କଲମ୍ବୋ,୨ ।୪: ଭାରତର ପଡୋଶୀ ଦେଶ ଶ୍ରୀଲଙ୍କାର ଅବସ୍ଥା ବେଳକୁ ବେଳ ଖରାପ ହେବାରେ ଲାଗିଛି । ସେଠାରେ ଏବେ ହସ୍ପିଟାଲରେ ଔଷଧ ମିଳୁନାହିଁ । ପେଟ୍ରୋଲ ଡିଜେଲର ସମସ୍ୟା ଦେଖାଦେବା ପରେ ଏବେ ପେଟ୍ରୋଲ ପମ୍ପରେ ସେନା ମୁତୟନ କରାଯାଇଛି । ତେବେ ୨୦୧୫ ପରେ ଶ୍ରୀଲଙ୍କାରେ ମହଙ୍ଗା ମାଡ ରେକର୍ଡ ଭାଙ୍ଗିଛି । ଏବେ ଲୋକେ ପନିପରିବା ଓ ସାଧାରଣ ଆବଶ୍ୟକ ସାମଗ୍ରୀ ପାଇଁ ବି ହଟହଟା ହେଉଛନ୍ତି ।
ଏଠାରେ ଦେଖାଦେଇଥିବା ବିଜୁଳି ସଙ୍କଟ ଯୋଗୁ ଟ୍ରେନ୍ ଓ ବସ ସେବା ବାଧାପ୍ରାପ୍ତ ହୋଇଛି । ଏଠାରେ ଏବେ ମହଙ୍ଗା ମାଡ ସବୁ ରେକର୍ଡ ଭାଙ୍ଗିଥିବା ବେଳେ ଲଙ୍କା କିଲୋର ଦାମ୍ ପହଞ୍ଚିଛି ୭୧୦ ଟଙ୍କାରେ । ସେହିପରି ଆଳୁ କିଲୋ ସାଧାରଣ ଜନତାଙ୍କ ପାଇଁ ୨୦୦ଟଙ୍କାରୁ ଅଧିକ ରହିଛି । ଏବେ ଶ୍ରୀଲଙ୍କାରେ ୧ ଲିଟର ପେଟ୍ରୋଲର ଦାମ ୨୫୪ ଟଙ୍କା ଥିବା ବେଳେ, ଲିଟର ପିଛା କ୍ଷୀରର ଦାମ ରହିଛି ୨୬୩ ଟଙ୍କା । ଗୋଟିଏ ପାଉଁରୁଟିର ଦାମ ୧୫୦ ଟଙ୍କାରେ ପହଞ୍ଚିଲାଣି ।
ଏହି ସମୟରେ ଶ୍ରୀଲଙ୍କାକୁ ସହଯୋଗର ହାତ ବଢାଇଛି ଭାରତ । ବୈଦେଶିକ ମୁଦ୍ରା ଅଭାବ ଯୋଗୁ ଗତ ସପ୍ତାହରେ ଭାରତ ୧ ଅରବ ଡଲାର ଆର୍ଥିକ ସହାୟତା ଦେଇଛି । ଜାନୁୟାରୀରୁ ଏବେ ପର୍ଯ୍ୟନ୍ତ ଭାରତ ଶ୍ରୀଲଙ୍କାକୁ ୨.୪ ବିଲିୟନ ଡଲାର ଆର୍ଥିକ ସହାୟତା ଯୋଗାଇ ସାରିଲାଣି ।
