ଦେବଗଡ,୨୦।୮(ଶଶାଙ୍କ ଶେଖର ଝାଙ୍କର):ପୋଲିସ ହେପାଜତରେ ଥିବା ଦୁର୍ଘଟଣାଗ୍ରସ୍ତ ହାଇୱାରୁ ପ୍ରାୟ ୧୧ ଲକ୍ଷ ଟଙ୍କାର ସାମଗ୍ରୀ (ଯନ୍ତ୍ରାଂଶ ଓ ଟାୟାର ଆଦି) ଚୋରି ହେବା ଘଟଣାରେ କୁଣ୍ଢେଇଗୋଳା ଥାନା ସବଇନ୍ସପେକ୍ଟର ସନାତନ ମହାରଣା କାର୍ଯ୍ୟରୁ ନିଲମ୍ବିତ ହୋଇଛନ୍ତି। ଦାୟିତ୍ୱହୀନତା ଏବଂ ଅଭିଯୁକ୍ତମାନଙ୍କ ପ୍ରତି କୋହଳ ମନୋଭାବ ପ୍ରଦର୍ଶନ ଯୋଗୁ ଜିଲା ଆରକ୍ଷୀ ଅଧିକ୍ଷକ ଅନିଲ କୁମାର ମିଶ୍ର ତାଙ୍କୁ କାର୍ଯ୍ୟରୁ ନିଲମ୍ବିତ କରିଥିବା ଜଣାପଡିଛି ।
ସୂଚନାଯୋଗ୍ୟ ଯେ, ଗତ ମାର୍ଚ୍ଚମାସ ୧୪ ତାରିଖ ଦିନ ସମ୍ବଲପୁର ଜିଲା ରେଢାଖୋଲ ଥାନାଞ୍ଚଳ ବନ୍ଧୁପାଲି ଗ୍ରାମର ମହେନ୍ଦ୍ର ପ୍ରଧାନଙ୍କ ହାଇୱା ଗାଡି (ନଂ-ଓଡି୨୩ଜି୦୬୯୧) ଦେବଗଡ ଜିଲା କୁଣ୍ଢେଇଗୋଳା ଥାନାଂଚଳର ବୁଢାପାଳ ପଟୁ ଆସୁଥିଲା । ହାଇୱାଟି ବୁଢାପାଳରୁ ପ୍ରାୟ ୧ କି.ମି. ଦୂରରେ ସମ୍ମୁଖପଟୁ ଆସୁଥିବା ଏକ ମାଲ ବୋଝେଇ ପିକଅପ ସହିତ ଧକ୍କା ହୋଇଥିଲା । ସୂଚନା ପାଇ କୁଣ୍ଢେଇଗୋଲା ଥାନା ପୋଲିସ ଘଟଣା ସ୍ଥଳରେ ପହଂଚି ଉଭୟ ଗାଡିକୁ ଜବତ କରିଥିଲା । ଏଥିସହ ହାଇୱାର ଚାଳକ ସୁକାନ୍ତ ପ୍ରଧାନ ଏବଂ ମାଲିକଙ୍କୁ ଡାକି ଆବଶ୍ୟକ କାଗଜପତ୍ର ଯାଂଚ କରିବାପରେ ଜାମିନରେ ଛାଡିଥିଲା । ତେବେ ଗତ ଜୁଲାଇ ୨୭ ତାରିଖ ସଂଧ୍ୟା ପ୍ରାୟ ୭ ଟା ସମୟରୁ ୨୮ ତାରିଖ ରାତ୍ରୀ ୧୧ଟା ୩୦ ମିନିଟ ପର୍ଯ୍ୟନ୍ତ ଜବତ ହୋଇଥିବା ତାଙ୍କର ଦୁର୍ଘଟଣାଗ୍ରସ୍ତ ହାଇୱାଟି ବୁଢାପାଳର ଏକ ଟାୟାର ଦୋକାନ ସମ୍ମୁଖରେ ରହିଥିବା ମାଲିକ ମହେନ୍ଦ୍ର ଜାଣିବାକୁ ପାଇଥିଲେ।
ଅନ୍ୟପକ୍ଷରେ ଜୁଲାଇ ୨୯ ତାରିଖ ସକାଳ ୬ଟାରେ ଉକ୍ତ ହାଇୱାଟି କୁଣ୍ଢେଇଗୋଳା ଥାନା ସମ୍ମୁଖରେ ରହିଥିବା ଜାଣିବାକୁ ପାଇଥିଲେ । ତେବେ ଦୁର୍ଘଟଣା ସମୟରେ ଉକ୍ତ ହାଇୱାର ସମ୍ମୁଖ ଭାଗ ଯେତିକି କ୍ଷତିଗ୍ରସ୍ତ ହୋଇଥିଲା ସଂପ୍ରତି ତାଠାରୁ ଅଧିକ କ୍ଷତିଗ୍ରସ୍ତ ହୋଇଥିବା ଏବଂ ରିମ ସହିତ ୧୩ଗୋଟି ଟାୟାର,୨ଗୋଟି ବ୍ୟାଟେରୀ , ୪ ଗୋଟି ରିମ ଏକ୍ସେଲ, ପ୍ରୋପାଇଲର ସାଫ୍ଟ, ୨ଗୋଟି ଟେଲ ଫ୍ଲେଂଚ, ଥ୍ରୋ ସାଫ୍ଟ ,ଟ୍ରଲି ହାଇଡ୍ରୋଲିକ ଜେକ ଓ ଫାଉଂଡେସନ , ୨ ଗୋଟି ସ୍ମଲ ଜେକ, ୮ ଗୋଟି କ୍ୟାବିନ କ୍ୱାର୍ଟର ଗ୍ଲାସ, ଡିଜେଲ ଏବଂ ଡିଜେଲ ଟ୍ୟାଙ୍କ କ୍ୟାପ, ଟାଇରଡ, ୮୦ ଗୋଟି ହବ ବୋଲ୍ଟ, ସାଫ୍ଟ ବୋଲ୍ଟ ଓ ଚେକ ନଟ ଏବଂ ସ୍ଟେପିନୀ ବ୍ରାକେଟ ଆଦି ଅଧାରୁ ଅଧିକ ଯନ୍ତ୍ରାଂଶ(ପ୍ରାୟ ୧୧ ଲକ୍ଷ ଟଙ୍କା ମୂଲ୍ୟର) ଚୋରିହୋଇଥିବା ମାଲିକ ଜାଣିବାକୁ ପାଇଥିଲେ ।
ଏନେଇ ସେ ଗତ ୫ ତାରିଖ ଦିନ କୁଣ୍ଢେଇଗୋଳା ଥାନାରେ ଲିଖିତ ଅଭିଯୋଗ କରିବାରୁ ପୁଲିସ କେଶ ନଂ- ୧୬୪/୨୫ ତା-୦୫-୦୮-୨୦୨୫ ରେ ଏକ ମାମଲା ଋଜୁକରି ଘଟଣାର ତଦନ୍ତ ଚଲାଇଥିଲା । ଗତ ୬ ତାରିଖରେ ଏ ଘଟଣାରେ ପୋଲିସ କୁଣ୍ଢେଇଗୋଳା ଥାନାଂଚଳ ଗାଡିଆପାଳ ଗ୍ରାମର ସଞ୍ଜୟ ନାୟକ, ଜିତେନ୍ଦ୍ର ନାୟକ ଓ ଆଠଗଡ ଥାନା ତଲଗଡ ଗ୍ରାମର ପ୍ରଭାସ ମହାନ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ମାତ୍ର ଅଦାଲତରେ ଜାମିନ ନାମଞ୍ଜୁର ହେବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଥିଲା । ତେବେ ଏନେଇ କୁଣ୍ଢେଇଗୋଳା ଥାନା ପୋଲିସର ଭୁମୀକା ଏବଂ କାର୍ଯ୍ୟଦକ୍ଷତା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଥିଲା । ଅନ୍ୟପକ୍ଷରେ ଏନେଇ ହାଇୱା ମାଇଲ ଶ୍ରୀ ପ୍ରଧାନ ଏନେଇ ଦେବଗଡ ଜିଲା ଆରକ୍ଷୀ ଅଧିକ୍ଷକଙ୍କ ଦ୍ୱାରସ୍ତ ହୋଇଥିଲେ । ଫଳରେ ଏଘଟଣାର ବିଭାଗୀୟ ତଦନ୍ତ ଆରମ୍ଭ ହୋଇଥିଲା । ତଦନ୍ତ ଅଧାରରେ ଦୁର୍ଘଟଣାଗ୍ରସ୍ତ ହାଇୱା ଯନ୍ତ୍ରାଂଶ ଚୋରୀ ଘଟଣାରେ କୁଣ୍ଢେଇଗୋଳା ଥାନା ସବଇନ୍ସପେକ୍ଟର ସତାତନ ମହାରଣାଙ୍କ ଦାୟିତ୍ୱହୀନତା ଏବଂ ଚୋରି ଅଭିଯୂକ୍ତଙ୍କ ପ୍ରତି ତଙ୍କର କହଳ ମନୋଭାବ ରହିଥିବା ଜଣାପଡିଥିଲା । ଏହି ତଦନ୍ତ ରିପୋର୍ଟ ଆଧାରରେ ଜିଲା ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ମିଶ୍ର ସବ ଇନ୍ସୋକ୍ଟେର ଶ୍ରୀ ମହାରଣାଙ୍କୁ କାର୍ଯ୍ୟରୁ ନିଲମ୍ବିତ କରିବାସହ ଜିଲା ପୋଲିସ ମୂଖ୍ୟାଳୟରେ ତାଙ୍କର ହେଡକ୍ୱାର୍ଟର ଫିକ୍ସ କରିଥିବା ଜଣାପଡିଛି ।
