ରାୟପୁର,୪।୯: ଏକ ଶିବିରରେ ମାତ୍ର ୭ ଘଣ୍ଟାରେ ୧୦୧ ମହିଳାଙ୍କର ବନ୍ଧ୍ୟାକରଣ କରାଯାଇଛି। ଏଭଳି ଘଟଣା ଛତିଶଗଡ଼ର ରାୟପୁରଠାରୁ ୩୦୦ କିଲୋମିଟର ଦୂରରେ ଥିବା ମୈନପତ୍ ବ୍ଲକ୍ର ନର୍ମଦାପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଅଗଷ୍ଟ ୨୭ରେ ଘଟିଛି। ବନ୍ଧ୍ୟାକରଣ ଶିବିରରେ ଜଣେ ଡାକ୍ତରଙ୍କ ଦ୍ୱାରା କମ୍ ସମୟ ମଧ୍ୟରେ ଏତେ ସଂଖ୍ୟକ ମହିଳାଙ୍କ ବନ୍ଧ୍ୟାକରଣ ହୋଇଥିବା ସମ୍ପର୍କରେ ଅଭିଯୋଗ ଆସିବା ପରେ ସରକାର ଏନେଇ ତଦନ୍ତ ନିର୍ଦ୍ଦେଶ ଜାରି କରିଛନ୍ତି। ଡାକ୍ତର ଜିବନୁସ୍ ଇକ୍କାଙ୍କ ସହିତ ସ୍ଥାନୀୟ ବ୍ଲକ୍ ମେଡ଼ିକାଲ ଅଧିକାରୀ ଡ. ଆର୍.ଏସ୍. ସିଂଙ୍କୁ ଜବାବ ତଲବ କରାଯାଇଛି।
ତେବେ ଡାକ୍ତର ଇକ୍କା କହିଛନ୍ତି ଯେ, ମହିଳାମାନେ ବହୁ ଦୂରଦୂରାନ୍ତରୁ ଶିବିରକୁ ଆସିଥିଲେ। ସେମାନେ ଅଟକି ରହିବା ଭଳି କୌଣସି ସୁବିଧା ମଧ୍ୟ ନ ଥିଲା। ସେମାନେ ଘରକୁ ଫେରି ପୁଣି ଶିବିରକୁ ଆସିବା କଷ୍ଟକର ମଧ୍ୟ ଥିଲା ତେଣୁ ଏଭଳି ପଦକ୍ଷେପ ଗ୍ରହଣ କରାଯାଇଥିଲା। ସମ୍ପୃକ୍ତ ମହିଳାମାନଙ୍କ ସ୍ବାସ୍ଥ୍ୟବସ୍ଥାରେ କୌଣସି ଅସୁବିଧା ହୋଇ ନାହିଁ।
ତେବେ ସରକାରୀ ନିର୍ଦ୍ଦେଶ ଅନୁସାରେ ଗୋଟିଏ ଦିନରେ ୩୦ ଜଣ ମହିଳାଙ୍କ ବନ୍ଧ୍ୟାକରଣ କରାଯିବା ଆବଶ୍ୟକ। ମାତ୍ର ଡାକ୍ତର ଜଣକ ଏହାର ତିନିଗୁଣାରୁ ଅଧିକ ଅପରେଶନ୍ କରିଥିବା ଅଭିଯୋଗ ହୋଇଛି। ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମୁଖ୍ୟ ସଚିବ ଡ. ଆଲୋକ ଶୁକ୍ଲାଙ୍କ ଅନୁସାରେ ଏହା ଦ୍ୱାରା ସରକାରୀ ମାର୍ଗଦର୍ଶିକାର ଉଲ୍ଲଂଘନ ହୋଇଛି।
ପୂର୍ବରୁ ଅଗଷ୍ଟ ୨୯ରେ ଡ.ଇକ୍କାଙ୍କୁ ସୁରୁଗୁଜା ସିଏମ୍ଏଚ୍ଓ ବି.ଏସ୍. ସିସୋଦିଆ କାରଣ ଦର୍ଶାଅ ନୋଟିସ୍ ଜାରି କରିଥିଲେ। ସୂଚନାଯୋଗ୍ୟ, ବନ୍ଧ୍ୟାକରଣ ଅପରେଶନ୍ ମଧ୍ୟାହ୍ନ ୧୨ଟାଠାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା।
