ଲାଞ୍ଜିଗଡ଼,୨୬।୧୨(ଡି.ଏନ.ଏ.):କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକର ବିଭିନ୍ନ ପଞ୍ଚାୟତରେ ଶୌରଶକ୍ତି ଦ୍ୱାରା ପାନୀୟ ଜଳ ଯୋଗାଣ ବ୍ୟବସ୍ଥା କରାଯାଇଛି। ହେଲେ ବର୍ଷ ବର୍ଷ ଧରି ବନ୍ଦ ଥିବାରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଲାଞ୍ଜିଗଡ଼ ପଞ୍ଚାୟତ ଗୌଡ଼ପଡାଠାରେ ଶୌରଶକ୍ତିର ଯାନ୍ତ୍ରିକ ତ୍ରୁଟି ଯୋଗୁ ଗତ ୪ ବର୍ଷ ହେଲା ଜଳଯୋଗାଣ ବନ୍ଦ ଥିବା ବେଳେ ଆଶ୍ରମପଡ଼ାରେ ୩ବର୍ଷ ହେଲା ଜଳଯୋଗାଣ ବନ୍ଦ ରହିଛି। କଲୋନୀ ପଡ଼ାରେ ଦେଢ଼ ବର୍ଷ ଏବଂ ଡମ୍ବବିଶି ପଡ଼ାରେ ୧ବର୍ଷ ହେଲା ଅଚଳ ଅବସ୍ଥାରେ ରହିଛି। ସେହିପରି ଛତ୍ରପୁର ପଞ୍ଚାୟତ ଲେପଟାଗୁଡା ଗାଁରେ ଦେଢ଼ ବର୍ଷ ହେଲା ଅଚଳ ଅବସ୍ଥାରେ ରହିଛି। ଆଦିବାସୀ ଗାଁରେ ବର୍ତ୍ତମାନ ଗୋଟିଏ ନଳକୂପ ଥିଲେ ମଧ୍ୟ ଜଳସ୍ତର ହ୍ରାସ ପାଉଥିବାରୁ ଲୋକେ ଆବଶ୍ୟକ ପାଣି ପାଇପାରୁ ନାହାନ୍ତି। ସେହିପରି ଟାଙ୍ଗନକଣା ଗାଁର ସୋଲାର ପାଣି ଟାଙ୍କି ଫାଟି ୨ ବର୍ଷ ହେଲା ଅଭିଯୋଗ ପରେ ବି କେହି ଶୁଣୁ ନ ଥିବା ଗାଁ ଲୋକେ କହୁଛନ୍ତି। ବାତେଲିମା ପଞ୍ଚାୟତ ହରିଜନପଡା ଓ ଗଉଡ଼ ପଡ଼ାରେ ୧ ବର୍ଷ ହେଲା ବନ୍ଦ ପଡିଛି। ସେହିପରି ବସନ୍ତପଡା ପଞ୍ଚାୟତର ବୁଣ୍ଡେଲ ଗ୍ରାମରେ ମଧ୍ୟ ଶୌର ଶକ୍ତିର ମୋଟର ଖରାପ ଯୋଗୁ ୩ ବର୍ଷ ହେଲା ଜଳଯୋଗାଣ ବନ୍ଦ ରହିଥିବା ଅଭିଯୋଗ ପରେ ମଧ୍ୟ କେହି ଶୁଣି ନ ଥିବା ଗାଁ ଲୋକେ କହିଛନ୍ତି। ବସନ୍ତପଡାର ମାଝି ସାହିର ମଧ୍ୟ ୩ ବର୍ଷ ହେଲା ବନ୍ଦ ରହିଛି। ସେଠାରେ ମୋଟର ମଧ୍ୟ ସଂଯୋଗ କରାଯାଇନାହିଁ। ସେହିପରି ମାଳି ପାଡାରେ ମଧ୍ୟ ୧ ବର୍ଷ ହେଲା ଅଚଳ ଅବସ୍ଥାରେ ରହିଛି। ସେହିପରି ଜଗନ୍ନାଥପୁର ପଞ୍ଚାୟତଠାରେ ସ୍କୁଲପଡା, ମଝିପଡା ଓ ଗାଁ ମୁଣ୍ଡରେ ଥିବା ୩ଟି ସୋଲାର ପମ୍ପ ୧ ବର୍ଷ ହେଲା ଅଚଳ ହୋଇପଡିଛି। ସେହିପରି ବଳଭଦ୍ରପୁର ସିମେଲ ଭଟାଉପର ପଡ଼ାରେ ମଧ୍ୟ ୨ ବର୍ଷ ହେଲା ଅଚଳ ଅବସ୍ଥାରେ ରହିଛି। ବ୍ଲକ ଦାୟିତ୍ୱରେ ଥିବା ଯନ୍ତ୍ରୀ ଓ କର୍ମଚାରୀ ବାରମ୍ବାର ଆସି ନଳକୂପ ଦେଖି ପ୍ରତିଶ୍ରୁତି ଦେଇ ଯାଉଛନ୍ତି। କିନ୍ତୁ ବର୍ତ୍ତମାନ ମଧ୍ୟ ମରାମତି କରାଯାଇ ନାହିଁ। ସେହିପରି ଦୁର୍ଗମଅଞ୍ଚଳ ପାହାଡ଼ପଦର ପଞ୍ଚାୟତର ମଦନଗୁଡା ଗାଁରେ ୨ ବର୍ଷ ହେଲା ଅଚଳ ଭାବେ ପଡିରହିଛି। ସେହିପରି କଦମଗୁଡା ପଞ୍ଚାୟତ ବଲାପଦରଠାରେ ମଧ୍ୟ ଢେଡ଼ ବର୍ଷ ହେଲା ଅଚଳ ହୋଇରହିଛି। ଲାଞ୍ଜିଗଡରୋଡ଼ ପଞ୍ଚାୟତର ସର୍ଗିଗୁଡା ଗାଁରେ ମଧ୍ୟ ୨ ବର୍ଷ ହେଲା ଅଚଳ ଅବସ୍ଥାରେ ରହିଛି। ବର୍ଷବର୍ଷ ଧରି ବ୍ଲକରେ ଜଳ ଯୋଗାଣ ବନ୍ଦ ଥିବାରୁ ଲୋକେ ନାହିଁ ନ ଥିବା ଅସୁବିଧା ସମ୍ମୁଖୀନ ହେଉଛନ୍ତି। ଅନ୍ୟପକ୍ଷେ ୫ ବର୍ଷ ହେଲା ବ୍ଲକ ବିଭିନ୍ନ ସ୍ଥାନରେ ୧୦୦ରୁ ଊର୍ଦ୍ଧ୍ୱ ସୋଲାର ପାଣି ଟାଙ୍କି ପାନୀୟ ଜଳ ଯୋଗାଣ ପାଇଁ ସ୍ଥାପନ କରାଯାଇଛି। ହେଲେ ଲୋକେ ସୁଫଳ ପାଇବାରୁ ବଞ୍ଚିତ ହେଉଛନ୍ତି। ଆଗକୁ ଖରାଦିନ ଆସୁଥିବାରୁ ଏହି ସବୁ ଅଞ୍ଚଳରେ ପ୍ରଶାସନ ବିକଳ୍ପ ବ୍ୟବସ୍ଥା କରିବାକୁ ସାଧାରଣରେ ଦାବି ହେଉଛି।
