ଭାପୁର,୧୬।୬(ପ୍ରଭାତ ବରାଡ): ବ୍ଲକ ପ୍ରଶାସନକୁ ବାରମ୍ବାର ଅଭିଯୋଗ କରିବା ପରେ ପାନୀୟ ନପାଇ ୪୮ନଂ ରାଜ୍ୟ ରାଜପଥ ରାସ୍ତା ଉପରେ ଗରା, ବାଲ୍ଟି ରଖି ବିକ୍ଷୋଭ ପ୍ରଦର୍ଶନ। ଫଳରେ କଣ୍ଟିଲୋ ଠାରୁ ଫତେଗଡ ରାସ୍ତାରେ ଯାନବାହାନ ଯାତାୟତ ବାଧାପ୍ରାପ୍ତ ହୋଇଛି। ନୟାଗଡ ଜିଲା ଭାପୁର ବ୍ଲକ ବାଉଁଶବାଟି ଗାଁରେ ଦୀର୍ଘ ମାସେ ହେବ ପିଇବା ପାଣିର ଅଭାବ ଦେଖା ଦେଇଛି। ଏନେଇ ଭାପୁର ବ୍ଲକ ଅନ୍ତର୍ଗତ ବାଉଁଶବାଟୀ ପଞ୍ଚାୟତର ଶତାଧିକ ଗ୍ରାମର କିଛି ଯୁବକ ଓ ମହିଳା ୪୮ ନଂ ରାଜ୍ୟ ରାଜପଥ ଉପରେ ଗରା ମାଠିଆ ଥୋଇ ସକାଳ ସାତଟାରୁ ରାସ୍ତା ଅବରୋଧ କରିଥିଲେ। ଜଳ ଯୋଗାଣ ମାରଡା ଛକରେ ପାଣି ଥିବାବେଳେ ବାଉଁଶବାଟୀ ଗ୍ରାମକୁ ପାଇପ ଯୋଗେ ପାଣି ଆସୁନାହିଁ। ଫଳରେ ଲୋକମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଏନେଇ ସ୍ଥାନୀୟ ଜନ ପ୍ରତିନିଧି ଓ ବ୍ଲକ ବିଡ଼ିଓ ଶାରଦା ପ୍ରଶନ୍ନ ପଣ୍ଡାଙ୍କୁ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ କେବଳ ପ୍ରତିଶ୍ର୍ରୁତି ଦେବାପରେ ସେ ଏନେଇ କର୍ଣ୍ଣପାତ କରୁନାହାନ୍ତି । ଗ୍ରାମର ଏନେଇ ଆଜି ସକାଳୁ ରାସ୍ତା ଅବରୋଧ କରିଥିଲେ ବାଉଁଶବାଟୀ ଗ୍ରାମବାସୀ । ଘଟଣାସ୍ଥଳରେ ସ୍ଥାନୀୟ ସରପଞ୍ଚ ସୌମ୍ୟ ରଞ୍ଜନ ସାହୁ ଓ ଫତେଗଡ ଥାନାଧିକାରୀ ଅଜୟ କୁମାର ସାହୁ ପହଞ୍ଚି ବୁଝାସୁଝା କରିଥିଲେ ମଧ୍ୟ ଜନସାଧାରଣ ଜିଦରେ ଅଟଳ ରହି ରାସ୍ତାରୁ ଉଠି ନଥିଲେ। ସେମାନଙ୍କର ଗୋଟିଏ ଦାବି ଥିଲା ଘଟଣାସ୍ଥଳକୂ ଗୋଷ୍ଠୀ ଉନ୍ନୟନ ଅଧିକାରୀ ଆଜି ଲିଖିତ ଆକାରରେ ପ୍ରତିଶୃତି ଦେବାପରେ ରାସ୍ତାରୁ ହଟିବେ। ଡବଲ ଇଞ୍ଜିନ ସରକାର ବିରୋଧରେ ନାରାବାଜି ସ୍ଲୋଗାନ ଦେଇ ବସି ରହିଥିଲେ । ଘଟଣାସ୍ଥଳରେ ଭାପୁର ଗୋଷ୍ଠୀ ଉନ୍ନୟନ ଅଧିକାରୀ ଶାରଦା ପ୍ରଶନ୍ନ ପଣ୍ଡା ପହଞ୍ଚି ୧୫ ଦିନ ଭିତରେ ପାନୀୟ ଜଳ ଯୋଗାଇ ଦେବାପାଇଁ ପ୍ରତିଶ୍ର୍ରୁତି ପରେ ରାସ୍ତାରୋକୋ ସାଢ଼େ ଦଶଟାରେ ପ୍ରତ୍ୟାହୃତ ହୋଇଥିଲା। ଘଟଣାସ୍ଥଳରେ ଖଣ୍ଡପଡା ଏସଡିପିଓ ସୁଦିପ୍ତ କୁମାର ସାହୁ, ଫତେଗଡ ଥାନାଧିକାରୀ ଅଜୟ କୁମାର ସାହୁ, କଣ୍ଟିଲୋ ଫାଣ୍ଡି ଅଧିକାରୀ ସୱାଗତ ଦାଶ ଓ ପୋଲିସ କର୍ମଚାରୀ ଉପସ୍ଥିତ ରହିଥିଲେ।
