ଚାଇନାରୁ ସୃଷ୍ଟି ହୋଇଥିବା ମହାମାରୀ କରୋନା ବିଶ୍ୱର ଅନେକ ଦେଶରେ କାୟା ବିସ୍ତାର କରି ଲକ୍ଷ ଲକ୍ଷ ଜୀବନ ନେଇଛି। କରୋନା ସଂକ୍ରମଣରୁ ରକ୍ଷା ପାଇବା ପାଇଁ ମାସ୍କ ପିନ୍ଧିବା, ସାନିଟାଇଜର୍ ଲଗାଇବା ଏବଂ ସାମାଜିକ ଦୂରତା ଅବଲମ୍ବନ କରିବା ଏକ ଅଭ୍ୟାସରେ ପରିଣତ ହୋଇଯାଇଛି। ଏହି ସମୟ ମଧ୍ୟରେ ଆଉ ଏକ ଖବର ଚିନ୍ତାର କାରଣ ହୋଇଛି। ଆମେ ବ୍ୟବହାର କରୁଥିବା ସାନିଟାଇଜର ମଧ୍ୟରୁ ୪୪ ସାନିଟାଇଜର ବିପଜ୍ଜନକ ରାସାୟନିକ ଉପାଦାନ ବ୍ୟବହାର କରୁଛନ୍ତି ଯାହା କର୍କଟ ରୋଗର ଆଶଙ୍କା ବଢାଇଥାଏ। ନିକଟରେ ହୋଇଥିବା ଏକ ଅଧ୍ୟୟନରେ ଏହା ପ୍ରକାଶ ପାଇଛି।
କରୋନା ଭୂତାଣୁ ବ୍ୟାପିବା ପରେ ସାନିଟାଇଜର ବ୍ୟବହାର ସାରା ବିଶ୍ୱରେ ବୃଦ୍ଧି ପାଇଛି। ଏହାର ଦୀର୍ଘକାଳୀନ ବ୍ୟବହାର କର୍କଟ କିମ୍ବା ଚର୍ମ ରୋଗର କାରଣ ହୋଇପାରେ କି ନାହିଁ ଜାଣିବା ପାଇଁ ଭାଲାଇଜର ପକ୍ଷରୁ ୨୬୦ରୁ ଅଧିକ ହ୍ୟାଣ୍ଡ ସାନିଟାଇଜର ଉପରେ ଏକ ବିସ୍ତୃତ ଅଧ୍ୟୟନ କରାଯାଇଥିଲା। ଏନେଇ ଭାଲାଇଜର ଆମେରିକାର ଫୁଡ୍ ଏବଂ ଡ୍ରଗ୍ ଆଡମିନିଷ୍ଟ୍ରେଶନ (ଏଫଡିଏ)କୁ ଏକ ଚିଠି ଲେଖିଛନ୍ତି। ଏଫଡିଏକୁ ଲେଖିଥିବା ଭାଲାଇଜର ଚିଠିରେ କୁହାଯାଇଛି ଯେ, କରୋନା ମହାମାରୀ ସମୟରେ ସାନିଟାଇଜରର ଚାହିଦା ବୃଦ୍ଧି ପାଇଛି। ନ୍ୟୁ ହେଭେନର ଏକ ଅନଲାଇନ ଫାର୍ମାସି ୱେଲାଇଜର ୨୬୦ରୁ ଅଧିକ ହ୍ୟାଣ୍ଡ ସାନିଟାଇଜର ବ୍ରାଣ୍ଡ ଉପରେ ଅଧ୍ୟୟନ କରିଛି। ଅଧ୍ୟନରୁ ୪୪ରୁ ଅଧିକ ସାନିଟାଇଜରରେ ବେଞ୍ଜିନ ସମେତ ଅନେକ ବିପଜ୍ଜନକ ରାସାୟନିକ ପଦାର୍ଥ ଥିବା ଜଣାପଡିଛି।
ବେଞ୍ଜିନ ହେଉଛି ଏକ ତରଳ ରାସାୟନିକ ପଦାର୍ଥ। ଯାହା ସାଧାରଣତଃ ରଙ୍ଗହୀନ, କିନ୍ତୁ ବେଳେବେଳେ ସାଧାରଣ କୋଠରୀ ତାପମାତ୍ରାରେ ଏହା ହଳଦିଆ ଦେଖାଯାଏ। ବେଞ୍ଜିନ ସଂସ୍ପର୍ଶରେ ଆସିବା କାରଣରୁ ଶରୀରରେ ରକ୍ତ କଣିକା ସଠିକ ଭାବରେ କାମ କରେ ନାହିଁ। ବେଳେବେଳେ ଲୋହିତ ରକ୍ତ କଣିକା ଗଠନ ବନ୍ଦ କରିଦିଏ କିମ୍ବା ଶ୍ୱେତ ରକ୍ତ କଣିକା ହ୍ରାସ ହେବାକୁ ଲାଗେ, ଯାହା ପ୍ରତିରକ୍ଷା ପ୍ରଣାଳୀକୁ ବହୁତ ଦୁର୍ବଳ କରିଥାଏ। ବିଶ୍ୱ ସ୍ବାସ୍ଥ୍ୟ ସଂଗଠନର ଅନ୍ତର୍ଜାତୀୟ ଏଜେନ୍ସି ‘ରିସର୍ଚ୍ଚ ଅନ୍ କ୍ୟାନସର୍’ରେ ବେଞ୍ଜିନକୁ କର୍ସିନୋଜେନ ଭାବରେ ଚିହ୍ନଟ କରାଯାଇଛି। ସର୍ବାଧିକ ବିପଦ ବର୍ଗ ଗ୍ରୁପ -୧ରେ କର୍ସିନୋଜେନ ସ୍ଥାନିତ ହୋଇଛି। କର୍ସିନୋଜେନ ହେଉଛି ଏପରି ପଦାର୍ଥ,ଯାହା ଶରୀରରେ କର୍କଟ (କର୍କଟ) ହେବାର ସମ୍ଭାବନା ଥାଏ।
