ପଟ୍ଟାଙ୍ଗି,୧୦ା୨(ଡି.ଏନ.ଏ.):କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ କୋଟିଆ ପଞ୍ଚାୟତକୁ ନେଇ ଉଭୟ ଆନ୍ଧ୍ର ଓ ଓଡ଼ିଶା ମଧ୍ୟରେ ଦୀର୍ଘ ବର୍ଷ ଧରି ବିବାଦ ଲାଗିରହିଥିବା ବେଳେ ଏବେ ହାଇଡ୍ରୋ ପାୱାର ପ୍ରୋଜେକ୍ଟ ପାଇଁ ଅନ୍ୟ ଏକ ବିବାଦ ମୁଣ୍ଡ ଟେକିଛି। ଏହି ପ୍ରୋଜେକ୍ଟକୁ ପଞ୍ଚାୟତର ତଳ ଗଞ୍ଜେଇପଦର ଗ୍ରାମବାସୀ କଡା ବିରୋଧ କରିଛନ୍ତି। ୭ଖଣ୍ଡ ଗ୍ରାମର ଗ୍ରାମବାସୀ ଏବେ ଏକାଠି ମେଳି କରି କାର୍ଯ୍ୟକୁ ବିରୋଧ କରିଛନ୍ତି। ଗ୍ରାମର ଯୁବତୀଯୁବକଙ୍କଠାରୁ ଆରମ୍ଭ କରି ବୃଦ୍ଧାବୃଦ୍ଧଙ୍କ ପର୍ଯ୍ୟନ୍ତ ସମସ୍ତେ ହାତରେ ମାରଣାସ୍ତ୍ର ଧରି ବିରୋଧ କରିଥିବା ଦେଖିବାକୁ ମିଳିଛି।
ଖବରରୁ ଜଣାପଡିଛି, ହାଇଡ୍ରୋପାୱାର ପ୍ରୋଜେକ୍ଟ ପାଇଁ ଗତ ରବିବାର ତାମିଲନାଡୁରୁ ୬ ଜଣ ବ୍ୟକ୍ତି ମାଟିଖୋଳା ଯନ୍ତ୍ରପାତି ଧରି ଏକ ଟ୍ରକ ଯୋଗେ ଆସି ତଳଗଞ୍ଜେଇପଦର ଗ୍ରାମରେ ପହଞ୍ଚତ୍ଥିଲେ। ଟେଣ୍ଟ ପକାଇ ରହିଥିଲେ। ଗୁରୁବାର ପାହାଡ଼ ତଳେ ଥିବା ଜାଗାଗୁଡିକରେ ପହଞ୍ଚତ୍ ସେମାନେ ଯନ୍ତ୍ରପାତି ଦ୍ୱାରା ମାଟି ଖୋଳିବା ଆରମ୍ଭ କରିଥିଲେ। ସେହି ସମୟରେ ଗ୍ରାମବାସୀ ପହଞ୍ଚତ୍ ସେମାନଙ୍କୁ ବିରୋଧ କରି କୁଆଡେ ଆସିଛ ଏବଂ ତୁମମାନଙ୍କୁ କିଏ ପଠେଇଛି ବୋଲି ପଚାରିଥିଲେ। ତୁମକୁ ଆନ୍ଧ୍ର ସରକାର ନା ଓଡ଼ିଶା ସରକାର ପଠାଇଛନ୍ତି ବୋଲି ପ୍ରଶ୍ନ କରିଥିଲେ। ମାତ୍ର ସେମାନେ କିଛି ନ କହି କାମ ବନ୍ଦ କରିଦେଇଥିଲେ। ଗ୍ରାମବାସୀଙ୍କ କହିବା ଅନୁଯାୟୀ, ଏହି ପ୍ରୋଜେକ୍ଟ ହେଲେ ଆମର ୭ ଖଣ୍ଡ ଗ୍ରାମ ଜଳମଗ୍ନ ହେବ। ଆମ ଜଙ୍ଗଲ ଜମି ନଷ୍ଟ ହେବ। ତେଣୁ ଆମେ ଏହି ପ୍ରୋଜେକ୍ଟ କୌଣସି ପ୍ରକାରେ କରିବାକୁ ଦେବୁନାହିଁ। ଏହି ପ୍ରକଳ୍ପ ହେବା ଦ୍ୱାରା ଆମର ଲାଭ କ’ଣ ହେବ ଓ କ୍ଷତି କ’ଣ ହେବ ସେନେଇ ଜିଲା ପ୍ରଶାସନ ଅଧିକାରୀ ହୁଅନ୍ତୁ କିମ୍ବା ବ୍ଲକ ପ୍ରଶାସନିକ ଅଧିକାରୀ ଆମ ସହ ଆଲୋଚନା କରନ୍ତୁ ବୋଲି ଗ୍ରାମବାସୀ ଦାବି କରିଛନ୍ତି। ଏନେଇ କୋଟିଆ ସରପଞ୍ଚ ଲିଉ ଗେମେଲଙ୍କୁ ପଚାରିବାରୁ ସେ କହିଲେ, ମୁଁ ଏନେଇ କିଛି ଜାଣିନାହିଁ। ଏ ସମ୍ପର୍କରେ କୌଣସି ପଲ୍ଲିସଭା କି ଗ୍ରାମସଭା ହୋଇନାହିଁ। ଅନ୍ୟପକ୍ଷରେ ବିଡିଓ ସୌମ୍ୟସାର୍ଥକ ମିଶ୍ର କୋଟିଆରେ ଉପସ୍ଥିତ ଥିଲେ ମଧ୍ୟ ଘଟଣା ସ୍ଥଳକୁ ଯାଇ ନ ଥିଲେ। ଫଳରେ ଏନେଇ ବିଭିନ୍ନ ପ୍ରଶ୍ନବାଚୀ ସୃଷ୍ଟି ହୋଇଛି। ସୂଚନାଯୋଗ୍ୟ, ୨୦୨୧ ଡିସେମ୍ବର ୨୮ରେ ଏକ ଟିମ୍ ଆସି ହାଇଡ୍ରୋ ପାୱାର ପ୍ରୋଜେକ୍ଟ ପାଇଁ ଜାଗା ଚିହ୍ନଟ କରୁଥିବା ବେଳେ ଓଡ଼ିଶାର କିଛି ଅଧିକାରୀଙ୍କ ସହିତ ସେମାନଙ୍କର ଯୁକ୍ତିତର୍କ ହୋଇଥିଲା। ଅଧିକାରୀମାନେ ବିରୋଧ କରିବାରୁ ସେମାନେ ଫେରି ଯାଇଥିଲେ।
