କଟକ ଅଫିସ,୧୯ା୪: କଟକ ସଦର ସାମାଜିକ ଓ ସାଂସ୍କୃତିକ ସଂସଦ ଦ୍ୱାରା ଇଷାଣି ବ୍ରହ୍ମପୁର ପଞ୍ଚାୟତ ମଲ୍ଲୀପୁରର ମହାନଦୀପଠାରେ ‘ମହାନଦୀ ତଟୋତ୍ସବ’ ଅନୁଷ୍ଠିତ ହୋଇଯାଇଛି। ଏହି ମହୋତ୍ସବର ଚତୁର୍ଥ ସନ୍ଧ୍ୟାରେ ବିଶିଷ୍ଟ ଆଧ୍ୟାତ୍ମିକ ସ୍ତମ୍ଭକାର, ଲୋକପ୍ରିୟ ଆଧ୍ୟାତ୍ମିକ ପତ୍ରିକା ‘ଦିବ୍ୟାଲୋକ ସନ୍ଧାନେ’ର ସମ୍ପାଦକ ତଥା ପ୍ରବକ୍ତା (ଇଂ) ଶ୍ରୀସନ୍ନ୍ୟାସୀ ଜୀଙ୍କୁ ‘ଆଧ୍ୟାତ୍ମିକ ବ୍ୟକ୍ତିତ୍ୱ’ ସମ୍ମାନରେ ସମ୍ମାନିତ କରାଯାଇଛି। ପୂର୍ବତନ ସଦର ବିଧାୟକ ଚନ୍ଦ୍ରସାରଥୀ ବେହେରା ଶ୍ରୀସନ୍ନ୍ୟାସୀ ଜୀଙ୍କୁ ଉତ୍ତରୀୟ, ମାନପତ୍ର ଏବଂ ପୁଷ୍ପଗୁଚ୍ଛ ପ୍ରଦାନ କରି ସମ୍ବର୍ଦ୍ଧିତ କରିଥିଲେ l ଶ୍ରୀସନ୍ନ୍ୟାସୀ ବୃତ୍ତିରେ ଅଡ଼ଶପୁର କସର୍ଦାସ୍ଥିତ ଆପେକ୍ସ ଆଇଟିଆଇର ଅଧ୍ୟକ୍ଷ ଅଟନ୍ତି। ସେ ଅନେକ ଟିଭି ଚାନେଲ ଏବଂ ଆକାଶବାଣୀରେ ସମାଜକୁ ଆଧ୍ୟାତ୍ମିକ ମାର୍ଗ ଦର୍ଶନ ପ୍ରଦାନ କରି ଆସୁଛନ୍ତି। ଏତଦ୍ ବ୍ୟତୀତ ଅନେକ ପ୍ରତିଷ୍ଠିତ ଦୈନିକ ଖବରକାଗଜରେ ଆଧ୍ୟାତ୍ମିକ ସ୍ତମ୍ଭମାନ ରଚନା କରି ରାଜ୍ୟରେ ଯଥେଷ୍ଟ ପାଠକୀୟ ପ୍ରଶଂସା ମଧ୍ୟ ଅର୍ଜନ କରିଛନ୍ତି।
