କୃଷ୍ଣପ୍ରସାଦ,୨୧ା୧୧(ଡି.ଏନ୍.ଏ): ଶୀତ ପଡ଼ିଲେ ବିଦେଶାଗତ ପକ୍ଷୀଙ୍କ କଳରବରେ ଚିଲିକାର ପରିବେଶ ମୁଖରିତ ହୋଇଉଠେ। ଲକ୍ଷଲକ୍ଷ ପର୍ଯ୍ୟଟକଙ୍କୁ ଏହା ଆକର୍ଷିତ କରିଥାଏ। ଏବେ ଶୀତର ପ୍ରଭାବ ଧିରେ ଧିରେ ବଢୁଥିବାରୁ ପକ୍ଷୀଙ୍କ ସମାଗମ ମଧ୍ୟ ବୃଦ୍ଧି ପାଇବାରେ ଲାଗିଛି। ପକ୍ଷୀ ଅଭୟାରଣ୍ୟରେ ଖାଦ୍ୟ ଅଭାବ ଯୋଗୁ ବିଦେଶାଗତ ପକ୍ଷୀମାନେ ଚିଲିକା ତଟଦେଶରେ ଥିବା ପାରିକୁଦ, ଗୁରୁବାଇ, ଚିଲିକା, ନୂଆପଡ଼ା, ଅଁଳାକୁଦା, ସିପିଆ, ତିଛିଣି, ଖଟିଆକୁଦି, ଖୋଳାମୁହଁ ଅଞ୍ଚଳକୁ ଚାଲିଆସୁଛନ୍ତି। ଏସବୁ ଅଞ୍ଚଳରେ ପ୍ରଚୁର ମାତ୍ରାରେ ଦଳ ଓ କଇଁଫୁଲ ଖାଇବାକୁ ମିଳୁଛି। ବିଶେଷକରି ପାରିକୁଦ ଚିଲିକାର ତଟଦେଶସ୍ଥ ପାଞ୍ଚକୁଦି, ପାଣ୍ଢା, ଚିଖିଲି, ଚିତ୍ରକୋଟ, ବନମାଳ, ସୋଲାକୁଦି, ଚଟେଇକୋଣ ଆଦି ସ୍ଥାନରେ ମଧ୍ୟ ହଜାର ହଜାର ସଂଖ୍ୟାରେ ଏହି ପକ୍ଷୀମାନଙ୍କ ସମାଗମ ହେଉଥିବା ଦେଖିବାକୁ ମିଳିଛି। ମାଂସ ପିପାସୁ ଶିକାରୀମାନଙ୍କ କବଳରୁ ପକ୍ଷୀଙ୍କ ସୁରକ୍ଷା ନିମନ୍ତେ ଚିଲିକା ବନ୍ୟପ୍ରାଣୀ ବନଖଣ୍ଡ, ବାଲୁଗାଁ ତରଫରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ବାଲୁଗାଁ ବନ୍ୟପ୍ରାଣୀ ବନାଞ୍ଚଳ ଅଧିକାରୀ ବନରାମ ପ୍ରସାଦ ନନ୍ଦଙ୍କ ନେତୃତ୍ୱରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ପାରିକୁଦ ତଟଦେଶରେ ବନପାଳ ଜିତେନ୍ଦ୍ରୀୟ କୁମାର ଜେନା, ବନରକ୍ଷୀ ଅନିଲ କୁମାର ଲେଙ୍କା, ସୁରକ୍ଷାକର୍ମୀ ସନ୍ତୋଷ ସେଠୀ, ସାଧୁ ଚରଣ ସାହୁ, ସୌମ୍ୟରଞ୍ଜନ ବିଶ୍ୱାଳ, ଲଲାଟ ସ୍ବାଇଁ, ସୁଶାନ୍ତ ସାହୁ, ଜୟନ୍ତ ଜେନା, ପ୍ରମୋଦ ବେହେରା, ଜ୍ଞାନ ସାହୁ ପ୍ରମୁଖ ଅଞ୍ଚଳ ପରିଦର୍ଶନରେ ସାମିଲ ହୋଇଛନ୍ତି। ଚିଲିକା ନୂଆପଡ଼ା ବନ୍ୟପ୍ରାଣୀ ବନାଞ୍ଚଳ ପକ୍ଷରୁ ନୂଆପଡ଼ା ରେଞ୍ଜର ରଞ୍ଜନ କୁମାର ଦାସଙ୍କ ତତ୍ତ୍ୱାବଧାନରେ ବନପାଳ ମୀନା କୁମାରୀ ନାୟକଙ୍କ ନେତୃତ୍ୱରେ ବନରକ୍ଷୀ ତ୍ରିଲୋଚନ ମହାରଣା ଏବଂ ଅନ୍ୟ କର୍ମଚାରୀ ପକ୍ଷୀଙ୍କ ସୁରକ୍ଷା ଦାୟିତ୍ୱରେ ରହିଛନ୍ତି। ସେହିପରି ସାମୁଦ୍ରିକ କଇଁଛଙ୍କ ପାଇଁ ମଧ୍ୟ ବିଭାଗ ତରଫରୁ ଏଭଳି ସୁରକ୍ଷା ବ୍ୟବସ୍ଥା କରାଯାଇଛି।
