ଚଣ୍ଡିଖୋଲ,୨୯ା୧୧(ଡି.ଏନ.ଏ.): ଯାଜପୁର ଜିଲା ବଡ଼ଚଣା ଥାନା ଅନ୍ତର୍ଗତ ଦର୍ପଣଗଡ଼ ଗ୍ରାମର ଗ୍ରାମ ଦେବତୀ ମା’କୋଟ୍ରାକ୍ଷୀଙ୍କ ଚୋରି ହୋଇଥିବା ଅଷ୍ଟଧାତୁ ମୂର୍ତ୍ତି ଦିଲ୍ଲୀରୁ ଜବତ କରାଯାଇଛି। କିଛିଦିନ ତଳେ ଦିଲ୍ଲୀ ଏୟାର ପୋର୍ଟରୁ ଏହି ମୂର୍ତ୍ତି ଜବତ ହୋଇଥିବା ନ଼େଇ ସୋମବାର ଚଣ୍ଡିଖୋଲ କୋର୍ଟର ଆଇନଜୀବୀ ଉଦୟନାଥ ସାହୁ ଦାବି କରିଛନ୍ତି। ଏ ସମ୍ପର୍କରେ ବଡ଼ଚଣା ଥାନା ଅଧିକାରୀ ସୁଶୀଲ କୁମାର ନାୟକ କହିଛନ୍ତି, ଦେଢ଼ ମାସ ତଳେ ଏକ ମୂର୍ତ୍ତି ଦିଲ୍ଲୀ ଏୟାର ପୋର୍ଟରୁ ଜବତ ହୋଇଥିଲା। ସେ ନେଇ ଆମ ପାଖକୁ ଖବର ଆସିଥିଲା। ଆମେ ଦର୍ପଣ ଗଡ଼ରୁ ଚୋରି ହୋଇଥିବା ମୂର୍ତ୍ତିର ଫୋଟୋ ପଠାଇଥିଲୁ। ହେଲେ ଏ ପର୍ଯ୍ୟନ୍ତ ଆମକୁ କୌଣସି ଖବର ଆସିନାହିଁ।
ସୂଚନାଥାଉକି, ଏହି ମୂର୍ତ୍ତି ଚୋରି ସମୟରେ ପୋଲିସ ବିଭିନ୍ନ ସ୍ଥାନରେ ଖୋଜି ଥିଲେ ମଧ୍ୟ ପାଇ ନ ଥିଲା। ମୂର୍ତ୍ତିଟି ଅଷ୍ଟ ଧାତୁ ନିର୍ମିତ ହୋଇଥିବା ବେଳେ ଏହାର ମୂଲ୍ୟ କୋଟିଏରୁ ଅଧିକ ଟଙ୍କା ହେବ। ୨୦୦ବର୍ଷ ତଳେ ମୂର୍ତ୍ତିଟି ସ୍ଥାପନ କରାଯାଇଥିଲା। ସାହୁଙ୍କ କହିବାକଥା, ଏହି ମୂର୍ତ୍ତିଟିକୁ ବିଦେଶ ଚାଲାଣ ସମୟରେ ଦିଲ୍ଲୀ ବିମାନ ବନ୍ଦରରେ ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା (ଏଏସ୍ଆଇ)ପକ୍ଷରୁ ଜବତ କରଯାଇଛି। ଦୁର୍ବୃତ୍ତମାନେ ମୂର୍ତ୍ତିଟିକୁ ବିଦେଶ ଚାଲାଣ କରିବା ନିମନ୍ତେ କାର୍ଗୋରେ ବୁକ୍ିଂ କରି ସାରିଥିଲେ। ତେବେ ଏଥିପାଇଁ ଏଏସ୍ଆଇର ଏନ୍ଓସି ଆଣିବାର ନିୟମ ରହିଥିବା ବେଳେ ତାହା ନ ଥିବାରୁ ଏହାକୁ ଏଏସ୍ଆଇ ଜବତ କରିଥିଲା। ମୂର୍ତ୍ତି ଜବତ ପରେ ଯାଜପୁର ଏସ୍ପି ରାହୁଲ ପି.ଆର୍ଙ୍କୁ ଏଏସ୍ଆଇ ସୂଚନା ଦେଇଛି। ସୂଚନାଯୋଗ୍ୟ, ୨୦୨୧ ଜାନୁୟାରୀ ୧୧ରେ ଏହି ମୂର୍ତ୍ତି ଚୋରି ହୋଇଥିଲା।
