ବିଷମ କଟକ,୨୩ା୭(ବିଭୂତି ଭୂଷର ନାୟକ )ସରକାର ଶିକ୍ଷାର ଉନ୍ନତି ପାଇଁ ବହୁ ଅର୍ଥ ବ୍ୟୟ କରୁଛନ୍ତି। ୫-ଟିରେ ଅନ୍ତର୍ଭୁକ୍ତ କରି ବିଦ୍ୟାଳୟ ଶ୍ରେଣୀଗୃହ ଓ ପରିବେଶକୁ ନୂଆ ରୂପ ଦେଉଛନ୍ତି। ମାତ୍ର ରାୟଗଡା ଜିଲା ବିଷମ କଟକ ବ୍ଲକରେ ଏପରି ଏକ ବିଦ୍ୟାଳୟ ରହିଛି ଯେଉଁଠି ବର୍ଷା ଦିନେ ଶ୍ରେଣୀଗୃହରେ ବସି ପାଠ ପଢିବା ଛାତ୍ରୀଛାତ୍ରଙ୍କ ପାଇଁ କଷ୍ଟକର ହୋଇପଡୁଛି। ବିଦ୍ୟାଳୟରେ ପ୍ରାର୍ଥନା ପରେ ଛାତ୍ରୀଛାତ୍ରୀ ଓ ଶିକ୍ଷୟିତ୍ରୀ ଶିକ୍ଷକମାନେ ମିଶି ଶ୍ରେଣୀଗୃହରୁ ବର୍ଷା ପାଣି ବାହାର କରୁଥିବା ଦେଖିବାକୁ ମିଳୁଛି। ବ୍ଲକର ପାଇକଡାକୁଲୁଗୁଡା ପଞ୍ଚାୟତର ସିନ୍ଧିପଙ୍ଗା ପ୍ରାଥମିକ ବିଦ୍ୟାଳୟରେ ଏପରି ଅଭାବନୀୟ ଦୃଶ୍ୟ ଦେଖାଯାଇଛି। ଏପରି ପୂର୍ବାହ୍ନ ୧୦ଟାରୁ ଅପରାହ୍ନ ୧ ପ୍ରାର୍ଯ୍ୟନ୍ତ ଆଞ୍ଜୁଳାରେ ପାଣି କାଢିବା ପରେ ପିଲାଙ୍କ ପାଠ ପଢା ଆରମ୍ଭ ହେଉଛି। ଆଉ ୨/୩ଘଣ୍ଟା ପିଲାମାନେ କିପରି ପାଠ ପଢୁଥିବେ ତାହା ସହଜରେ ଅନୁମେୟ। ଗ୍ରୀଷ୍ମ ଛୁଟିରେ ବିଦ୍ୟାଳୟର ଏପରି ସମସ୍ୟା ସମ୍ପର୍କରେ ଗ୍ରାମ ବାସୀ ଓ ବିଦ୍ୟାଳୟ ପରିଚାଳନା କମିଟି ସଭାପତି ବ୍ଲକ ଶିକ୍ଷା ଅଧିକାରୀ ମଦନ କୁମାର ପାଣିଙ୍କୁ ଲିଖିତ ଭାବେ ଜଣାଇ ଥିଲେ। ଏନେଇ ଶିକ୍ଷା ଅଧିକାରୀ ପାଣି ତାଙ୍କ ଚିଠି ନଂ. ୮୪୨/୨୩, ତା ୧୧ା୫ା୨୦୨୩ରେ ବିଡ଼ିଓ ସଦାଶିବ ନାୟକଙ୍କୁ ଅବଗତ କରାଇ ଏ ଦିଗରେ ପଦକ୍ଷେପ ନେବାକୁ ଅନୁରୋଧ କରିଥିଲେ। ମାତ୍ର ବିଦ୍ୟାଳୟ ଖୋଲିବା ବେଳକୁ କିଛି କାର୍ଯ୍ୟ ହୋଇ ନ ଥିବା ଦେଖିବାକୁ ମିଳିଥିଲା। ଫଳରେ ବିଦ୍ୟାଳୟ ପ୍ରତି କୋଣସି ଅଧିକାରୀଙ୍କ ଆନ୍ତରିକତା ନ ଥିବା ସ୍ପଷ୍ଟ ହୋଇଛି। ଏନେଇ ବ୍ଲକ ଶିକ୍ଷା ଅଧିକାରୀ ପାଣିଙ୍କୁ ପଚାରିବାରୁ ସେ କହିଲେ, ବିଦ୍ୟାଳୟ ସମସ୍ୟା ନେଇ ବିଡ଼ିଓଙ୍କୁ ବାରମ୍ବାର ଜଣାଇଛୁ। ପରିଚାଳନା କମିଟି ସଭାପତିଙ୍କ ମାଧ୍ୟମରେ ସରପଞ୍ଚଙ୍କୁ ମଧ୍ୟ ଜଣାଇଛ। ମାତ୍ର ଏହାକୁ କେହି ଗୁରୁତ୍ୱ ଦେଇନାହାନ୍ତି ବୋଲି ପାଣି କହିଛନ୍ତି। ଏ ବିଷୟରେ ବିଡିଓ ସଦା ଶିବ ନାୟକ କହିଛନ୍ତି, ବିଦ୍ୟାଳୟର ଆକ୍ସନ ପ୍ଲାନ ପଠାଇବାରେ ବିଳମ୍ବ ହେବାରୁ କାର୍ଯ୍ୟ ହୋଇପାରିଲା ନାହିଁ। ଖୁବ୍ ଶ୍ରୀଘ୍ର ବିଦ୍ୟାଳୟ ଶ୍ରେଣୀଗୃହ ମରାମତି କରାଯିବ ବୋଲି ସେ ପ୍ରକାଶ କରିଛନ୍ତି।
