କଟକ ଅଫିସ,୩୦।୭: ରାଜ୍ୟ ବାର୍ କାଉନସିଲ ନିର୍ବାଚନ ମାମଲାରେ ହାଇକୋର୍ଟ ବାର୍ କାଉନ୍ସିଲ ଅଫ ଇଣ୍ଡିଆ (ବିସିଆଇ) ଓ ରାଜ୍ୟ ବାର୍ କାଉନସିଲ୍କୁ ଜବାବ ତଲବ କରି ନୋଟିସ ଜାରି କରିଛନ୍ତି। ଆବେଦନକାରୀ ରାଜ୍ୟ ବାର୍ କାଉନ୍ସିଲର ପୂର୍ବତନ ଅଧ୍ୟକ୍ଷ ଚିନ୍ମୟ ମହାନ୍ତି ଓ ପୂର୍ବତନ ସଦସ୍ୟ ସୀତାଂଶୁ ମୋହନ ଦ୍ୱିବେଦୀଙ୍କ ପିଟିଶନର ଶୁଣାଣି କରି ଜଷ୍ଟିସ ବିଶ୍ୱନାଥ ରଥ ବୁଧବାର ଏହି ରାୟ ଶୁଣାଇଛନ୍ତି। ଏହାର ପରବର୍ତ୍ତୀ ଶୁଣାଣି ଅଗଷ୍ଟ ୧୯ରେ ହେବ।
ଆବେଦନକାରୀ ପିଟିଶନରେ ଦର୍ଶାଇଥିଲେ, ରାଜ୍ୟ ବାର୍ କାଉନ୍ସିଲର ନିର୍ବାଚିତ ସଭ୍ୟମାନଙ୍କ କାର୍ଯ୍ୟକାଳ ୫ବର୍ଷ ରହିଛି ବୋଲି ଆଡ୍ଭୋକେଟ୍ ଆକ୍ଟର ଧାରା-୮ରେ ଉଲ୍ଲେଖ ରହିଛି। ରାଜ୍ୟ ସରକାରଙ୍କ ଗେଜେଟ୍ ନୋଟିଫିକେଶନ ଅନୁଯାୟୀ, ୨୦୧୪ ମେ’ ୫ରେ ୨୫ଜଣ ସଭ୍ୟ ରାଜ୍ୟ ଆଇନ ପରିଷଦକୁ ନିର୍ବାଚିତ ହୋଇଥିଲେ। ସେମାନଙ୍କ କାର୍ଯ୍ୟକାଳ ୨୦୧୯ ମେ’ ୪ ପର୍ଯ୍ୟନ୍ତ ବଳବତ୍ତର ରହିଥିଲା। ଏହିଦିନଠାରୁ ୬ମାସ ମଧ୍ୟରେ ରାଜ୍ୟ ବାର୍ କାଉନସିଲ ନିର୍ବାଚନ ନୋଟିଫିକେଶନ ଜାରି କରିବା ବ୍ୟବସ୍ଥା ଥିଲେ ମଧ୍ୟ କୌଣସି କାରଣରୁ ଏହା କରାଯାଇନାହିଁ। ଫଳରେ ରାଜ୍ୟ ବାର୍ କାଉନସିଲ୍ରେ ୨ବର୍ଷ ଧରି ଅଚଳାବସ୍ଥା ଲାଗି ରହିବାରୁ ୫୦ ହଜାର ଆଇନଜୀବୀ ନ୍ୟାଯ୍ୟ ଦାବିରୁ ବଞ୍ଚିତ ହେଉଛନ୍ତି। ତେଣୁ ଆଇନଜୀବୀମାନଙ୍କ ସାମ୍ବିଧାନିକ ସୁବିଧା ଏବଂ ରାଜ୍ୟ ବାର୍ କାଉନସିଲ ନିର୍ବାଚନ ପ୍ରକ୍ରିୟା ତ୍ୱରାନ୍ବିତ କରାଯିବାକୁ ନିବେଦନ କରି ଆବେଦନକାରୀ ଗତ ୨୩ ତାରିଖରେ ହାଇକୋର୍ଟରେ ଏକ ପିଟିଶନ ଦାଖଲ କରିଥିଲେ।
