ନଡ଼ାରେ ତିଆରି ବିଭିନ୍ନ କଳାକୃତି ପ୍ରଦର୍ଶନ କରି ରାଜ୍ୟ ଓ ରାଜ୍ୟ ବାହାରେ ବେଶ୍ ପ୍ରଶଂସିତ ହୋଇପାରିଛନ୍ତି ସେ । ଏଥିପାଇଁ ତାଙ୍କୁ ମିଳିଛି ଅନେକ ପୁରସ୍କାର ଆଉ ସମ୍ମାନ। ସେ ହେଲେ ପ୍ରଦୀପ୍ତ କୁମାର ନାୟକ, ପିତା ମୁରଲିଧର ନାୟକ, ମା’ କଲ୍ୟାଣୀ ନାୟକ। ଘର ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ଅନ୍ତର୍ଗତ ଜିରାଳ ଗାଁରେ । ସେ କୁହନ୍ତି, ମା’ବାପାଙ୍କୁ ଲୁଚାଇ ସ୍କୁଲ ବୟସରୁ ପାଠପଢ଼ା ସହିତ ରଫ୍ ଖାତା ଓ ଭେଲ୍ଭେଟ୍ କାଗଜ, ଦିଆସିଲି କାଠିକୁ ନେଇ ବିଭିନ୍ନ ଚିତ୍ର ତିଆରି କରୁଥିଲି । ଅନେକ ପରିତ୍ୟକ୍ତ ସାମଗ୍ରୀକୁ ନେଇ ବିଭିନ୍ନ କଳାକୃତି ଓ ଚିତ୍ର କରୁଥିଲି। ୧୯୮୯ରେ ହାଇସ୍କୁଲ ପଢ଼ା ସରିଲା ପରେ କଲେଜରେ ପଢିଲି। ସେହି ସମୟରେ ନଡ଼ାରେ ଚିତ୍ର କରିବାକୁ ମନସ୍ଥ କଲି। ଏଥିପାଇଁ ଧାନ ଅମଳ ସମୟରେ ନଡ଼ାକୁ ସଂଗ୍ରହ କରିବାକୁ ପଡ଼ିଥାଏ। କିଛିଦିନ ସେହି ନଡ଼ା ପାଣି ଖାଇଲା ପରେ ହଳଦିଆ ପଡ଼ିଯାଏ। ପରେ ସେହିନଡ଼ାକୁ ପରିଷ୍କାରକରି ସାଇଜ୍କରି କାଟି ରଖିଥାଏ। ନଡ଼ାର ଦୁଇଟି ରୂପ ରହିଛି – ଗୋଟିଏ ସୂକ୍ଷ୍ମଅଂଶକୁ ବ୍ଲେଡ୍ରେ ଚିରି ପଲିଶ୍ କରାଯାଏ, ଏହାକୁ ଫାଇବର କୁହନ୍ତି। କିନ୍ତୁ ଚିତ୍ରର ଆକାର ଅନୁସାରେ ସାଇଜ୍ ହୋଇ କଟାଯାଇଥିବା ନଡ଼ାକୁ ପାଣିରେ ଭିଜାଇ ଖରାରେ ଶୁଖାଇଥାଏ। ଡ୍ରଇଂ ଶିଟ୍ରେ ଅଙ୍କନ ହୋଇଥିବା ଚିତ୍ରକୁ ଟ୍ରେନ୍ସଂପେପର କିମ୍ବା ପିଚ୍ ବୋର୍ଡ ଫ୍ରେମ୍ରେ କଳାକପଡ଼ା ଉପରେ ଅଙ୍କିତ ଚିତ୍ରରେ ଆବଶ୍ୟକ ମୁତାବକ ନଡ଼ାର ବିଭିନ୍ନ ଅଂଶକୁ ଅଠା ସାହାଯ୍ୟରେ ଲଗାଯାଇଥାଏ। ଏଥିରେ କୌଣସି ରଙ୍ଗ ଦିଆଯାଇ ନ ଥାଏ। ଏହି ନଡ଼ାକଳାକୃତିକୁ ୧୯୯୩ରେ ବିହାରର ରାଞ୍ଚତ୍ଠାରେ ଆୟୋଜିତ ଜାତୀୟ ଶିଶୁକଳା କାର୍ଯ୍ୟକ୍ରମରେ ପ୍ରଦର୍ଶିତ କରିଥିଲି। ସେହିପରି ୧୯୯୪ରେ ଦୁର୍ଗାପୁରଠାରେ ଏକ୍ସପୋ-ସ୍ପେଶାଲ ଟ୍ରେଡ୍ ଫେୟାରରେ ନଡ଼ା ଚିତ୍ରକଳା ପ୍ରଦର୍ଶିତ କରାଯାଇଥିଲା। ୧୯୯୫ରେ ଢେଙ୍କାନାଳ ଲକ୍ଷ୍ମୀପୂଜା ଉପଲକ୍ଷେ କେନ୍ଦ୍ର ବୟନ ଶିଳ୍ପ ମନ୍ତ୍ରଣାଳୟ ଦ୍ୱାରା ଆୟୋଜିତ ପ୍ରଦର୍ଶନୀ ମେଳା, ପୁରୀ ବେଳାଭୂମି ମହୋତ୍ସବ, ୧୯୯୬ରେ ସିଲିଗୁଡ଼ିଠାରେ ଆୟୋଜିତ କେନ୍ଦ୍ର ବୟନ ଶିଳ୍ପ ମନ୍ତ୍ରଣାଳୟର ପ୍ରଦର୍ଶନୀ ମେଳାରେ ନଡ଼ା କଳାକୃତି ପ୍ରଦର୍ଶନ କରିବା ସହିତ ରାଜ୍ୟର ବିଭିନ୍ନ ସ୍ଥାନରେ ଆୟୋଜିତ ମେଳା ଓ ଉତ୍ସବରେ ଏହି କଳାକୃତିକୁ ପ୍ରଦର୍ଶିତ କରିଆସୁଛି। ଏବେ ଆମ ଜିରାଳ ଗ୍ରାମରେ ମା’ କଲ୍ୟାଣୀ ନଡ଼ା କଳା ତାଲିମ କେନ୍ଦ୍ର ଖୋଲି ଶତାଧିକ ଯୁବତୀ ଓ ମହିଳାଙ୍କୁ ତାଲିମ ଦେଉଛି। ବିଭିନ୍ନ ହସ୍ତକଳା ପ୍ରଦର୍ଶନୀରେ ନଡ଼ାରେ ତିଆରି ବିଭିନ୍ନ ଦେବୀଦେବଙ୍କ ଚିତ୍ର, ନାନା ପ୍ରଜାତିର ପକ୍ଷୀ, ଜୀବଜନ୍ତୁ, ଗଛ, ଫୁଲ ଫଳ ଆଦି କଳାକୃତିକୁ ତିଆରିକରି ପ୍ରାୟ ୨ଶହଟଙ୍କାରୁ ଆରମ୍ଭକରି ଲକ୍ଷାଧିକ ଟଙ୍କା ପର୍ଯ୍ୟନ୍ତ ମୂଲ୍ୟରେ ଏହି ନଡ଼ାତିଆରି କଳାକୃତିକୁ ବିକ୍ରି କରାଯାଇଥାଏ। ଆମ ରାଜ୍ୟର ହସ୍ତକଳାକାରିଗରିରେ ଏହି ନଡ଼ାକଳା ଭିନ୍ନ ପରିଚୟସୃଷ୍ଟି କରିପାରିଛି।
