ପ୍ରଜାପତି କାହାକୁ ବା ସୁନ୍ଦର ନ ଲାଗେ! ସେମାନଙ୍କ ଶରୀରର ଆକର୍ଷଣୀୟ ରଙ୍ଗ ହେଉ କିମ୍ବା ଗଠନଶୈଳୀ, ସବୁକିଛି କାହିଁକି କେଜାଣି ଭାରି ମନୋମୁଗ୍ଧକର ଲାଗେ। ଏଠାରେ ସେମିତି କେତୋଟି ଭିନ୍ନଭିନ୍ନ ପ୍ରକାରର ପ୍ରଜାପତି ସମ୍ପର୍କରେ ଉଲ୍ଲେଖ କରାଗଲା, ଯେଉଁମାନଙ୍କର ଆକର୍ଷଣୀୟ ଗଠନଶୈଳୀ ହିଁ ସେମାନଙ୍କୁ ଭିନ୍ନ ପରିଚିତି ଦେଇଛି…
ଶୁଖିଲା ପତ୍ର ପରି ପ୍ରଜାପତି: ଇଣ୍ଡିଆନ୍ ଓକ୍ଲିଫ୍ ବା ଡେଡ୍ ଲିଫ୍ ବଟର୍ଫ୍ଲାଏ ଭାବେ ପରିଚିତ ଏହି ପ୍ରଜାପତିଟିର ଶାରୀରିକ ଗଠନ ଶୈଳୀ ଏମିତି ଭାବେ ହୋଇଥାଏ, ଯାହାକୁ ହଠାତ୍ ଦେଖିଲେ ଜଣେ ଆଶ୍ଚର୍ଯ୍ୟ ହୋଇଯିବ ଯେ, ଏହା ଏକ ପ୍ରଜାପତି ନା ଏକ ଶୁଖିଲା ପତ୍ର। କାରଣ ଏହାର ଡେଣା ଦୁଇଟି ଅବିକଳ ଶୁଖିଲା ପତ୍ର ଭଳି ଦେଖାଯାଇଥାଏ। ଏମାନେ ମୁଖ୍ୟତଃ ଏସିଆ ମହାଦେଶର ବିଭିନ୍ନ ଜଙ୍ଗଲରେ ଦେଖାଯାଇଥାଆନ୍ତି।
କାଚ ଡେଣା ଥିବା ପ୍ରଜାପତି: ଗ୍ଲାସ୍ଉଇଙ୍ଗ୍ଡ ବଟରଫ୍ଲାଏ ବା ଟ୍ରାନ୍ସପରେଣ୍ଟ ବଟରଫ୍ଲାଏ ଭାବେ ଏହି ପ୍ରଜାପତି ବେଶ୍ ଜଣାଶୁଣା। ଏହାର ନାମ ଯେମିତି ଅବିକଳ, ଗଠନଶୈଳୀ ବି ଠିକ୍ ସେମିତି ହୋଇଥାଏ। ଅର୍ଥାତ୍ ଏହି ପ୍ରଜାପତିଟିର ଡେଣା କାଚ ଭଳି ସମ୍ପୂର୍ଣ୍ଣ ସ୍ବଚ୍ଛ। ଫଳରେ ସହଜରେ କୌଣସି ପକ୍ଷୀ କିମ୍ବା ସରୀସୃପ ଏହାକୁ ଶିକାର କରିପାରନ୍ତି ନାହିଁ। କଲମ୍ବିଆ ଓ ମେକ୍ସିକୋରେ ଏମାନେ ବହୁଳ ମାତ୍ରାରେ ଦେଖାଯାଇଥାଆନ୍ତି।
