ବିଶାଖାପାଟଣା,୯।୧୦- ଆଇସିସି ମହିଳା ବିଶ୍ୱକପ୍ରେ ଗୁରୁବାର ଖେଳାଯାଇଥିବା ରୋମାଞ୍ଚକ ମ୍ୟାଚ୍ରେ ଦକ୍ଷିଣ ଆଫ୍ରିକା ୩ ଉଇକେଟରେ ଭାରତକୁ ପରାସ୍ତ କରିଛି। ରିଚା ଘୋଷଙ୍କ ବିସ୍ଫୋରକ ୯୪ ରନର ଇନିଂସ ବଳରେ ଭାରତ ୨୫୨ ରନର ଚ୍ୟାଲେଞ୍ଜିଂ ଟାର୍ଗେଟ ଛିଡ଼ା କରିଥିଲା। ଜବାବରେ ନାଦିନେ ଡି କ୍ଲର୍କ ୮୪ ରନର ବିସ୍ଫୋରକ ପାଳି ଖେଳି ଭାରତଠାରୁ ମ୍ୟାଚ୍ ଛଡ଼ାଇ ନେଇଥିଲେ। ଏହା ଦକ୍ଷିଣ ଆଫ୍ରିକାର ଦ୍ୱିତୀୟ ବିଜୟ ହୋଇଥିବା ବେଳେ ଭାରତର ଏହା ପ୍ରଥମ ପରାଜୟ।
ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳକୁ ପ୍ରତିକା ରାଓ୍ବଲ ଓ ସ୍ମୃତି ମନ୍ଧାନାଙ୍କ ଓପନିଂ ଯୋଡ଼ି ୫୫ ରନର ଭଲ ଆରମ୍ଭ ପ୍ରଦାନ କରିଥିଲା। କ୍ରିଜ୍ରେ ସେଟ୍ ଥିବା ମନ୍ଧାନା (୨୩ ରନ, ୧ ଲେଖାଏ ଚୌକା ଓ ଛକା) ବଡ଼ ଶଟ୍ ଖେଳିବାକୁ ଯାଇ କ୍ୟାଚ୍ ଆଉଟ୍ ହୋଇଥିଲେ। ୩ୟ କ୍ରମରେ ଆସିଥିବା ହର୍ଲିନ ଦେଓଲ (୧୩)ଙ୍କ ସହ ପ୍ରତିକା ଦ୍ୱିତୀୟ ଉଇକେଟରେ ୨୮ ରନ ଯୋଡ଼ିଥିଲେ। ଏହାପରେ ଦଳ ମାତ୍ର ୧୯ ରନ ମଧ୍ୟରେ ୫ ଉଇକେଟ ହରାଇଥିଲା। ପ୍ରତିକା ୩୭ (୫ ଚୌକା) ରନ କରି ଆଉଟ୍ ହୋଇଥିବା ବେଳେ ଅଧିନାୟିକା ହରମନପ୍ରୀତ କୌର (୯), ଜେମିମା ରୋଡ୍ରିଗୁଏଜ (୦) ଓ ଦୀପ୍ତି ଶର୍ମା (୪) ଫେଲ ମାରିଥିଲେ। ଫଳରେ ଏକଦା ୮୩/୧ ସ୍କୋର କରିଥିବା ଭାରତ ୧୦୨ ରନରେ ୬ ଉଇକେଟ ହରାଇ ସଙ୍କଟରେ ପଡ଼ିଥିଲା। ଏଭଳି ପରିସ୍ଥିତିରେ ରିଚା ଘୋଷ ଓ ଅମନଜୋତ କୌର ସପ୍ତମ ଉଇକେଟରେ ୫୧ ରନ ଯୋଡ଼ି ଦଳୀୟ ସ୍କୋରକୁ ୧୫୦ ଅତିକ୍ରମ କରାଇଥିଲେ। ଅମନଜୋତ ୧୩ ରନ କରି ସପ୍ତମ ବ୍ୟାଟର ଭାବେ ଆଉଟ୍ ହୋଇଥିଲେ। ଏହାପରେ ରିଚା ଓ ସ୍ନେହ ରାଣା ଆଟାକିଂ ବ୍ୟାଟିଂ କରିଥିଲେ। ଦୁହେଁ ଅଷ୍ଟମ ଉଇକେଟ ପାଇଁ ୮୮ ରନ ଯୋଡ଼ିଥିଲେ। ସ୍ନେହ ୨୪ ବଲରେ ୬ ଚୌକା ସହିତ ୩୩ ରନ କରି ଆଉଟ୍ ହୋଇଥିଲେ।
ସେହିଭଳି ରିଚା ୭୭ ବଲରେ ୯୪ ରନର ବିସ୍ଫୋରକ ପାଳି ଖେଳି ଅନ୍ତିମ ଓଭରରେ ପାଭିଲିଅନ ଫେରିଥିଲେ। ତାଙ୍କ ଇନିଂସରେ ୧୧ ଚୌକା ଓ ୪ ଛକା ସାମିଲ ଥିଲା। ଏହା ରିଚାଙ୍କର ଦିନିକିଆ କ୍ୟାରିୟରର ସର୍ବାଧିକ ସ୍କୋର। ମହିଳା ଦିନିକିଆ କ୍ରିକେଟ ଇତିହାସରେ ଅଷ୍ଟମ ପୋଜିଶନରେ ଏହା ସର୍ବାଧିକ ବ୍ୟକ୍ତିଗତ ସ୍କୋର। ଭାରତୀୟ ଦଳ ୪୯.୫ ଓଭରରେ ୨୫୧ ରନରେ ଅଲଆଉଟ୍ ହୋଇଯାଇଥିଲା।
ଜବାବରେ ଭାରତ ଭଳି ଦକ୍ଷିଣ ଆଫ୍ରିକା ମଧ୍ୟ ବ୍ୟାଟିଂ ବିପର୍ଯ୍ୟର ସମ୍ମୁଖୀନ ହୋଇଥିଲା। ଗୋଟିଏ ପଟେ ଅଧିନାୟିକା ଲୌରା ଓ୍ବଲଭାର୍ଟ ଛିଡ଼ା ହୋଇଥିବା ବେଳେ ଅନ୍ୟ ପଟେ ଉଇକେଟ ପତନ ଜାରି ରହିଥିଲା। ଦଳ ୨୦ ଓଭର ମଧ୍ୟରେ ୮୧ ରନରେ ୫ ଉଇକେଟ ସଙ୍କଟରେ ପଡ଼ିଥିଲା। ଅଧିନାୟିକା ଲୌରାଙ୍କ ସହ ଚ୍ଲୋ ଟ୍ରାଇଅନ ସପ୍ତମ ଉଇକେଟରେ ୬୧ ରନ ଯୋଡ଼ିଥିଲେ। ଲୌରା ୮ ଚୌକା ସହିତ ୭୦ ଓ ଟ୍ରାଇଅନ ୫ ଚୌକା ସହିତ ୪୯ ରନ କରି ଆଉଟ୍ ହୋଇଥିଲେ। ଶେଷ ଆଡ଼କୁ ନାଡିନେ ଡି କ୍ଲର୍କ ୫୪ ବଲରେ ୮ ଚୌକା ଓ ୫ ଛକା ସହ ବିସ୍ଫୋରକ ୮୪ ରନର ପାଳି ଖେଳି ଭାରତ ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ଦକ୍ଷିଣ ଆଫ୍ରିକା ୪୮.୫ ଓଭରରେ ୭ ଉଇକେଟ ହରାଇ ୨୫୨ ରନ କରି ନେଇଥିଲା। ଭାରତ ପାଇଁ କ୍ରାନ୍ତି ଗୌଡ଼ ଓ ସ୍ନେହ ରାଣା ୨ ଲେଖାଏ ଉଇକେଟ ହାତେଇଥିଲେ।
