ବ୍ରହ୍ମବରଦା,୧୯।୪(ଡି.ଏନ୍.ଏ.): ରସୁଲପୁର ବ୍ଲକ୍ ଅନ୍ତର୍ଗତ ବନ୍ଧଡ଼ିହ ପଞ୍ଚାୟତ ଜୟସିଂହଡ଼ା ଗ୍ରାମର ସୌଦାମିନୀ ସାହାଣୀଙ୍କ ପରିବାରକୁ ମିଳୁନି ଆବାସ ଯୋଜନାରେ ଘରଟିଏ। ଫଳରେ ଏହି ପରିବାର ଭଙ୍ଗାଘରେ ଜରିପାଲ ପକାଇ ବହୁ କଷ୍ଟରେ ରହୁଛନ୍ତି। ସୌଦାମିନୀଙ୍କ ପରିବାର କହିଲେ ସ୍ବାମୀ ଚିତ୍ତରଞ୍ଜନ ସାହାଣୀ, ୧୦ ବର୍ଷର ପୁଅ ଓ ୧୧ ବର୍ଷର ଝିଅଟିଏ। ଚିତ୍ତରଞ୍ଜନ ଓ ସୌଦାମିନୀ ନିକଟସ୍ଥ ସରକାରୀ ବିଦ୍ୟାଳୟରେ ରୋଷେୟା ଓ ହେଲ୍ପର ଭାବରେ କାମକରି ଯାହା ରୋଜଗାର କରନ୍ତି ସେଥିରେ ତାଙ୍କ ପରିବାର ଚଳେ। ଅନ୍ୟ ସମୟରେ ଏହି ଦମ୍ପତି ମଜୁରିଆ ଭାବେ କାମ କରନ୍ତି। ବିଦ୍ୟାଳୟରେ ମାସିକ ଯେତିକି ଦରମା ମିଳେ ସେଥିରେ ଘରଟିଏ କରିବା ଦୂରର କଥା, ଘର ଛାଇବା ମଧ୍ୟ ସମ୍ଭବ ହୁଏ ନାହିଁ। ଔଷଧପତ୍ର କିଣିବା ହେଉ ଅବା ପିଲାଙ୍କୁ ପାଠ ପଢ଼ାଇବା ସବୁଥିରେ ବାଧା ଉପୁଜୁଛି। ପାଖପଡ଼ିଶାଙ୍କ ସାହାଯ୍ୟରେ ତାଙ୍କ ଘରଟିକୁ ମରାମତି କରିଥାନ୍ତି। ସରକାରଙ୍କ ଆବାସ ଯୋଜନାରେ ଘରଟିଏ ପାଇବା ପାଇଁ ସୌଦାମିନୀଙ୍କ ପରିବାର ଅନେକ ଥର ସରପଞ୍ଚଙ୍କଠାରୁ ଆରମ୍ଭକରି ବ୍ଲକ୍ ପ୍ରଶାସନ ପର୍ଯ୍ୟନ୍ତ କାକୁତି ମିନତି ହୋଇ ନିଜ ଅସହାୟତା ପ୍ରକାଶ କଲେ ସୁଦ୍ଧା କେହି କର୍ଣ୍ଣପାତ କରୁନାହାନ୍ତି। ଏହି ବର୍ଷ ସରକାରଙ୍କ ତରଫରୁ ଆସିଥିବା ଆବାସ ଯୋଜନର ଯୋଗ୍ୟ ହିତାଧିକାରୀଙ୍କ ପ୍ରଥମ ତାଲିକାରେ ସୌଦାମିନୀଙ୍କ ନାମ ଥିବାବେଳେ କିପରି ଚୂଡ଼ାନ୍ତ ତାଲିକାରେ ବାଦ୍ ପଡ଼ିଲା ତାହା ରହସ୍ୟ ହୋଇ ରହିଛି। ପଞ୍ଚାୟତର କିଛି ମୁଷ୍ଟିମେୟ ଲୋକ ଚଞ୍ଚକତା କରି ତାଙ୍କ ଘର ହାତେଇ ନେଇଥିବା ଉକ୍ତ ଦମ୍ପତି ପ୍ରକାଶ କରିଛନ୍ତି।
ସରକାରୀ ଯୋଜନା କହିଲେ ରାଶନ କାର୍ଡରେ ୨୦ କି.ଗ୍ରା. ଚାଉଳ ଛଡ଼ା ଅନ୍ୟ କିଛି ନାହିଁ। ତେଣୁ ଏହି ଅସହାୟ ପରିବାରକୁ ସରକାରୀ ସହାୟତା ମିଳିଲେ ସେମାନେ ଉପକୃତ ହେବେ ବୋଲି ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ବନ୍ଧଡ଼ିହ ସରପଞ୍ଚ ବିକ୍ରମ ବେହେରାଙ୍କୁ ପଚାରିବାରୁ ସେ କହିଛନ୍ତି, ଆମ ପଞ୍ଚାୟାତରେ ବହୁ ଯୋଗ୍ୟ ହିତାଧିକରୀ ଆବାସ ଯୋଜନାରୁ ବାଦ୍ ପଡ଼ିଛନ୍ତି। ଆମ୍ଭେ ୱାର୍ଡମେମ୍ବରମାନଙ୍କ ଏକ ମିଟିଂ ଡକାଇ ନିଜ ନିଜ ୱାର୍ଡରେ ବାଦ୍ପଡ଼ିଥିବା ଯୋଗ୍ୟ ହିତାଧିକରୀଙ୍କ ଏକ ତାଲିକା ପ୍ରସ୍ତୁତ କରି ବିଡିଓଙ୍କ ଦୃଷ୍ଟିଗୋଚର କରିବୁ। ଏପରିକି କୌଣସି ଯୋଗ୍ୟ ହିତାଧିକାରୀ ଯେପରି ଉକ୍ତ ତାଲିକାରୁ ବାଦ୍ ନ ପଡ଼ନ୍ତି ସେଥିପ୍ରତି ଧ୍ୟାନଦେବୁ ବୋଲି ସେ ପ୍ରକାଶ କରିଛନ୍ତି।
