ପାରଳାଖେମୁଣ୍ଡି, ୧୫।୩ (ଡି.ଏନ୍.ଏ): ଚାଷକାର୍ଯ୍ୟକୁ ଆପଣେଇ ସ୍ବାବଲମ୍ବୀ ହୋଇପାରିଛନ୍ତି ଗଜପତି ଜିଲା ମୋହନ ବ୍ଲକ ବେଲପଡ଼ା ଗ୍ରାମର ଏକ ଚାଷୀ ଦମ୍ପତି। ଷ୍ଟ୍ରବେରୀ ଚାଷ କରି ଜିଲାରେ ନିଜର ପରିଚୟ ସୃଷ୍ଟି କରିପାରିଛନ୍ତି। ଆଦିବାସୀ ଅଧ୍ୟୁଷିତ ଦୁର୍ଗମ ପାହାଡ଼ରେ ପରିଶ୍ରମ କରି ଫଳାଇ ପାରିଛନ୍ତି ଷ୍ଟ୍ରବେରୀ ଆଉ ଥାଇଲାଣ୍ଡ ବରକୋଳି ଭଳି ମୂଲ୍ୟବାନ ଫଳ ସାଙ୍ଗକୁ ଅନେକ ପ୍ରକାରର ଫୁଲ ଆଉ ପନିପରିବା। ଏହାକୁ ବିକ୍ରି କରି ଭଲ ରୋଜଗାର ମଧ୍ୟ କରିପାରୁଛନ୍ତି। ପଥୁରିଆ ପାହାଡ଼ ଉପରେ ଥାକ ଥାକ କରି କଳା ପଲିଥିନରେ ଧାଡ଼ି ଧାଡ଼ି କରି ଲଗାଇଛନ୍ତି ଷ୍ଟ୍ରବେରୀ ଗଛ । ଏହି ଦମ୍ପତି ହେଉଛନ୍ତି ମୋହନା ବ୍ଲକ ବେଲପଡା ଗାଁର ରମେଶ ମଲ୍ଲିକ ଓ ତାଙ୍କ ସ୍ତ୍ରୀ ସବିତା ମଲ୍ଲିକ। ରାତି ପାହିଲେ ଏମାନେ ଲାଗି ପଡନ୍ତି କୃଷି କାର୍ଯ୍ୟରେ। ରମେଶ କୁହନ୍ତି, ସେ ୟୁଟ୍ୟୁବ ଦେଖି ଏହି ଚାଷ ଶିଖିଛନ୍ତି । ସାଙ୍ଗ ସାଥି ସହ ଯୋଗାଯୋଗ କରି ହିମାଚଳ ପ୍ରଦେଶରୁ ଚାରା ଆଣି ବର୍ତ୍ତମାନ ଏକ ହଜାର ଚାରା ରୋପଣ କରିଛନ୍ତି। ଷ୍ଟ୍ରବେରୀ ଏବେ ପ୍ରଥମ କରି ଅମଳ ହେଉଥିବାରୁ କିଲୋ ୨ ଶହରୁ ୨୫୦ ଟଙ୍କା ପର୍ଯ୍ୟନ୍ତ ଦିନକୁ ଦୁଇରୁ ତିନି କେଜି ପର୍ଯ୍ୟନ୍ତ ବିକ୍ରି କରୁଥିବା ବେଳେ କାମରେ ସ୍ତ୍ରୀ ସବିତା ବହୁତ ସହଯୋଗ କରୁଥିବା କହିଛନ୍ତି। ସବିତା ସ୍ବାମୀଙ୍କ ଏଭଳି ଚାଷ ଦେଖି ବେଶ ଖୁସି ଥିବା ସହ ଅନ୍ୟମାନେ ମଧ୍ୟ ଏଭଳି ଚାଷ କରି ଲାଭବାନ ହୁଅନ୍ତୁ ବୋଲି କହିଛନ୍ତି। ରମେଶ ଜିଲାରେ ପ୍ରଥମ କରି ପାହାଡ଼ ଅଞ୍ଚଳରେ ଷ୍ଟ୍ରବେରୀ ଚାଷ କରି ଅନ୍ୟ ଚାଷୀମାନଙ୍କ ପାଇଁ ଉଦାହରଣ ପାଲଟିଛନ୍ତି। କେବଳ ଷ୍ଟ୍ରବେରୀ ଚାଷରେ ସୀମିତ ନୁହନ୍ତି, ପ୍ରାୟ ତିନି ଏକର ପାହାଡ଼ ଅଞ୍ଚଳରେ ହଜାର ହଜାର ସଂଖ୍ୟାରେ ଥାଇଲାଣ୍ଡ ବେରି ବା ବରକୋଳି ଚାଷ କରି ବେଶ ଲାଭବାନ ହେଉଥିବା ବେଳେ ବଗିଚାରେ ରକ୍ତ ଚନ୍ଦନ, ଫୁଲ ଛାଞ୍ଚୁଣୀ, ତେଜପତ୍ର, ବିଭିନ୍ନ ପ୍ରଜାତିର ଆମ୍ବ, ଧନିଆ ଲଙ୍କା, ହଳଦୀ, ପଣସ, ମନ୍ଦାରଫୁଲ, ବେଲ ସହ ବିଭିନ୍ନ ପ୍ରକାରର ଫୁଲଚାଷ ମଧ୍ୟ କରିଛନ୍ତି। କୁଣ୍ଡରେ ପାଣି ଗଛିତ ରଖି ମୋଟର ସାହାଯ୍ୟରେ ପାଇପ ଦ୍ୱାରା ଜଳସେଚନ କରୁଛନ୍ତି । ବାପା ସଞ୍ଜୟ ମଲ୍ଲିକ ମଧ୍ୟ ଜଣେ ଛୋଟିଆ ପନିପରିବା ଚାଷୀ, ପୁଅର ଏଭଳି ଚାଷ ଦେଖି ବେଶ ଖୁସିଥିବା କହିଛନ୍ତି । ଏସବୁ ଖର୍ଚ୍ଚ ନିଜେ ନିଜର ପ୍ରଚେଷ୍ଟାରେ କରିଥିବା ବେଳେ ସରକାର ସହାୟତା ମିଳିଲେ ଆହୁରି ଆଗକୁ ଯାଇପାରନ୍ତେ ବୋଲି ଆଶାରଖି ସରକାର କିଛି ସହଯୋଗ କରନ୍ତୁ ବୋଲି ରମେଶ କହିଛନ୍ତି ।
