ବରଗଡ଼,୧୭ା୩(ପ୍ରେମାନନ୍ଦ ଖମାରୀ): ବରଗଡ଼ ଜିଲା ସୟାଁ ଖେଳ ପଡ଼ିଆରେ ସୋମବାର ରାଜ୍ୟସ୍ତରୀୟ କିଷାନ ମହାପଞ୍ଚାୟତ ଆରମ୍ଭ ହୋଇଛି। ଏଥିରେ ଭାରତୀୟ କିଷାନ ୟୁନିଅନର ପ୍ରବକ୍ତା ରାକେଶ ଟିକାୟତଙ୍କ ସମେତ ଆନେକ ରାଷ୍ଟ୍ରୀୟ ସ୍ତରୀୟ କୃଷକ ନେତା ଯୋଗଦାନ କରିଛନ୍ତି। ବରଗଡ଼ ଜିଲା ସଂଯୁକ୍ତ କୃଷକ ସଂଗଠନ ପକ୍ଷରୁ ଏହି ମହାପଞ୍ଚାୟତ ଆୟୋଜନ କରାଯାଇ ଥିବାବେଳେ ଅନେକ ଚାଷୀ, ସ୍ବେଚ୍ଛାସେବୀ, ସାମାଜିକ ସଂଗଠନ ଏଥିରେ ସାମିଲ ହୋଇଛନ୍ତି। ଖରା, ତାତି ସତ୍ତ୍ବେହଜାର ହଜାର ଚାଷୀଙ୍କ ସମାବେଶରେ ସୟାଁ ଖେଳ ପଡିଆ ଲୋକାରଣ୍ୟ ହୋଇ ପଡ଼ିଛି। ବର୍ତ୍ତମାନ ସରକାରଙ୍କ କୃଷିନୀତି ପ୍ରତିବାଦରେ ଏହି ମହାପଞ୍ଚାୟତ ଚାଲିଛି। ସରକାରଙ୍କ କୃଷିନୀତି ସମ୍ପୂର୍ଣ୍ଣ ଭାବରେ କମ୍ପାନୀ ଓ ପୁଞ୍ଜିପତିମାନଙ୍କୁ ସୁହାଉଛି। ଅନ୍ୟପକ୍ଷରେ ଯେଉଁ କୃଷକଙ୍କ ପାଇଁ ନୀତି ପ୍ରସ୍ତୁତ କରାଯାଉଛି,ସେମାନେ ଦିନକୁ ଦିନ ଗରିବ ଋଣଗ୍ରସ୍ତ ହୋଇ ଆତ୍ମହତ୍ୟା କରିବାକୁ ବାଧ୍ୟ ହେଉଛନ୍ତି ବୋଲି ସଂଗଠନ ଅଭିଯୋଗ କରିଛି। କମ୍ପାନୀମାନଙ୍କ ଲକ୍ଷ ଲକ୍ଷ କୋଟି ଟଙ୍କା ଛାଡ଼ କରାଯାଉଥିବା ବେଳେ ଚାଷୀମାନଙ୍କ ଋଣ ଛାଡ଼ କଲେ ସରକାର ଦେବାଳିଆ ହୋଇଯିବ ବୋଲି ସରକାର କହୁଛନ୍ତି।
ଅନ୍ୟପକ୍ଷରେ ପୁଞ୍ଜିପତିମାନେ ଯେତିକି ଟଙ୍କା ଋଣ ପରିଶୋଧ ନ କରି ବିଦେଶକୁ ପଳାୟନ କରିଛନ୍ତି, ସେତିକି ଟଙ୍କା ଋଣ ଚାଷୀମାନେ ନେଇ ନାହାନ୍ତି। କିନ୍ତୁ ଅନ୍ନଦାତା ବୋଲାଉଥିବା ଚାଷୀକୁଳ ପାଇଁ ଅମୃତକାଳରେ କେବଳ ବିଷ ମିଳୁଛି ବୋଲି ସଂଯୁକ୍ତ କୃଷକ ସଂଗଠନ ଉପଦେଷ୍ଟା ମଣ୍ଡଳୀ ଅଭିଯୋଗ କରିଛି। ସେହିପରି ସରକାରମାନେ ଅଧିକ ଅମଳ ପାଇଁ ଉନ୍ନତ ବିହନ,ରାସାୟନିକ ସାର ଓ ଅତ୍ୟାଧୁନିକ ଯନ୍ତ୍ରପାତି ବ୍ୟବହାର ପାଇଁ ପ୍ରୋତ୍ସାହିତ କରୁଥିବା ସ୍ଥଳେ ଚାଷୀ ମାନଙ୍କ ବିନିଯୋଗ ଅର୍ଥ ତୁଳନାରେ ବିକ୍ରି ମୂଲ୍ୟ କମ ମିଳୁଛି। ଚାଷୀ ମାନଙ୍କ ଉତ୍ପାଦିତ ସମସ୍ତ ଫସଲକୁ ସରକାର କ୍ରୟ ନ କରି ଏକ ତୃତୀୟାଂଶ କିଣୁଛନ୍ତି । ଯଦ୍ୱାରା ବଳକା ଶସ୍ୟକୁ ଚାଷୀ ଦଲାଲ ଏବଂ ବେପାରୀମାନଙ୍କୁ କମ ମୂଲ୍ୟରେ ବିକ୍ରି କରିବାକୁ ବାଧ୍ୟ ହେଉଛନ୍ତି। ବଜାର ବ୍ୟବସ୍ଥା, ଭିତ୍ତିଭୂମି ଓ ଶୀତଳ ଭଣ୍ଡାର ଅଭାବରୁ ଚାଷୀ କ୍ଷତିଗ୍ରସ୍ତ ଓ ଶୋଷଣ ର ଶିକାର ହେଉଛନ୍ତି। ଲଘୁବନଜାତ ଦ୍ରବ୍ୟ ଯଥା ଚାର, ମହୁଲ ପାଇଁ ମଣ୍ଡି ବ୍ୟବସ୍ଥା ତଥା ସହାୟକ ମୂଲ୍ୟ ନିର୍ଦ୍ଧାରଣ କରାଯାଇ ପାରୁନାହିଁ। ବିଭିନ୍ନ ସରକାରମାନେ ଜଳସେଚନ କଥା କହୁଥିବା ବେଳେ ଆଜି ପର୍ଯ୍ୟନ୍ତ ସମସ୍ତ ଚାଷ ଜମିକୁ ଜଳସେଚିତ କରିପାରି ନାହାନ୍ତି। ବରଗଡ଼ ଜ଼ିଲାର ୧୨ ବ୍ଲକ ମଧ୍ୟରୁ ୪ ବ୍ଲକ ସମ୍ପୂର୍ଣ୍ଣ ଜଳସେଚିତ ହୋଇଥିବା ବେଳେ ୮ବ୍ଲକ ଅଣ ଜଳସେଚିତ ଓ କ୍ରମାଗତ ମରୁଡ଼ିର ସମ୍ମୁଖୀନ ହୁଅନ୍ତି । ଠିକ ସମୟରେ ଫସଲବୀମା ପଇସା ନ ପାଇ ଚାଷୀମାନେ ଆନ୍ଦୋଳନ କରୁଛନ୍ତି । ଜଳସେଚନ ପାଇଁ ଅତ୍ୟଧିକ ବିଜୁଳି ବିଲ୍ ଦେଇ ଖର୍ଚ୍ଚାନ୍ତ ହେଉଛନ୍ତି ଏବଂ ବିଜୁଳି ବଳକା ରାଜ୍ୟରେ ବିଦ୍ୟୁତ ବିତରଣ କମ୍ପାନୀର ଶୋଷଣର ଶିକାର ହେଉଛନ୍ତି। ବିଭିନ୍ନ କମ୍ପାନୀ ର କୋଟି କୋଟି ଟଙ୍କା ବିଜୁଳି ବିଲ ଛାଡ଼ କରାଯାଉଥିବା ବେଳେ ଘରୋଇ ଉପଭୋକ୍ତା ଓ ଚାଷୀମାନଙ୍କ ପାଖରୁ ଜୋର ଜବରଦସ୍ତ ଅସୁଲି କରାଯାଉଛି ଏବଂ ନ ଦେଲେ ଲାଇନ କାଟି ଦେଉଛନ୍ତି । ନିର୍ବାଚନ ସମୟରେ ଦେଇଥିବା ୩୦୦ ୟୁନିଟ୍ ମାଗଣା ବିଦ୍ୟୁତ ପ୍ରତିଶ୍ରୁତି ଭୁଲି ଯାଇ ବର୍ତ୍ତମାନ ସୂର୍ଯ୍ୟଘର ଯୋଜନା ପାଇଁ ଋଣ କରିବାକୁ ପ୍ରୋତ୍ସାହିତ କରୁଛନ୍ତି। ଏଭଳି ଚାଷ ଓ ଚାଷୀ ସମସ୍ୟା ନେଇ ଅଭିଯୋଗ କରି ପାଇଁ ବରଗଡ଼ ସଂଯୁକ୍ତ କୃଷକ ସଂଗଠନ ଏହି କିଷାନ ମହାପଞ୍ଚାୟତ ଆୟୋଜନ କରିଛି।
