ଲଣ୍ଡନ୍, ୨ା୩: ରୁଷିଆର ବର୍ବର ଆକ୍ରମଣ ରୋକିବାକୁ ୟୁକ୍ରେନ୍ର ଜଣେ ସାମାଜିକକର୍ମୀ ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନ୍ସନ୍ଙ୍କ ଆଗରେ ଦାବି କରିଛନ୍ତି। ବୋରିସ୍ ପୋଲାଣ୍ଡରେ ଖବରଦାତାଙ୍କ ସହ କଥା ହେଉଥିବାବେଳେ ବେସରକାରୀ ସଙ୍ଗଠନ ଆଣ୍ଟି-କରପ୍ଶନ୍ ଆକ୍ସନ ସେଣ୍ଟରର ଡାରିଆ କାଲେନିକ୍ ସେଠାରେ ତାଙ୍କ ସମ୍ମୁଖରେ କାନ୍ଦି ପକାଇଥିଲେ। ରୁଷିଆ ଆକ୍ରମଣକୁ ରୋକିବା ପାଇଁ ୟୁକ୍ରେନ୍କୁ ତୁରନ୍ତ ନୋ-ଫ୍ଲାଏ ଜୋନ୍ କରିବାକୁ ସେ ନିବେଦନ କରିଥିଲେ। ଡାରିଆ କାଲେନିକ୍ କହିଥିଲେ, ୟୁକ୍ରେନ୍ ଉପରେ ଘନଘନ କ୍ଷେପଣାସ୍ତ୍ର, ବୋମା ମାଡ଼ କରାଯାଉଥିବାରୁ ସାଧାରଣ ନାଗରିକ ଭୟଭୀତ ଅବସ୍ଥାରେ ଅଛନ୍ତି। ମହିଳା ଓ ଛୋଟ ପିଲାମାନେ ସେଠାରେ ସମ୍ପୂର୍ଣ୍ଣ ଅସୁରକ୍ଷିତ। ଦେଶର ସୁରକ୍ଷା ପାଇଁ ପ୍ରତ୍ୟେକ ୟୁକ୍ରେନ୍ବାସୀ ବ୍ୟାକୁଳ। ପାଶ୍ଚାତ୍ୟଦେଶକୁ ସେମାନେ କ୍ରମାଗତ ସହାୟତା ମାଗୁଛନ୍ତି। ବୁଦାପେଷ୍ଟ ଚୁକ୍ତି ଅନୁସାରେ ବ୍ରିଟେନ ୟୁକ୍ରେନକୁ ସହାୟତା ଗ୍ୟାରେଣ୍ଟି ଦେଇଥିଲା। ପ୍ରଧାନମନ୍ତ୍ରୀ ବୋରିସ୍ ପୋଲାଣ୍ଡକୁ ଆସିପାରୁଛନ୍ତି କିନ୍ତୁ କ୍ୱିଭ୍କୁ ନୁହେଁ। କାରଣ ସେ ଭୟଭୀତ। ଏପରି ନ କରି ବ୍ରିଟେନକୁ ଅଧିକ ସହଯୋଗ କରନ୍ତୁ ବୋଲି ଡାରିଆ କହିଥିଲେ। ଜବାବରେ ବୋରିସ୍ କହିଥିଲେ, ବ୍ରିଟେନ ସରକାର ତାହା କରିବାକୁ ଅସମର୍ଥ। ୟୁକ୍ରେନ୍କୁ ନୋ-ଫ୍ଲାଏ ଜୋନ୍ କରିବା ଫଳରେ ବ୍ରିଟେନ ରୁଷିଆର ଯୁଦ୍ଧଜାହାଜକୁ ଖସାଇବାରେ ସାମିଲ ହେବ। ଏହା ଦ୍ୱାରା ରୁଷିଆ ସହ ବ୍ରିଟେନ୍ ପ୍ରତ୍ୟକ୍ଷ ଯୁଦ୍ଧକୁ ଓହ୍ଲାଇବ, ଯାହା ସେ ଚାହୁଁନାହାନ୍ତି।
