ଅଜବ ପ୍ରସ୍ତାବ

ଏକଦା ପ୍ରଶଂସାରେ ପୋତି ଦିଆଯାଉଥିବା ମହାରାଷ୍ଟ୍ର ପୋଲିସ୍‌ର ଆଣ୍ଟି ଟେରରିଜମ୍‌ ସ୍କ୍ବାଡ୍‌ (ଏଟିଏସ୍‌) ଏବେ ତା’ ଚମକ ହରାଇବା ଭଳି ଜଣାପଡ଼ୁଛି। ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେଙ୍କ ନେତୃତ୍ୱାଧୀନ ମହାବିକାଶ ଅଘାଡ଼ି (ଏମ୍‌ଭିଏ) ଏବଂ ଭାଜପା ଶାସିତ କେନ୍ଦ୍ର ସରକାରଙ୍କ ମଧ୍ୟରେ ଲାଗି ରହିଥିବା ରାଜନୈତିକ ବିବାଦ ମଧ୍ୟରେ ଗତ କିଛିବର୍ଷ ହେବ ଏହାକୁ ଅଣାଯାଇଥିଲା ବୋଲି ବହୁ ବରିଷ୍ଠ ପୋଲିସ ଅଧିକାରୀଙ୍କ ବିଶ୍ୱାସ ରହିଛି। ତୀବ୍ର ରାଜନୈତିକ ବିବାଦ ଭିତରେ ଏବେ କିଛି ହାଇ ପ୍ରୋଫାଇଲ ମାମଲା ରହିଥିବାବେଳେ ରାଜ୍ୟରେ ଅନେକ ପୋଲିସ ଅଧିକାରୀ ଏଟିଏସ୍‌ ପ୍ରତି ଆଗ୍ରହ ପ୍ରକାଶ କରୁ ନ ଥିବା ମନେହେଉଛି। ଏଟିଏସ୍‌ରେ ବହୁ ପଦବୀ ଖାଲି ରହିଛି। ସେଗୁଡ଼ିକ ମଧ୍ୟରୁ ଅଳ୍ପ କିଛି ପଦବୀ ପୂରଣ କରିବା ଲାଗି ଏବେ ରାଜ୍ୟ ପୋଲିସ ମହା ନିର୍ଦ୍ଦେଶକ (ଡିଜିପି) ସଞ୍ଜୟ ପାଣ୍ଡେ ଆଗକୁ ବଢ଼ିଛନ୍ତି ଓ ଏଟିଏସ୍‌ ମୁମ୍ବାଇରେ ସୁପରିଣ୍ଟେଣ୍ଡେଣ୍ଟ ପାଇଁ ଦୁଇଟି ପଦବୀ ଫାଙ୍କା ରହିଥିବା ମେସେଜ ଫେସ୍‌ବୁକରେ ପୋଷ୍ଟ୍‌ କରିଛନ୍ତି। ପାଣ୍ଡେଙ୍କ ଏଭଳି କାର୍ଯ୍ୟରେ ସମସ୍ତେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଆଗ୍ରହୀ ପ୍ରାର୍ଥୀମାନେ ବିଭାଗକୁ ଆବେଦନ କରିବାକୁ କିମ୍ବା ଫେସ୍‌ବୁକରେ ତାଙ୍କ ସହ ଯୋଗାଯୋଗ କରିବା ଲାଗି ସେ ଅନୁରୋଧ କରିଛନ୍ତି। ସେହିପରି ରାଜ୍ୟର ଏଟିଏସ୍‌ ମୁଖ୍ୟ ବିନିତ ଅଗ୍ରଓ୍ବାଲ ମଧ୍ୟ ସ୍କ୍ବାଡ୍‌ ପାଇଁ ଅଧିକ ଅଧିକାରୀଙ୍କୁ ନିଯୁକ୍ତ କରିବା ଲାଗି ରାଜ୍ୟ ସରକାରଙ୍କୁ ଲେଖିଛନ୍ତି। ଯଦିଓ ଏଟିଏସ୍‌ରେ ନିଯୁକ୍ତ ହେବା ଏକ ସମ୍ମାନର ବିଷୟ, ତଥାପି ପାଣ୍ଡେ ଅଧିକାରୀମାନଙ୍କୁ ଏଥିପ୍ରତି ଆକର୍ଷିତ କରିବା ଲାଗି ଭତ୍ତା ଆକାରରେ ଅଧିକ ୨୫ ପ୍ରତିଶତ ଦରମା ଦେବା ଲାଗି ପ୍ରସ୍ତାବ ଦେଇଛନ୍ତିି। ତାଙ୍କ କଥାରୁ ଜଣାପଡୁଛି ଯେ, ସୋସିଆଲ ମିଡିଆରେ ଦରଖାସ୍ତ କରିବା ଲାଗି ତାଙ୍କ ଅଣପରମ୍ପରାଗତ ତଥା ଅଜବ ପ୍ରସ୍ତାବ ବା ଦୃଷ୍ଟିକୋଣ ପୋଲିସ ଅଧିକାରୀମାନଙ୍କୁ ଉତ୍ସାହିତ କରିବାରେ ବିଫଳ ହୋଇଛି।
ମୂଲ୍ୟ ଦେବାକୁ ପଡ଼ିଲା
କେରଳର ରାଜ୍ୟପାଳ ଅରିଫ୍‌ ମହମ୍ମଦ ଖାନ୍‌ ଏବଂ ମୁଖ୍ୟମନ୍ତ୍ରୀ ପିନାରୟୀ ବିଜୟନଙ୍କ ମଧ୍ୟରେ ଲାଗିଥିବା ବିବାଦରେ ଏବେ ପୂର୍ଣ୍ଣଚ୍ଛେଦ ପଡ଼ିଛି। କିନ୍ତୁ କିଛି ସମୟ ପାଇଁ ଏହା ଏକ ଅଦ୍ଭୁତ ସ୍ଥିତି ସୃଷ୍ଟି କରିଥିଲା, ଯେଉଁଥିରେ ଖାନ୍‌ ରାଜ୍ୟ ବିଧାନସଭାରେ ରାଜ୍ୟପାଳଙ୍କ ଅଭିଭାଷଣରେ ସ୍ବାକ୍ଷର କରିବାକୁ ମନା କରିଦେଇଥିଲେ। ଏଭଳି ସ୍ଥିତିରେ ମୁଖ୍ୟମନ୍ତ୍ରୀ ବିଜୟନ ତାଙ୍କ ଦାବିରୁ ଓହରିବାକୁ ବାଧ୍ୟ ହୋଇଥିଲେ। ତେବେ ଆଉ ଏକ ବିବାଦରେ ଜଣେ ବାବୁଙ୍କୁ ବହୁମୂଲ୍ୟ ଦେବାକୁ ପଡ଼ିଲା। ସାଧାରଣ ପ୍ରଶାସନ ବିଭାଗ(ଜିଏଡି)ର ପ୍ରମୁଖ ସଚିବ କେ.ଆର୍‌. ଜ୍ୟୋତିଲାଲଙ୍କୁ ବଦଳି କରାଯାଇଛି। ରାଜ୍ୟପାଳଙ୍କ ଅତିରିକ୍ତ ପିଏ ଭାବେ ଭାଜପା ନେତା ହରି କର୍‌ଥାଙ୍କ ନିଯୁକ୍ତି ଅର୍ଡର ସେ ରାଜ୍ୟପାଳଙ୍କ ନିକଟକୁ ପଠାଇଥିବାରୁ ଖାନ୍‌ ଏହାକୁ ନେଇ ଅସନ୍ତୋଷ ପ୍ରକାଶ କରିଥିଲେ। ରାଜ୍ୟପାଳଙ୍କ ଇଚ୍ଛା ଅନୁଯାୟୀ କର୍‌ଥାଙ୍କ ନିଯୁକ୍ତିକୁ ସରକାର ଅନୁମୋଦନ କରିଥିଲେ ବୋଲି ଏହି ଅର୍ଡରରେ ଉଲ୍ଲେଖ କରାଯାଇଥିବା ଜଣାପଡ଼ିଛି। ଅନ୍ୟପଟେ ରାଜଭବନରେ ରାଜନେତାଙ୍କ ନିଯୁକ୍ତିର ଦୃଷ୍ଟାନ୍ତ ପୂର୍ବରୁ ନ ଥିଲା ବୋଲି କୁହାଯିବାରୁ ଏଥିତ୍ରେ ମୁଖ୍ୟମନ୍ତ୍ରୀ ମଧ୍ୟ ଅସନ୍ତୋଷ ବ୍ୟକ୍ତ କରିଥିତ୍ଲେ। ରାଜ୍ୟପାଳ ଏହାକୁ ଏକ ଅପମାନ ବୋଲି ଭାବିଲେ ଏବଂ ତାଙ୍କୁ ଶାନ୍ତ କରିବା ଲାଗି ମୁଖ୍ୟଶାସନ ସଚିବ ଭି.