ଝରିଗାଁ,୧୬।୯(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲା ଝରିଗାଁ ବ୍ଲକ କୁସୁମପାଣି ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି । ଗତ ମଙ୍ଗଳବାର ରାତିରେ ବାପାର ଛୁରା ମାଡ଼ରେ ପୁଅ ଗୁରୁତର ଆହତ ହୋଇଥିବା ବେଳେ ଆଜି ମୃତ୍ୟୁ ହୋଇ ଯାଇଥିବା ଜଣାପଡିଛି । ସୂଚନା ଅନୁଯାୟୀ, କୁସୁମପାଣି ଗ୍ରାମର ଦାସ ସାନ୍ତାଙ୍କ ପରିବାର ଲୋକ ନୂଆଁଖାଇ ପାଇଁ ମଙ୍ଗଳବାର ଘରେ ଏକତ୍ରିତ ହୋଇଥିଲେ । ତେବେ ରାତି ପ୍ରାୟ ୮ଟାରେ ବାପା ଦାସ ସାନ୍ତା ଓ ପୁଅ ନିଡ଼ି ସାନ୍ତା(୪୦)ଙ୍କ ମଧ୍ୟରେ କୌଣସି କାରଣରୁ ପାଟିତୁଣ୍ଡ ହୋଇଥିଲା। ପାଟିତୁଣ୍ଡ ହେବା ଦେଖି ଦାସଙ୍କ ପତ୍ନୀ ଜାମୁଲୀ ଜୋରରେ କାନ୍ଦିଥିଲେ । ପରେ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ଦେଖିବା ବେଳକୁ ନିଡ଼ି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଘର ସମ୍ମୁଖରେ ପଡ଼ିଥିବା ଦେଖିବାକୁ ପାଇଥିଲେ।
ପରେ ଗ୍ରାମବାସୀ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । ତେବେ କୁସୁମପାଣି ଗାଁ ରାସ୍ତା ଖରାପ ଥିବାରୁ ଆମ୍ବୁଲାନ୍ସ ୩ କିମି ଦୂରରେ ଥିବା ମାଙ୍ଗମୁଦୁଲି ଗାଁ ନିକଟରେ ଅଟକି ଯାଇଥିଲା। ଶେଷରେ ଗ୍ରାମର ଅନ ସାନ୍ତା, ତସୀ ସାନ୍ତା, ଆସଡୁ ସାନ୍ତା, ଅମୀ ସାନ୍ତା ପ୍ରମୁଖ ନିଡ଼ିଙ୍କୁ ଖଟିଆ ଯୋଗେ ୩ କିମି ଦୂର ମାଙ୍ଗମୁଦୁଲି ଗାଁ ପର୍ଯ୍ୟନ୍ତ ବୋହି ନେଇଥିଲେ । ପରେ ଆମ୍ବୁଲାନ୍ସ ଯୋଗେ ନିଡ଼ିଙ୍କୁ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ତେବେ ପେଟର ଅନ୍ତଃନଳୀ ବାହାରି ପଡ଼ିବା ସହ ମୁଣ୍ଡରେ ଗଭୀର ଆଘାତ ଲାଗିଥିବାରୁ ଉନ୍ନତ ଚିକିତ୍ସା ନିମନ୍ତେ ନିଡ଼ିଙ୍କୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟ ଓ ପରେ କୋରାପୁଟ ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା। ବୁଧବାର କୋରାପୁଟ ମେଡିକାଲ କଲେଜରେ ଚିକିତ୍ସାଧିନ ଅବସ୍ଥାରେ ନିଡ଼ିଙ୍କ ମୃତ୍ୟୁ ହୋଇ ଥିବା ସୂଚନା ମିଳିଛି।
ଝରିଗାଁ ପୋଲିସ ୧୭୯/୨୬ରେ ଏକ ହତ୍ୟା ମାମଲା ରୁଜୁ କରି ଅଭିଯୁକ୍ତ ଦାସ ସାନ୍ତାକୁ ଅଟକ ରଖିଛି । ଝରିଗାଁ ଥାନା ଏସ ଆଇ ଲଷ୍ମୀ ନାରାୟଣ ଦୋରା କୋରାପୁଟ ମେଡିକାଲ କଲେଜ ପହଞ୍ଚି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିବା ସୂଚନା ଦେଇଛନ୍ତି ।
