କଲୋମ୍ବୋ, ୧୪।୪: ଘୋର ଆର୍ଥିକ ସଙ୍କଟ ଦେଇ ଗତି କରୁଛି ଭାରତର ପଡ଼ୋଶୀ ଦ୍ୱୀପ ରାଷ୍ଟ୍ର ଶ୍ରୀଲଙ୍କା। ଏଥିଯୋଗୁ ଦେଶବାସୀ ନାହିଁ ନ ଥିବା ଅସୁବିଧା ଦେଇ ଗତି କରୁଛନ୍ତି। ଦେଶର ଆର୍ଥିକ ସ୍ଥିତିରେ ସ୍ଥିରତା ଆଣିବା ପାଇଁ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ମଧ୍ୟ ଗ୍ରହଣ କରାଯାଇଛି। ବର୍ତ୍ତମାନ ସମୟରେ ଶ୍ରୀଲଙ୍କା ଚାଇନାକୁ ପାଖାପାଖି ୧ ଲକ୍ଷ ଟୋକ୍ ମାଙ୍କଡ଼ ବିକ୍ରି କରିବ ବୋଲି କୃଷିମନ୍ତ୍ରୀ ସୂଚନା ଦେଇଛନ୍ତି।
ଚାଇନାର ୧,୦୦୦ ଚିଡ଼ିଆଖାନାରେ ମାଙ୍କଡ଼ର ଆବଶ୍ୟକତା ଥିବାଯୋଗୁ ଶ୍ରୀଲଙ୍କା ସରକାରଙ୍କ ପକ୍ଷରୁ ଏ ପ୍ରକାର ପଦକ୍ଷେପ ଗ୍ରହଣ କରାଯାଇଥିବା କୃଷି ମନ୍ତ୍ରୀ ମହିନ୍ଦା ଅମରାଓ୍ବିରା ସୂଚନା ଦେଇଛନ୍ତି। ଏ ନେଇ ଏକ କମିଟି ମଧ୍ୟ ଗଠନ କରାଯାଇଛି। ଶ୍ରୀଲଙ୍କାରେ ବହୁଳ ସଂଖ୍ୟାରେ ଦେଖାଯାଉଥିବା ଟୋକ୍ ମାଙ୍କଡ଼କୁ ଅନ୍ତର୍ଜାତୀୟ ୟୁନିୟନ୍ ଫର୍ କଞ୍ଜର୍ଭେଶନ୍ ଅଫ୍ ନେଚର (ଆଇୟୁସିଏନ୍) ରେଡ୍ ଲିଷ୍ଟ ଭୁକ୍ତ କରିଥିଲା। ଏପରିସ୍ଥଳେ ସରକାରଙ୍କ ମାଙ୍କଡ଼ ବିକ୍ରି କରିବା ନିଷ୍ପତ୍ତି ନେଇ ପ୍ରକୃତି ସଂରକ୍ଷକ ଚିନ୍ତା ପ୍ରକଟ କରିଛନ୍ତି। ଆର୍ଥିକ ମାନ୍ଦାବସ୍ଥା ଦେଖାଯିବା ପରଠାରୁ ଶ୍ରୀଲଙ୍କାରେ ପ୍ରାଣୀ ରପ୍ତାନି ପ୍ରାୟତଃ ନିଷିଦ୍ଧ କରାଯାଇଛି।
ଦେଶରେ ଟୋକ୍ ମାଙ୍କଡ଼ଙ୍କୁ କୀଟ ସହିତ ତୁଳନା କରାଯାଉଛି। କାରଣ ଖାଦ୍ୟ ଅନ୍ବେଷଣରେ ମାଙ୍କଡ଼ ସବୁ ଗୋଟିଏ ଗୋଟିଏ ଗାଁ ଉପରେ ଚଢ଼ାଉ କରିବା ସହ ଅନେକ ସମୟରେ ମଣିଷଙ୍କୁ ଆକ୍ରମଣ କରୁଥିବା ଦେଖିବାକୁ ମିଳିଛି। ଫସଲ ନଷ୍ଟ କରିବାରେ ମଧ୍ୟ ଏମାନଙ୍କ ଭୂମିକା ରହିଛି। ଦେଶରେ ଆର୍ଥିକ ମାନ୍ଦାବସ୍ଥା ଦେଖାଯିବା ପରଠୁ ୩ ପ୍ରକାର ମାଙ୍କଡ଼ ସମେତ ମୟୂର, ବାର୍ହାଙ୍କୁ ସଂରକ୍ଷିତ ସୂଚୀରୁ ବାଦ୍ କରାଯାଇଛି ଏବଂ ସେମାନଙ୍କ ହତ୍ୟା ପାଇଁ କୃଷକଙ୍କୁ ଅନୁମତି ମିଳିଛି। ୪୦ ବର୍ଷରୁ ଊର୍ଦ୍ଧ୍ୱ ସମୟ ଧରି ଦେଶରେ ମାଙ୍କଡ଼ଙ୍କ ସର୍ଭେ କରାଯାଇ ନ ଥିବାବେଳେ ୧ ଲକ୍ଷ ମାଙ୍କଡ଼ଙ୍କୁ ଚାଇନା ପଠାଯିବା ନିଷ୍ପତ୍ତିକୁ ଶ୍ରୀଲଙ୍କାର ପ୍ରାଣୀ ଅଧିକାର ଗ୍ରୁପ୍ ‘ଦ ଏନ୍ଭାଇରନ୍ମେଣ୍ଟାଲ୍ ଫାଉଣ୍ଡେଶନ୍’ ପକ୍ଷରୁ ସମାଲୋଚନା କରାଯାଇଛି। ଅନ୍ୟପକ୍ଷେ ଚାଇନା ଏତେମାତ୍ରାରେ ମାଙ୍କଡ଼ ନେଇ କ’ଣ କରିବ ସେ ନେଇ ସ୍ପଷ୍ଟୀକରଣ ଦେବା ଲାଗି ଫାଉଣ୍ଡେଶନ୍ ପକ୍ଷରୁ ଦାବି କରାଯାଇଛି।