ପେଚା ଆଖି ସଦୃଶ ପ୍ରଜାପତି: ଏହା ଜିଆଣ୍ଟ୍ ଓଲ୍ ଫରେଷ୍ଟ ବଟରଫ୍ଲାଏ ବା ଓଲ୍ ବଟରଫ୍ଲାଏ ଭାବେ ଜଣାଶୁଣା। ମୁଖ୍ୟତଃ ଏହି ପ୍ରଜାପତି ଡେଣାରେ ଅବିକଳ ପେଚାର ଆଖି ସଦୃଶ ଏକ ଦାଗ ରହିଥାଏ। ଖାସ୍ ଏହି ଦାଗ ପାଇଁ ହିଁ ଉକ୍ତ ପ୍ରଜାତିର ପ୍ରଜାପତିମାନେ ସେମାନଙ୍କ ଶତ୍ରୁକୁ ଭୁଆଁ ବୁଲାଇ ଦିଅନ୍ତି। ଏମାନେ ମୁଖ୍ୟତଃ ମଧ୍ୟ ଓ ଦକ୍ଷିଣ ଆମେରିକାରେ ଦେଖାଯାଇଥାଆନ୍ତି।
88 ନମ୍ବରର ପ୍ରଜାପତି: ଡେଣାରେ ଇଂରାଜୀ ନମ୍ବର 88ର ଚିତ୍ର ଥିବା ଏହି ସ୍ବତନ୍ତ୍ର ଧରଣର ପ୍ରଜାପତି ମଧ୍ୟ ଓ ଦକ୍ଷିଣ ଆମେରିକାରେ ବହୁଳ ଭାବରେ ଦେଖାଯାଇଥାଆନ୍ତି। ଏଣୁ ସେଇଥିପାଇଁ ଏହାର ନାମ ଏଇଟି ଏଇଟ୍ ବଟର୍ଫ୍ଲାଏ ରଖାଯାଇଛି।
ମୟୂର ଆଖି ଥିବା ପ୍ରଜାପତି: ସମ୍ପୃକ୍ତ ପ୍ରଜାପତିର ରଙ୍ଗ ସାମାନ୍ୟ ହଳଦିଆ ହୋଇଥିଲେ ହେଁ ଏହାର ଡେଣାରେ ମୟୂରର ଆଖି ସଦୃଶ ଏକ ଦାଗ ରହିଥାଏ। ସେଇଥିପାଇଁ ଏହାର ନାମ ପିକକ୍ ପାନ୍ସି ବା ପିକକ୍ ଆଇସ୍ପଟ୍ ବଟରଫ୍ଲାଏ ରଖାଯାଇଛି। ଏମାନେ ମୁଖ୍ୟତଃ ଦକ୍ଷିଣ ଏସିଆର ବିଭିନ୍ନ ସ୍ଥାନରେ ଦେଖାଯାଇଥାଆନ୍ତି।
ଜେବ୍ରା ଦେହର ଚିତ୍ର ଥିବା ପ୍ରଜାପତି: ଜେବ୍ରା ଦେହରେ ଯେମିତି କଳାଧଳା ଗାର ଥାଏ, ଅବିକଳ ସେହି ଡିଜାଇନ୍ର ଗାର ଏହି ପ୍ରଜାପତିର ଡେଣାରେ ରହିଥାଏ। ତା’ଛଡ଼ା ଅନ୍ୟ ପ୍ରଜାତିର ପ୍ରଜାପତିଙ୍କ ତୁଳନାରେ ଏହି ପ୍ରଜାପତିର ଡେଣା ଟିକେ ଲମ୍ବା। ସେଥିପାଇଁ ଏହା ଜେବ୍ରା ଲଙ୍ଗ୍ଉଇଙ୍ଗ୍ ବଟର୍ଫ୍ଲାଏ ନାମରେ ପରିଚିତ। ଏମାନେ ମଧ୍ୟ ଓ ଦକ୍ଷିଣ ଆମେରିକାରେ ଅଧିକ ଦେଖାଯାଇଥାନ୍ତି।
