। ବର୍ତ୍ତମାନ ମାଖନ ୩ ଏକର ଜମିରେ ୧୨୦୦ ଚାରା ଲଗାଇଛନ୍ତି। କୋଳି ମିଠା ଥିବାରୁ ବଜାରରେ ଏହାର ଚାହିଦା ଭଲ ରହିଛି। ପ୍ରତିଦିନ ୧୦୦ କେଜି ବରକୋଳି ବିକ୍ରି ହେଉଛି। ସ୍ଥାନୀୟ ବେପାରୀ ଜମିକୁ ଆସି ଫଳ ନେଇଯାଉଛନ୍ତି। ବାର୍ଷିକ ୩ ରୁ ୪ ଲକ୍ଷ ଟଙ୍କା ଲାଭ କରିବାର ଲକ୍ଷ୍ୟ ରଖିଛି ବୋଲି ମାଖନ କହିଛନ୍ତି। ଏହି ବରକୋଳି ଚାଷ ପାଇଁ ସ୍ବତନ୍ତ୍ର ସାରର ଆବଶ୍ୟକତା ପଡୁନାହିଁ। ଯାହା ସାର ଆବଶ୍ୟକ ପଡୁଛି ତାହା ସ୍ଥାନୀୟ ବଜାରରେ ଉପଲବ୍ଧ ରହିଛି। କିନ୍ତୁ ଯଦି ଜୈବିକ ସାର ବ୍ୟବହାର କରାଯାଏ ତା’ହେଲେ ଆହୁରି ଭଲ ଉତ୍ପାଦନ ହୋଇପାରନ୍ତା, କିନ୍ତୁ ଆର୍ଥିକ ସ୍ଥିତି ଏତେଟା ଭଲ ନ ଥିବାରୁ ଜୈବିକ ସାର ଅଳ୍ପ ବ୍ୟବହାର କରିଛି। ତେଣୁ ଚଳିତ ବର୍ଷ କମ୍ ଲାଭ ହେବ ବୋଲି ମାଖନ କହିଛନ୍ତି। ଲୋକଙ୍କଠାରୁ ଧାରକରଜ କରି ଚାଷ କରିଛି। ଜିଲା ପ୍ରଶାସନ ବା କୃଷି ବିଭାଗ ସରକାରୀ ସହାୟତା ଯୋଗାଇଦେଲେ ଅଧିକ ଜମିରେ ଚାଷକରି ଜିଲାର ସମସ୍ତ ଫଳ ଦୋକାନୀଙ୍କୁ ବରକୋଳି ଯୋଗାଇପାରିବେ ବୋଲି ସେ କହିଛନ୍ତି। ଏହି ବରକୋଳିର ଚାହିଦା ଭଲ ରହିଛି। ଗ୍ରାହକ ଥରେ ନେଲେ ପୁଣି ଥରେ ନେବାପାଇଁ ମନ କରୁଛନ୍ତି। ବରକୋଳି ମିଠା ଥିବାରୁ ଲୋକେ ପସନ୍ଦ କରୁଛନ୍ତି। ପୂର୍ବରୁ ଆମେ ପଡ଼ୋଶୀ ରାଜ୍ୟରୁ ବରକୋଳି ଆଣୁଥିଲୁ। ବର୍ତ୍ତମାନ ଆମ ନିକଟରେ ମିଳୁଛି। ଆଉ ଏହାକୁ ବିକ୍ରିକରି ଆମେ ମଧ୍ୟ ଭଲ ଲାଭ ପାଇପାରୁଛି ବୋଲି ସ୍ଥାନୀୟ ଫଳଦୋକାନୀ କହିଛନ୍ତି।
