ବ୍ୟାଙ୍କକ, ୧୩।୨ : କରୋନା ମହାମାରୀ ସଙ୍କଟ ସମୟରେ ପାଳନ କରାଯାଉଥିବା ଭାଲେଣ୍ଟାଇନ୍ସ ଦିବସକୁ ଦୃଷ୍ଟିରେ ରଖି ଥାଇଲାଣ୍ଡ ସରକାର ଏକ ଅଜବ ଆଦେଶ ଦେଇଛନ୍ତି। ଥାଇଲାଣ୍ଡରେ ଭିଡ଼ ଜମାଇଥିବା ପ୍ରେମୀଯୁଗଳ ଏବଂ ଦମ୍ପତିଙ୍କ ପାଇଁ ଏହି ନିର୍ଦ୍ଦେଶ ଜାରି ହୋଇଛି। ସେମାନଙ୍କୁ ମାସ୍କ ପିନ୍ଧିବାକୁ ନିର୍ଦ୍ଦେଶ ଦିଆଯାଇଛି॥ ଏହା ସହିତ ମୁହାଁମୁହିଁ ସ୍ଥିତି ଠାରୁ ଦୂରେଇ ରହିବାକୁ ମଧ୍ୟ କୁହାଯାଇଛି। ଦେଶରେ କରୋନା ସଂକ୍ରମଣ ବଢୁଥିବାରୁ ସରକାରଙ୍କ ପକ୍ଷରୁ ଏଭଳି କଟକଣା ଜାରି ହୋଇଛି।
ସେହିପରି ଶାରୀରିକ ସମ୍ପର୍କ ପୂର୍ବରୁ ମଧ୍ୟ ଦମ୍ପତି ମାସ୍କ୍ ପିନ୍ଧିବା ଜରୁରୀ ବୋଲି ସରକାର ନିର୍ଦ୍ଦେଶ ଜାରି କରିଛନ୍ତି। ଭାଲେଣ୍ଟାଇନ୍ସ ଡେ’ରେ ସଂକ୍ରମଣ ପୁଣି ବଢ଼ିବାର ଆଶଙ୍କାକୁ ଦୃଷ୍ଟିରେ ରଖି ସରକାର ଲୋକଙ୍କୁ ସଚେତନ କରିବା ଲାଗି ଏଭଳି କହିଛନ୍ତି। ସଚେତନ ନ ହେଲେ ସଂକ୍ରମଣ ପୁଣି ବଢ଼ିପାରେ ବୋଲି ସରକାର ଭୟ କରୁଛନ୍ତି।
ଥାଇଲାଣ୍ଡର ପଟ୍ଟାୟା ସହର ଏହାର ସେକ୍ସ୍ ଇଣ୍ଡଷ୍ଟ୍ରି ପାଇଁ ସାରା ବିଶ୍ୱରେ ପ୍ରସିଦ୍ଧ ଏବଂ ବହୁ ସଂଖ୍ୟାରେ ଲୋକ ଏଠାରେ ଭାଲେଣ୍ଟାଇନ୍ସ୍ ଦିବସ ଅବସରରେ ପହଞ୍ଚନ୍ତି। ପର୍ଯ୍ୟଟକଙ୍କ ଭିଡ଼ ଯୋଗୁ ସହରରେ ଦୈନିକ ସଂକ୍ରମଣ ୮,୦୦୦ରେ ପହଞ୍ଚିଛି। ଗତ ୧୫ ଦିନ ମଧ୍ୟରେ ଏହା ଦ୍ୱିଗୁଣିତ ହୋଇଛି। ଭାଲେଣ୍ଟାଇନ୍ସ ଡେ’ରେ କରୋନା ମାମଲା ସଂଖ୍ୟା ବୃଦ୍ଧି ପାଇପାରେ ବୋଲି ସରକାର ଆଶଙ୍କା କରୁଛନ୍ତି।
ପୃଥିବୀର ବିଭିନ୍ନ ସ୍ଥାନରୁ ଲୋକମାନେ ବିବାହ କରିବାକୁ ଏଠାକୁ ଆସନ୍ତି। ଥାଇଲାଣ୍ଡରେ ଭାଲେଣ୍ଟାଇନ୍ସ ଡେ’ରେ ବହୁ ସଂଖ୍ୟକ ଦମ୍ପତି ଏକତ୍ରିତ ହୁଅନ୍ତି। ସ୍ବାସ୍ଥ୍ୟ ବିଭାଗର ନିର୍ଦ୍ଦେଶକଙ୍କ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ କରୋନା ଶାରୀରିକ ସମ୍ପର୍କ ମାଧ୍ୟମରେ ବ୍ୟାପୁଥିବା ରୋଗ ନୁହେଁ, କିନ୍ତୁ ଯଦି ଆପଣ ନିଶ୍ୱାସ ପ୍ରଶ୍ୱାସ ନେଉଛନ୍ତି ଏବଂ ପରସ୍ପର ସହିତ ଗଭୀର ଚୁମ୍ବନ ବିନିମୟ କରନ୍ତି, ତେବେ କରୋନା ସଂକ୍ରମିତ ହେବାର ଆଶଙ୍କା ରହିଛି। ନିଜ ସାଥୀମାନଙ୍କୁ ସଂକ୍ରମିତ ନକରିବା ପାଇଁ ଦମ୍ପତିମାନଙ୍କୁ ଆଣ୍ଟିଜେନ ପରୀକ୍ଷା କରିବାକୁ ସ୍ବାସ୍ଥ୍ୟ ବିଭାଗ ପରାମର୍ଶ ଦେଇଛି।
ମୁହାଁମୁହିଁ ସ୍ଥିତିକୁ ଏଡ଼ାଇବାକୁ ଏବଂ ଦୀର୍ଘ ସମୟ ଚୁମ୍ବନ ନକରିବାକୁ ଏବଂ ଅବାଞ୍ଛିତ ଗର୍ଭଧାରଣକୁ ଏଡାଇବା ପାଇଁ ଗର୍ଭନିରୋଧକ ପଦକ୍ଷେପ ମଧ୍ୟ ବ୍ୟବହାର କରିବାକୁ ସ୍ବାସ୍ଥ୍ୟ ନିର୍ଦ୍ଦେଶକ ପ୍ରେମୀଯୁଗଳଙ୍କୁ ପରାମର୍ଶ ଦେଇଛନ୍ତି। ଭାଲେଣ୍ଟାଇନ୍ସ ଦିବସକୁ ଥାଇଲାଣ୍ଡରେ ଏକ ଅତି ପବିତ୍ର ଦିନ ଭାବରେ ବିବେଚନା କରାଯାଏ ଏବଂ ଏହି ଦିନ ବିବାହ କରିବା ପାଇଁ ବିଶ୍ୱର ବିଭିନ୍ନ ସ୍ଥାନରୁ ଲୋକମାନେ ଏଠାରେ ପହଞ୍ଚନ୍ତି। ରାଜଧାନୀ ବ୍ୟାଙ୍କକର ବେଙ୍ଗ ରାକ ଜିଲା ଏହି ଅବସରରେ ‘ପ୍ରେମର ଜିଲା’ ରେ ପରିଣତ କରାଯାଇଥାଏ।