ନୀଳ ପ୍ରଜାପତି: ଏହା ଏକପ୍ରକାର ବଡ଼ ତଥା ସୁନ୍ଦର ପ୍ରଜାପତି। କାରଣ ଏମାନଙ୍କ ଶରୀରର ରଙ୍ଗ ସମ୍ପୂର୍ଣ୍ଣ ନୀଳ ହେବା ସହ ଡେଣାର ଚତୁଃପାର୍ଶ୍ୱରେ ଛିଟଛିଟ କଳାଦାଗ ରହିଛି, ଯାହା ଏମାନଙ୍କୁ ଅଧିକ ସୁନ୍ଦର କରାଇଥାଏ। ସେଥିପାଇଁ ଏମାନଙ୍କୁ ବ୍ଲୁ ମର୍ଫୋ କୁହାଯାଏ। ଏମାନେ ମୁଖ୍ୟତଃ ମଧ୍ୟ ଓ ଦକ୍ଷିଣ ଆମେରିକାର ବିଭିନ୍ନ ଜଙ୍ଗଲରେ ଦେଖାଯାଇଥା’ନ୍ତି।
ସ୍ବାଲୋଟେଲ୍ ବଟରଫ୍ଲାଏ: ଏମାନଙ୍କ ଡେଣାର ତଳଭାଗରେ ଟିକେ ଲାଞ୍ଜ ଥିଲା ଭଳି ଦେଖାଯାଉଥିବାରୁ ଉକ୍ତ ପ୍ରଜାପତିର ଏପରି ନାମକରଣ ହୋଇଥିବା ବିଶ୍ୱାସ କରାଯାଏ। ବିଶ୍ୱରେ ଏମାନେ ପ୍ରାୟ ୫୫୦ ପ୍ରକାରର ଦେଖାଯାଇଥା’ନ୍ତି। ତେବେ ଏହି ପ୍ରଜାତିର ସବୁଜ ରଙ୍ଗର ପ୍ରଜାପତିଟି ମୁଖ୍ୟତଃ ଦକ୍ଷିଣ-ପୂର୍ବ ଏସିଆରେ ଦେଖାଯାଇଥାଆନ୍ତି।
ସିଲ୍ଫିନା ଆଞ୍ଜେଲ୍: ଏହି ପ୍ରଜାପତିଙ୍କର ମଧ୍ୟ ଟ୍ରାନ୍ସପରେଣ୍ଟ ଡେଣା ରହିଛି, କିନ୍ତୁ ଏହାର ମଝିରେ ମଝିରେ ଲମ୍ବାଲମ୍ବା କଳା ଗାର ବି ଅଛି। ତା’ଛଡ଼ା ସିଲ୍ଫିନା ଆଞ୍ଜେଲ୍ ନାମରେ ପରିଚିତ ଏହି ପ୍ରଜାପତିଙ୍କର ଟିକେ ଲମ୍ବା ଲାଞ୍ଜ ଥିବା ମଧ୍ୟ ଦେଖାଯାଇଥାଏ। ଏମାନେ ଅଧିକାଂଶ ସମୟ ଗଛର ପତ୍ର ଆଢୁଆଳରେ ରହିବାକୁ ପସନ୍ଦ କରିଥା’ନ୍ତି ଏବଂ ସୂର୍ଯ୍ୟଙ୍କର ପ୍ରଖର କିରଣ ପଡ଼ିବା ସମୟରେ ହିଁ କେବଳ ଏମାନେ ଉଡ଼ିଥାନ୍ତି ଓ ଖାଦ୍ୟ ସଂଗ୍ରହ କରିଥାଆନ୍ତି।
ଆପୋଲୋ ବଟରଫ୍ଲାଏ: ସମ୍ପୃକ୍ତ ପ୍ରଜାପତିଙ୍କର ସୁନ୍ଦର ଧଳାରଙ୍ଗର ଡେଣା ଥାଏ ଏବଂ ତା’ ଉପରେ ୪ଟି ନାଲି ରଙ୍ଗର ଛୋଟଛୋଟ ଆଖି ସଦୃଶ ଦାଗ ରହିଥାଏ, ଯାହା ଏମାନଙ୍କୁ ଆକର୍ଷଣୀୟ ଲୁକ୍ ଦେଇଥାଏ। ଏମାନେ ମୁଖ୍ୟତଃ ଫ୍ରାନ୍ସ, ସ୍ପେନ୍, ଇଟାଲୀରେ ଦେଖାଯାଇଥା’ନ୍ତି।
