କୋରାପୁଟ,୧୨।୧(ସ୍ବ.ପ୍ର.) – ଆଦିବାସୀ ମହିଳାଙ୍କୁ ସ୍ୱାବଲମ୍ବୀ କରିବା ଉଦ୍ଦେଶ୍ୟରେ ସମନ୍ଵିତ ଆଦିବାସୀ ଉନ୍ନୟନ ସଂସ୍ଥା ସହାୟତାରେ ଜିଲାର ପଟ୍ଟାଙ୍ଗି ବ୍ଲକର କୋଟିଆ ପଞ୍ଚାୟତର ଡୋଲିଆମ୍ବ ଗ୍ରାମରେ ଆରମ୍ଭ ହୋଇଛି ଷ୍ଟ୍ରବେରି ଚାଷ। ଜିଲାପାଳ ଅବଦଲ ଏମ. ଅଖତାରଙ୍କ ନିର୍ଦ୍ଦେଶରେ ପିଏ ଆଇଟିଡିଏ କାରୁ ସୋରେନଙ୍କ ତତ୍ୱାବଧାନରେ କୋଟିଆର ଡୋଲିଆମ୍ବ ଗ୍ରାମର ୩ଟି ଆଦିବାସୀ ସ୍ବୟଂ ସହାୟିକା ମହିଳା ଗୋଷ୍ଠୀଙ୍କୁ ନେଇ ଗ୍ରାମର ୫ ଏକର ଜମିରେ ଏହି ଚାଷ ଆରମ୍ଭ କରାଯାଇଛି। ଏଥିରେ ପ୍ରାୟ ୪୫ ହଜାର ଷ୍ଟ୍ରବେରି ଗଛ ଲାଗିଛି । ଧାଡ ଧାଡି କରି ଚାରା ରୋପଣ କରାଯାଇ ଏହା ଉପରେ ପଲିଥିନ ଘୋଡାଯାଇଛି। ଚାଷୀ ଭାର୍ଗବ ଲାକେଇଙ୍କ ସହ ଆଇଟିଡିଏର ମିଳିତ ସହଯୋଗରେ ଏହି ଚାଷ କରାଯାଉଛି। ଆସନ୍ତା ୪୫ରୁ ୬୦ ଦିନ ମଧ୍ୟରେ ଏହା ଅମଳ ହେବ। ଏକରପ୍ରତି ପ୍ରାୟ ୨ ହଜାରରୁ ୫ହଜାର କେଜି ଷ୍ଟ୍ରବେରି ଅମଳ ହେବ ବୋଲି ଆଶା କରାଯାଉଛି।ଆଗାମୀ ଦିନରେ ଭଲ ପରିବେଶ ରହିଲେ ଲକ୍ଷ୍ୟଧାର୍ଯ୍ୟ ପୂରଣ ହୋଇପାରିବ ବୋଲି ଆଇଟିଡିଏର କାର୍ଯ୍ୟକ୍ରମ ଅଧିକାରୀ କାଶିପ୍ରସାଦ ନାୟକ କହିଛନ୍ତି।