ପି. ଜୟଙ୍କ ହସ୍ତକ୍ଷେପ ଦରକାର ପଡ଼ିଲା। ଏପରି କି ବିଜୟନଙ୍କୁ ଏହି ଘଟଣାକୁ ଆଉ ଖରାପ ନ କରିବାକୁ ବୁଝାଇବାକୁ ପଡ଼ିଲା। ଏହି ବିବାଦକୁ ସହଜରେ ଟାଳିବା ଲାଗି ଜିଏଡିରୁ ଜ୍ୟୋତିଲାଲଙ୍କ ବଦଳି ଏକ ପ୍ରୟାସ ଥିଲା ବୋଲିି କୁହାଯାଉଛି।
ଆଇଏଏସ୍‌ ଅଭାବ
ରାଜ୍ୟରୁ ଅଧିତ୍କ ଆଇଏଏସ୍‌ ଏବଂ ଆଇପିଏସ୍‌ ଅଧିକାରୀଙ୍କୁ କେନ୍ଦ୍ରୀୟ ଡେପୁଟେଶନରେ ନେବା ଲାଗି ଗତ ମାସରେ କେନ୍ଦ୍ର ସରକାର ଆଇଏଏସ୍‌ କ୍ୟାଡର ନିୟମ ସଂଶୋଧନ କରିବା ଲାଗି ଏକ ପ୍ରସ୍ତାବ ଆଣିଥିଲେ। ଏହା ଉପରେ ରାଜ୍ୟଗୁଡ଼ିକର ମତ ଚାହଁିଥିଲେ। ସରକାରଙ୍କ ଏହି ପଦକ୍ଷେପକୁ କର୍ନାଟକ ସମେତ ୧୧ଟି ରାଜ୍ୟ ବିରୋଧ କରିଥିଲେ। କିନ୍ତୁ କର୍ନାଟକ ଏବଂ କେନ୍ଦ୍ରରେ ଡବଲ ଇଞ୍ଜିନ ସରକାର ଚାଲିଥିବାରୁ କର୍ନାଟକ ଏବେ ତା’ମତ ବଦଳାଇଛି। ତେବେ କର୍ନାଟକରେ ୬୩ ଜଣ ଅଧିକାରୀଙ୍କ ଅଭାବ ରହିଛି; ଯାହା ଫଳରେ ଏବେ ରାଜ୍ୟରେ ଏକ ଅସ୍ବାଭାବିକ ସ୍ଥିତି ସୃଷ୍ଟି ହୋଇଛି, ଯେଉଁଥିରେ ଆଇଏଏସ୍‌ ଅଧିକାରୀମାନେ ଅନେକ ବିଭାଗର ଦାୟିତ୍ୱ ସମ୍ଭାଳୁଛନ୍ତି। ସହର ବିକାଶ ଏବଂ ଜଳ ସଂସାଧନ ମନ୍ତ୍ରଣାଳୟର ଅତିରିକ୍ତ ସଚିବ ରାକେଶ ସିଂ ମଧ୍ୟ କର୍ନାଟନ ମିଲ୍କ ଫେଡେରେଶନର ପରିଚାଳନା ନିର୍ଦ୍ଦେଶକ ଦାୟିତ୍ୱରେ ରହିଛନ୍ତି। ଏଭଳି ଆହୁରି ଅନେକ ଦୃଷ୍ଟାନ୍ତ ରହିଛି। ବାସବରାଜ ବୋମାଇ ସରକାର ତାଙ୍କର ପ୍ରଥମ ମତ ପରିବର୍ତ୍ତନ କରିବା ଓ କେନ୍ଦ୍ର ତା ପ୍ରସ୍ତାବ ଜାରି ରଖିବା ଯୋଗୁ ସ୍ଥିତି ଆହୁରି ଖରାପ ହେବ। କୁହାଯାଉଛି, କେନ୍ଦ୍ରରେ ଆଇଏଏସ୍‌ ଅଧିକାରୀଙ୍କ ଅଭାବ ରହିଥିବାରୁ ଏଭଳି ପ୍ରସ୍ତାବ ଆଣିବା ଲାଗିି ପ୍ରେରିତ କରିଛି।


