ଯାଜପୁରରୋଡ,୨୪ା୪(ଡି.ଏନ.ଏ.): ବିଭିନ୍ନ ସମସ୍ୟାରେ ଜର୍ଜରିତ ହୋଇ ବିବାଦର ପରଧିରେ ରହିଛି ବ୍ୟାସନଗର ପୌରପରିଷଦ। ପୌରାଧ୍ୟକ୍ଷାଙ୍କ ନିର୍ବାହୀ ଅଧିକାରୀଙ୍କୁ ଫାଇଲ ପିଙ୍ଗା ଘଟଣା ହେଉ କି ସଫେଇ କର୍ମଚାରୀଙ୍କୁ ଦରମା ପ୍ରଦାନରେ ବିଳମ୍ବକୁ ନେଇ ବିବାଦରେ ପୌର ପରିଷଦ ରହିିଥିବାବେଳେ ସମସ୍ୟାରେ ଜର୍ଜରିତ ହେଉଛନ୍ତି ପୌରବାସୀ। ଏଭଳି ସ୍ଥିତିରେ ପୌରପରିଷଦର ବିଭିନ୍ନ ସ୍ଥାନରେ ଦିନତମାମ ଷ୍ଟ୍ରିଟ୍ ଲାଇଟ୍ ଜଳୁଥିବାବେଳେ ସନ୍ଧ୍ୟା ହେଲେ ଲାଇଟ୍ଗୁଡିକ ଲିଭିଯାଉଛି। ଫଳରେ ଅଞ୍ଚଳ ଅନ୍ଧକାରମୟ ହେଉଛି, ଯାହାର ପ୍ରମାଣ ଭାବେ ସହରର ପ୍ରମୁଖ ସ୍ଥାନ ଗୋପବନ୍ଧୁ ଛକରୁ ବ୍ୟାଙ୍କ ଷ୍ଟ୍ରିଟ୍, ଗୋପବନ୍ଧୁ ଛକରୁ ଷ୍ଟେଶନ ବଜାର ଅଞ୍ଚଳରେ ଦେଖାଯାଇଛି। ଏଠାରେ ସନ୍ଧ୍ୟା ପରଠାରୁ ଷ୍ଟ୍ରିଟ୍ ଲାଇଟଗୁଡ଼ିକ ଜଳୁ ନ ଥିବାରୁ ଏହା ଏକ ଅନ୍ଧାରୀ ଇଲାକା ଭାବେ ଜଣାପଡୁଛି। ଏହି ରାସ୍ତାଟି ଗୁରୁତ୍ୱପୂର୍ଣ୍ଣ ହୋଇଥିବାବେଳେ ଷ୍ଟ୍ରିଟ୍ ଲାଇଟ୍ ବନ୍ଦ ଦୁର୍ବୃତ୍ତଙ୍କୁ ଚୋରି କରିବାର ସୁବର୍ଣ୍ଣ ସୁଯୋଗ ଆଣିଦେଇଛି, ଯାହାକୁ ନେଇ ସରକାରଙ୍କ ଏହି ଷ୍ଟ୍ରିଟ୍ ଲାଇଟ ଯୋଜନା କାହା ସ୍ବାର୍ଥରେ ବୋଲି ପ୍ରଶ୍ନ ଉଠିଛି। ତେଣୁ ଏହାର ସମାଧାନ ଦିଗରେ ପୌର କର୍ତ୍ତୃପକ୍ଷ ତୁରନ୍ତ ଧ୍ୟାନ ଦେବାକୁ ସାଧାରଣରେ ଦାବି ହୋଇଛି। ଏନେଇ ପୌରପରିଷଦର ବିଦ୍ୟୁତ୍ ବିଭାଗ ପ୍ରମୁଖ ଶଶିକାନ୍ତ ଘଡ଼ାଇଙ୍କୁ ପଚାରିବାରେ ସେ କହିଛନ୍ତି, ମାଟି ତଳେ ଯାଇଥିବା ବିଦ୍ୟୁତ୍ କେବୁଲ କେତେକ ସ୍ଥାନରେ ଛିଡ଼ିଯାଇଛି। ଏସବୁର ମରାମତି ପରେ ବିଦ୍ୟୁତ୍ ସଂଯୋଗ କରାଯିବ। ଏଥିପାଇଁ କିଛି ଦିନ ସମୟ ଲାଗିବ।
