ଭୁବନେଶ୍ୱର,୨୭।୩(ବ୍ୟୁରୋ): ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଗିରଫଦାରିକୁ ନେଇ ବାଚସ୍ପତି ବାଣପୁର ଆଇଆଇସି ଓ ଖୋର୍ଦ୍ଧା ଏସ୍ପିଙ୍କଠାରୁ ଜବାବ ତଲବ କରିଛନ୍ତି। ବିଧାୟକଙ୍କ ଗିରଫ ସମ୍ପର୍କରେ ଗୃହକୁ ବିଳମ୍ବରେ କାହିଁକି ଅବଗତ କରାଗଲା ବୋଲି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଶୁକ୍ରବାର ବିଧାନସଭାରେ ଉଠାଇଥିଲେ । ଏ ନେଇ ସେ ଶନିବାର ବାଣପୁର ଆଇଆଇସି ଓ ଖୋର୍ଦ୍ଧା ଏସ୍ପିଙ୍କ ବିରୋଧରେ ସ୍ବାଧିକାର ଭଙ୍ଗ ନୋଟିସ ଦେଇଛନ୍ତି। ବିଧାନସଭା ଶୂନ୍ୟକାଳରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ନରସିଂହ ଆଣିଥିବା ସ୍ବାଧିକାର ଭଙ୍ଗ ସମ୍ପର୍କରେ ସୂଚନା ଦେବା ସହ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଗିରଫ ବିଷୟରେ ଖୋର୍ଦ୍ଧା ଏସ୍ପି ବିଧାନସଭାକୁ ୨୩ ତାରିଖ ଅପରାହ୍ନ ୩ଟା ୪୫ ମିନିଟରେ ଚିଠି ମାଧ୍ୟମରେ ଜଣାଇଥିଲେ ବୋଲି ସୂଚନା ଦେଇଥିଲେ । ୨୪ ତାରିଖରେ ପୌର ନିର୍ବାଚନ ଥିବାରୁ ଛୁଟି ରହିଥିଲା। ୨୫ ତାରିଖରେ ତାଙ୍କ ନିକଟରେ ଚିଠି ପହଞ୍ଚିଥିଲା ବୋଲି ବାଚସ୍ପତି କହିଥିଲେ। ତେବେ ନରସିଂହ କହିଥିଲେ ଯେ ଯଦି ବିଧାନସଭାର କୌଣସି ସଦସ୍ୟ ଗିରଫ ହୁଅନ୍ତି ତେବେ ତୁରନ୍ତ ଏ ନେଇ ବାଚସ୍ପତିଙ୍କୁ ସୂଚନା ଦେବା କଥା। ୩ ଦିନ ପରେ କାହିଁକି ଗୃହକୁ ଅବଗତ କରାଯାଇଛି। ଅଧିକାରୀମାନେ ବିଧାୟକମାନଙ୍କୁ ଖାତିର କରୁ ନାହାନ୍ତି। ଆପଣଙ୍କୁ ମଧ୍ୟ ଖାତିର କରିବେ ନାହିଁ। ଟେଲିଫୋନ କଲେ ଥାନାର ଆଇଆଇସି କିମ୍ବା ଅଧିକାଂଶ ସଚିବ ଫୋନ ଉଠାନ୍ତି ନାହିଁ। ବୁକ୍ ସର୍କୁଲାର ୪୭କୁ ଖୋଲାଖୋଲି ଉଲ୍ଲଂଘନ କରାଯାଉଛି। ପ୍ରଶାନ୍ତ ଜଗଦ୍ଦେବଙ୍କ ଗିରଫଦାରି ବିଷୟରେ ବିଳମ୍ବରେ ଜଣାଇବା ଅର୍ଥ ବିଧାନସଭାର ସ୍ବାଧିକାର ଭଙ୍ଗ ହୋଇଛି। ସମ୍ପୃକ୍ତ ଏସ୍ପିଙ୍କ ବିରୋଧରେ ସ୍ବାଧିକାର ଭଙ୍ଗ ଆଣିବାକୁ ନରସିଂହ ଦାବି କରିଛନ୍ତି। ଏହି ମାମଲାକୁ ଗୁରୁତର ସହ ନେଇ ବାଚସ୍ପତି ଖୋର୍ଦ୍ଧା ଏସ୍ପି ଓ ବାଣପୁର ଆଇଆଇସିଙ୍କୁ ଜବାବ ତଲବ କରିଛନ୍ତି।