Enter your email to get our daily news in your inbox.

All Right Reserved By Dharitri.Com

କରୋନା ବେଳେ ସ୍ରଷ୍ଟା ମାନସ

ଡ. ନିଖିଳାନନ୍ଦ ପାଣିଗ୍ରାହୀ ୯/୧୧ ଏକ ବିଶ୍ୱବିଦିତ ଦୁର୍ଘଟଣାର ଶିରୋନାମା ବହନ କରେ। ଯୁକ୍ତରାଷ୍ଟ୍ରର ନ୍ୟୁୟର୍କସ୍ଥିତ ମାନହଟନଠାରେ ଯେଉଁ ଆକର୍ଷଣୀୟ ଓ ବ୍ୟସ୍ତତମ ଟୁଇନ୍‌ ଟାଓ୍ବାର...

ଲିଙ୍ଗଗତ ପକ୍ଷପାତିତା କାହିଁକି

ଇଂ. ଶକ୍ତି ପ୍ରସାଦ ଦାସ ପ୍ରତିଭାବାନ୍‌ ମହିଳା ଓକିଲମାନଙ୍କୁ ବିଚାରପତି ପଦ ପାଇଁ ଅଣଦେଖା କରାଯାଉଛି ବୋଲି ‘ସୁପ୍ରିମକୋର୍ଟ ମହିଳା ଆଇନଜୀବୀ ସଙ୍ଘ’ର ଏକ ଆବେଦନ...

ଗୁଣିଗାରେଡ଼ିକୁ ରୋକିବା କେମିତି

ଭାଲଚନ୍ଦ୍ର ଷଡ଼ଙ୍ଗୀ ଗତ କିଛିଦିନ ହେଲା ରାଜ୍ୟରେ ଗୁଣିଗାରେଡ଼ି ଓ ଡାହାଣୀ ଜନିତ ଅପରାଧର ଅନେକ ଘଟଣା ଗଣମାଧ୍ୟମରେ ପ୍ରକାଶ ପାଇଛି। ଗତ ନଅ ମାସ...

ଔରଙ୍ଗଜେବଙ୍କ ଦୋଷ

ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କା ସବୁଦିନ ଖସିବାରେ ଲାଗିଛି। ଅର୍ଥାତ୍‌ ଡଲାର ତୁଳନାରେ ଟଙ୍କା ଦୁର୍ବଳ ହେବାରେ ଲାଗିଛି। କୁହାଯାଉଛି, ପ୍ରତ୍ୟେକ ଦିନ ଟଙ୍କା...

ଅର୍ଥନୀତିରେ ମହାନାୟକ ହୋଇପାରିବନି ଚାଇନା

ଡା. ଚିତ୍ତରଞ୍ଜନ ମିଶ୍ର ଚାଇନାର ‘ଏକ ସନ୍ତାନ ନୀତି’ ୧୯୭୯ ରେ ବରିଷ୍ଠ ନେତା ଡେଙ୍ଗ୍‌ ଜିଆଓପିଙ୍ଗ୍‌ଙ୍କ ଦ୍ୱାରା ପ୍ରଣୟନ କରାଯାଇଥିଲା। ଏହାର ମୂଳ ଉଦ୍ଦେଶ୍ୟ...

କେନୋପନିଷଦର ପ୍ରତିପାଦ୍ୟ ସିଦ୍ଧାନ୍ତ

ଡା. ଗୋପାଳ ଚନ୍ଦ୍ର ଦାଶ କେନୋପନିଷଦର ବିଷୟବସ୍ତୁ ବ୍ରହ୍ମ ସିଦ୍ଧାନ୍ତ ଉପରେ ପର୍ଯ୍ୟବସିତ। ଏହି ଉପନିଷଦର ମୁଖ୍ୟ ଆଲୋଚ୍ୟ ବିଷୟ ହେଉଛି ସଂସାରର ସମସ୍ତ ଜଡ଼...

ଏଇ ଭାରତରେ

ଚାକିରିରୁ ଅବସର ନେବା ପରେ ସମୟର କିଭଳି ସଦୁପଯୋଗ କରାଯାଏ ସେ କ୍ଷେତ୍ରରେ ଜଣେ ସେନା ଅଧିକାରୀଙ୍କ ପ୍ରୟାସ ବେଶ୍‌ ପ୍ରଶଂସନୀୟ। ଏହି ଅଧିକାରୀ ଜଣକ...

କଶ୍ମୀର ଚିନ୍ତା

ପିପୁଲ୍ସ ଡେମୋକ୍ରାଟିକ୍‌ ପାର୍ଟି (ପିଡିପି) ନେତ୍ରୀ ମେହବୁବା ମୁଫ୍‌ତି ୧୪ ମାସ ଅଟକ ରହିବା ପରେ ୧୪ ଅକ୍ଟୋବରରେ ମୁକ୍ତିଲାଭ କରିଥିଲେ। ଏହା ପରଠାରୁ ଜମ୍ମୁ...

Advertisement
Archives

Model This Week