ଦୁବାଇ/ନୂଆଦିଲ୍ଲୀ,୭।୩: ବିଶ୍ୱର ସୁନା ବଜାର କୁହାଯାଉଥିବା ଦୁବାଇରୁ ଏବେ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଭୟଙ୍କର ଯୁଦ୍ଧ ଯୋଗୁ ଅନ୍ତର୍ଜାତୀୟ ବଜାରରେ ସୁନା ଦର ଆକାଶଛୁଆଁ ହେଉଥିବା ବେଳେ, ଦୁବାଇର ବ୍ୟବସାୟୀମାନେ ଏବେ ସୁନା ଉପରେ ଭାରୀ ରିହାତି (Discount) ଦେବା ଆରମ୍ଭ କରିଛନ୍ତି।
ସାଧାରଣତଃ ଯୁଦ୍ଧ ସମୟରେ ସୁନା ଦର ବଢ଼ିଥାଏ, କିନ୍ତୁ ଦୁବାଇ କ୍ଷେତ୍ରରେ ଏହାର କାରଣ ହେଉଛି ‘ଲଜିଷ୍ଟିକ୍ସ’ ଏବଂ ‘ସପ୍ଲାଏ ଚେନ’ରେ ବାଧା। ମଧ୍ୟପ୍ରାଚ୍ୟରେ ଯୁଦ୍ଧ ଯୋଗୁ ଇରାନ ଏବଂ ଏହାର ଆଖପାଖ ଆକାଶପଥ (Airspace) ବିପଜ୍ଜନକ ହୋଇପଡ଼ିଛି। ସୁନା ସାଧାରଣତଃ ଯାତ୍ରୀବାହୀ ବିମାନ ଜରିଆରେ ପଠାଯାଏ, ଯାହା ଏବେ ପ୍ରାୟତଃ ବନ୍ଦ ରହିଛି।
ଦୁବାଇ ବ୍ୟବସାୟୀଙ୍କ ପାଖରେ ପ୍ରଚୁର ସୁନା ଅଛି, କିନ୍ତୁ ସେମାନେ ଏହାକୁ ଲଣ୍ଡନ କିମ୍ବା ନ୍ୟୁୟର୍କ ଭଳି ବଡ଼ ବଜାରକୁ ପଠାଇ ପାରୁନାହାନ୍ତି।
ବୀମା ଓ ଷ୍ଟୋରେଜ ଖର୍ଚ୍ଚ ସୁନାକୁ ସୁରକ୍ଷିତ ରଖିବା ଏବଂ ଏହାର ବୀମା (Insurance) ଖର୍ଚ୍ଚ ୬୦% ରୁ ୭୦% ପର୍ଯ୍ୟନ୍ତ ବଢ଼ିଯାଇଛି। ତେଣୁ ବ୍ୟବସାୟୀମାନେ ଏହାକୁ ମହଜୁଦ ନରଖି ପ୍ରତି ଆଉନ୍ସ ପିଛା ୩୦ ଡଲାର ପର୍ଯ୍ୟନ୍ତ ରିହାତିରେ ବିକ୍ରି କରିବାକୁ ବାଧ୍ୟ ହେଉଛନ୍ତି।
ଭାରତ ହେଉଛି ବିଶ୍ୱର ସବୁଠାରୁ ବଡ଼ ସୁନା କ୍ରେତା ଏବଂ ଆମ ଦେଶକୁ ଅଧିକାଂଶ ସୁନା ଦୁବାଇରୁ ହିଁ ଆସିଥାଏ।
ଏହି ସଙ୍କଟର ଦୁଇଟି ଦିଗ ରହିଛି:
୧. ସପ୍ଲାଏରେ ଅଭାବ: ଅନେକ ସିପ୍ମେଣ୍ଟ ମଝିରେ ଅଟକି ରହିଥିବାରୁ ଭାରତରେ ଫିଜିକାଲ ଗୋଲ୍ଡ (ଅସଲି ସୁନା) ର ଅଭାବ ଦେଖାଦେଇଛି। ଭାରତର ବଡ଼ ବଡ଼ ରିଫାଇନାରୀମାନେ ମଧ୍ୟପ୍ରାଚ୍ୟରୁ ପ୍ରାୟ ୧୦% କଞ୍ଚା ସୁନା ପାଉଥିଲେ, ଯାହା ଏବେ ବନ୍ଦ ହୋଇଯାଇଛି।
୨. ଭାରତ ପାଖରେ ଅଛି ଷ୍ଟକ: ଆଶ୍ୱସ୍ତିର ବିଷୟ ହେଉଛି ଯେ, ଜାନୁଆରୀ ମାସରେ ଭାରତୀୟ ଡିଲରମାନେ ବହୁ ପରିମାଣରେ ସୁନା ଆମଦାନୀ କରିଥିଲେ। ତେଣୁ ବର୍ତ୍ତମାନ ପାଇଁ ଭାରତରେ ସୁନାର କୌଣସି ବଡ଼ ଅଭାବ ପରିଲକ୍ଷିତ ହେଉନାହିଁ।
ବଜାର ବିଶେଷଜ୍ଞଙ୍କ ଅନୁଯାୟୀ, ଯଦି ଯୁଦ୍ଧ ଶୀଘ୍ର ବନ୍ଦ ନ ହୁଏ ଏବଂ ଏହି ସ୍ଥିତି ମାସ ମାସ ଧରି ଚାଲେ, ତେବେ ଭାରତୀୟ ବଜାରରେ ସୁନାର ଭୟଙ୍କର ଅଭାବ ଦେଖାଦେବ। ଫଳରେ ଘରୋଇ ବଜାରରେ ସୁନା ଦରରେ ଏକ ବିରାଟ ଉତ୍ଥାନ ଦେଖିବାକୁ ମିଳିପାରେ। ବର୍ତ୍ତମାନ ଆନ୍ତର୍ଜାତୀୟ ବଜାରରେ ସୁନା ପ୍ରତି ଆଉନ୍ସ ପିଛା ୫,୦୦୦ ଡଲାର ପାଖାପାଖି କାରବାର କରୁଛି।
