ନୂଆଦିଲ୍ଲୀ,୧।୩: ଟି୨୦ ବିଶ୍ୱକପ୍ରେ ରବିବାର ଖେଳାଯାଇଥିବା ସୁପର-୮ ମ୍ୟାଚ୍ରେ ଦକ୍ଷିଣ ଆଫ୍ରିକା ୫ ଉଇକେଟରେ ଜିମ୍ବାଓ୍ବେକୁ ପରାସ୍ତ କରିଛି। ଜିମ୍ବାଓ୍ବେ ଦ୍ୱାରା ପ୍ରଦତ୍ତ ୧୫୪ ରନର ଟାର୍ଗେଟକୁ ଦ. ଆଫ୍ରିକା ୧୭.୫ ଓଭରରେ ୫ ଉଇକେଟ ହରାଇ ହାସଲ କରି ନେଇଥିଲା। ଏହି ବିଜୟ ସହ ଚଳିତ ଟୁର୍ନାମେଣ୍ଟରେ ଏକମାତ୍ର ଦଳ ଭାବେ ଦକ୍ଷିଣ ଆଫ୍ରିକା ଅପରାଜେୟ ଭାବେ ସୁପର-୮ ପର୍ଯ୍ୟାୟ ଶେଷ କରିଛି। ମ୍ୟାଚ୍ରେ ଅଲରାଉଣ୍ଡ ପ୍ରଦର୍ଶନ କରିଥିବା ରଜାଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ କରାଯାଇଛି। ଆସନ୍ତା ୪ ତାରିଖରେ ଦକ୍ଷିଣ ଆଫ୍ରିକା ପ୍ରଥମ ସେମିଫାଇନାଲରେ ନ୍ୟୁଜିଲାଣ୍ଡକୁ ଭେଟିବ।
ଜିତି ପ୍ରଥମେ ବ୍ୟାଟିଂ କରିଥିବା ଜିମ୍ବାଓ୍ବେ ୨୦ ଓଭରରେ ୭ ଉଇକେଟ ହରାଇ ୧୫୩ ରନ କରିଥିଲା। ଦଳ ପାଇଁ ଅଧିନାୟକ ସିକନ୍ଦର ରଜା ୪୩ ବଲରେ ୭୩ (୮ ଚୌକା ଓ ୪ ଛକା) ଓ କ୍ଲାଇଭ ମାଡାଣ୍ଡେ ୨୦ ବଲରେ ଅପରାଜିତ ୨୬ (୩ ଚୌକା) ରନ କରିଥିଲେ। ଦ. ଆଫ୍ରିକା ପାଇଁ କ୍ୱେନା ମାଫାକା ଓ କର୍ବିନ ବୋଶ୍ଚ ୨ ଲେଖାଏ ଉଇକେଟ ନେଇଥିଲେ। ଜବାବରେ ଦକ୍ଷିଣ ଆଫ୍ରିକାର ଦୁଇ ଓପନର ଅଧିନାୟକ ଏଡେନ ମାରକ୍ରମ (୪) ଓ କ୍ୱିଣ୍ଟନ ଡି କକ୍ (୦)ଙ୍କ ଉଇକେଟ ହରାଇଥିଲା। ଉଭୟଙ୍କୁ ରଜା ପାଭିଲିଅନ ବାଟ ଦେଇଥିଲା।
ହେଲେ ରିୟାନ ରିକଲଟନ ୨୨ ବଲରେ ୩୧ (୪ ଛକା), ଡଓ୍ବୋଲ୍ଡ ବ୍ରେଭିସ ୧୮ ବଲରେ ୪୨ (୨ ଚୌକା ଓ ୪ ଛକା) ଓ ଡେଭିଡ୍ ମିଲର ୨୨(୨ ଲେଖାଏ ଚୌକା ଓ ଛକା) ରନ କରି ଦଳକୁ ଆଗେଇ ନେଇଥିଲେ। ଟ୍ରିଷ୍ଟାନ ଷ୍ଟବ୍ସ (୨୧) ଓ ଜର୍ଜ ଲିଣ୍ଡେ (୩୦ ରନ, ୨ ଚୌକା ଓ ୧ ଛକା) ଅବିଭାଜିତ ଷଷ୍ଠ ଉଇକେଟରେ ୫୩ ରନ ଯୋଡ଼ି ଦଳକୁ ଜିତାଇଥିଲେ। ଫଳରେ ଦ. ଆଫ୍ରିକା ୧୭.୫ ଓଭରରେ ୫ ଉଇକେଟ ହରାଇ ୧୫୪ ରନ କରି ନେଇଥିଲା।
