ଭୁବନେଶ୍ୱର, ୬।୧୦:ରାଜ୍ୟର ପ୍ରମୁଖ ଘରୋଇ ସଂସ୍ଥା ତଥା ଲାଲଚାନ୍ଦ ଗ୍ରୁପ୍ର ସାମାଜିକ ପ୍ରତିଷ୍ଠାନ ଲାଲଚାନ୍ଦ୍ ଫାଉଣ୍ଡେଶନ ପକ୍ଷରୁ ଏକ ସ୍ବତନ୍ତ୍ର ଅଭିଯାନର ଶୁଭାରମ୍ଭ କରାଯାଇଛି। ଉଲ୍ଲେଖଯୋଗ୍ୟ, ଭାରତର ଯକ୍ଷ୍ମା ବିରୋଧୀ ଲଢ଼େଇରେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟ୍ ଯୋଗଦେଇ ‘ପ୍ରଧାନମନ୍ତ୍ରୀ ଟିବି ମୁକ୍ତ ଭାରତ ଅଭିଯାନ’ (ପିଏମ୍ଟିବିଏମ୍ଏ) ଅଧୀନରେ ଏକ ଉତ୍ସର୍ଗୀକୃତ ‘ନି-କ୍ଷୟ ମିତ୍ର’ ହୋଇପାରିଛି। ୨୦୨୨ ସେପ୍ଟେମ୍ବର ୯ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ଆରମ୍ଭ ହୋଇଥିବା ଏହି ମାନବଭିତ୍ତିିକ ପଦକ୍ଷେପର ଉଦ୍ଦେଶ୍ୟ ହେଉଛି, ସାମାଜିକ ସଙ୍ଗଠନ ଏବଂ ବିଭିନ୍ନ ଟ୍ରଷ୍ଟ୍ଙ୍କ ସହଭାଗିତାରେ ୨୦୨୫ ସୁଦ୍ଧା ସମଗ୍ର ଦେଶରୁ ଯକ୍ଷ୍ମା ଦୂରକରିବା। ସୂଚନାଯୋଗ୍ୟ, ୨୦୨୨ ଅକ୍ଟୋବର ୨୦ରେ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ନିମନ୍ତ୍ରଣ ମାଧ୍ୟମରେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟ୍ ଯକ୍ଷ୍ମା ବିରୋଧୀ ଲଢ଼େଇକୁ ଆବଶ୍ୟକ ସମର୍ଥନକରି ଅଂଶଗ୍ରହଣ ଆରମ୍ଭ କରିଥିଲା। ସେହିଭଳି ପିଏମ୍ଟିବିଏମ୍ଏର ଏସ୍ଓପି ଅନୁଯାୟୀ ଯକ୍ଷ୍ମା ରୋଗୀ, ବିଶେଷକରି ସମାଜର ଆର୍ଥିକ ଅନଗ୍ରସର ରୋଗୀଙ୍କ ନିମନ୍ତେ ଉପଯୁକ୍ତ ପୋଷଣ ସହାୟତା ଉପଲବ୍ଧ କରାଇବା ପାଇଁ ବିଏମ୍ସି ପକ୍ଷରୁ ଏକ ବିସ୍ତୃତ ଯୋଜନା ପ୍ରସ୍ତୁତ କରାଯାଇଛି। ଉକ୍ତ ଯୋଜନା ମୁତାବକ, ପ୍ରତ୍ୟେକ ଯକ୍ଷ୍ମା ରୋଗୀ ୬ମାସ ପାଇଁ ନିୟମିତ ଶସ୍ୟ, ଡାଲି, ରନ୍ଧନ ତେଲ, ଦୁଗ୍ଧ ପାଉଡର ଏବଂ ଅନ୍ୟାନ୍ୟ ସୁଷମ ଆହାର ଗ୍ରହଣ କରୁଛନ୍ତି। ଅପରପକ୍ଷରେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟ୍ ଭୁବନେଶ୍ୱରର ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସାଧୀନ ୨୦୦ ଯକ୍ଷ୍ମା ରୋଗୀଙ୍କୁ ୬ମାସ ପାଇଁ ପୋଷ୍ୟ ଭାବେ ଗ୍ରହଣ କରି ଯକ୍ଷ୍ମା ବିରୋଧୀ ଲଢ଼େଇରେ ନିଜର ସମର୍ଥନ ଜଣାଇଛି। ବିଶେଷକରି ଯକ୍ଷ୍ମାରୋଗୀଙ୍କୁ ଆବଶ୍ୟକ ଖାଦ୍ୟ ସାମଗ୍ରୀ ପ୍ରଦାନ କରିବା ପାଇଁ ବିଏମ୍ସି ଦ୍ୱାରା ନ୍ୟସ୍ତ ‘ଅପରେଶନ ଆଶା’ ନାମକ ଏକ ଏନ୍ଜିଓ ସଂସ୍ଥା ସହିତ ଲାଲଚାନ୍ଦ୍ ଫାଉଣ୍ଡେଶନ ଯୋଡ଼ିହୋଇଛି। ଏପରିକି ପିଏମ୍ଟିବିଏମ୍ଏ ଅଧୀନରେ‘ନି-କ୍ଷୟ ମିତ୍ର’ ଭାବେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟ୍ର ଯୋଗଦାନ ‘ଟିବି ହାରିବ,ଦେଶ ଜିତିବ’ ଅଭିଯାନ ବାର୍ତ୍ତାରେ ସ୍ବର ମିଶାଇ ଏକ ଉଦାହରଣ ପାଲଟିଛି। ଭାରତ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ‘ନି-କ୍ଷୟ ମିତ୍ର’ ଭାବେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟର ପଞ୍ଜୀକରଣକୁ ସ୍ବୀକାର କରିଛି ଏବଂ ଯକ୍ଷ୍ମା ବିରୋଧୀ ଦେଶର ଲଢ଼େଇରେ ଟ୍ରଷ୍ଟ୍ର ଯୋଗଦାନକୁ ପ୍ରଶଂସା କରିଛି। ଟିବିମୁକ୍ତ ଭାରତ ଉପରେ ସରକାରଙ୍କ ଦୃଷ୍ଟିକୋଣକୁ ସଫଳ କରିବାରେ ଲାଲଚାନ୍ଦ୍ ଫାଉଣ୍ଡେଶନ ଟ୍ରଷ୍ଟ୍ ପ୍ରମୁଖ ଭୂମିକା ଗ୍ରହଣ କରିବାକୁ ପ୍ରତିଶ୍ରୁତିବଦ୍ଧ।
