କେନ୍ଦୁଝର, ୨୧ା୭(ସ୍ବ.ପ୍ର.)- କେନ୍ଦୁଝର ଜିଲାର ଗରିବ ଓ ବନବାସୀ କରୋନା କଟକଣାରେ ପେଷି ହୋଇ ପଡ଼ିଛନ୍ତି। କଟକଣା କୋହଳ କରାଯାଉଥିଲେ ହେଁ ଉପଯୁକ୍ତ ଯାତାୟାତ ସୁବିଧା ନ ଥିବା ଏବଂ ପ୍ରଶାସନିକ ନିଷ୍ପତ୍ତି ବିଷୟରେ ଜାଣିପାରୁ ନ ଥିବା କାରଣରୁ ସେମାନଙ୍କ ଜୀବନଜୀବିକା ସୁଧୁରୁନି। ଏବେ ଶନିବାର ଓ ରବିବାର ଶଟ୍ଡାଉନ ଘୋଷଣା ହେବା ପରେ ଚାଲି ଚାଲି ଆସି ବିକ୍ରିବଟା କରୁଥିବା ବନବାସୀଙ୍କ ରୋଜଗାର ଠପ୍ ହୋଇ ଯାଇଛି ା ପ୍ରତ୍ୟେକ ଦିନ ଏହି ବନବାସୀମାନେ ବିଭିନ୍ନ ପ୍ରକାର ବନଜାତ ଦ୍ରବ୍ୟ ଯଥା କାଠ, ଦାନ୍ତକାଠି, ପତ୍ର, ଫଳମୂଳ, କୋଳି, ପାହାଡ଼ିଆ ପନିପରିବା, ଛତୁ, ଫୁଲ, ଝୁଣା, ମହୁଲ, ଶାଳ ମଞ୍ଜି, ଟୁଳ, କାଇ, କୁରୁକୁଟି ଭଳି ଖାଦ୍ୟ ଉପେଯାଗୀ କୀଟପତଙ୍ଗ ଆଣି ସହର ଓ ଗ୍ରାମାଞ୍ଚଳ ହାଟବଜାରରେ ବିକି ଦି’ପଇସା ରୋଜଗାର କରିଥାନ୍ତି। ସେଥିରେ ତେଲ, ଲୁଣ, ଲୁଗାପଟା ଆଦି କିଣି ନେଇ ଚଳନ୍ତି। ତେବେ କରୋନା କଟକଣା ଯୋଗୁ ସେମାନେ ବିକ୍ରିବଟା କରିପାରୁ ନ ଥିବାରୁ ଆର୍ଥିକ ସଙ୍କଟ ମଧ୍ୟରେ ରହୁଛନ୍ତି।
ଉଲ୍ଲେଖଯୋଗ୍ୟ ଯେ, କେନ୍ଦୁଝର ଜିଲାର ୧୩ଟି ବ୍ଲକ ମଧ୍ୟରୁ ୧୦ଟି ବ୍ଲକ ଆଦିବାସୀ ବହୁଳ। ବଣପାହାଡ଼ ଘେରା ଗ୍ରାମର ଅଧିବାସୀମାନେ ଜୀବନଜୀବିକା ପାଇଁ ବିଶେଷ କରି ଜଙ୍ଗଲ ଓ ପାହାଡ଼ ଉପରେ ନିର୍ଭରଶୀଳ। ବହୁ ଲୋକ ଚାଲି ଚାଲି ଆସନ୍ତି କିନ୍ତୁ ଅନେକ ଲୋକ ବସ୍, ଅଟୋ ଆଦି ଉପରେ ନିର୍ଭରଶୀଳ। ତେବେ ସେସବୁ ଚଳାଚଳ ହେଉ ନ ଥିବାରୁ ଅନେକ ସେମାନଙ୍କ ଉତ୍ପାଦିତ ବା ସଂଗୃହୀତ ସାମଗ୍ରୀ ଧରି ହାଟବଜାରକୁ ଆସି ପାରୁ ନାହାନ୍ତି। ଏଣୁ ଅନେକ ଫଳମୂଳ, ପନିପରିବା ବିକ୍ରିବଟା ହୋଇ ନ ପାରି ନଷ୍ଟ ହେଉଛି। ଅନେକ ସମୟରେ ବେପାରୀ ପହଞ୍ଚତ୍ ବହୁତ କମ୍ ଦରରେ ଆଣି ହାଟବଜାରରେ ଚଢା ଦରରେ ବିକୁଛନ୍ତି। ବେପାରୀ ମାଲାମାଲ ହେଉଥିବା ବେଳେ ବନବାସୀମାନେ ବହୁ ମାତ୍ରାରେ କ୍ଷତିଗ୍ରସ୍ତ ହେଉଛନ୍ତି। ପ୍ରଶାସନ ସେମାନଙ୍କ ସମସ୍ୟାକୁ ଅଣଦେଖା କରୁଛି ବୋଲି ଖବରଦାତା ତଥା ସାମାଜିକ କର୍ମୀ ପ୍ରଦୀପ ମହାନ୍ତି କହିଛନ୍ତି ା
ଆଦିବାସୀମାନେ ସବୁବେଳେ ଅବହେଳିତ ହୋଇ ରହୁଛନ୍ତି ା କରୋନା ସମୟରେ ସେମାନଙ୍କ ସମସ୍ୟା ଓ ଦୁଃଖ ବୁଝିବାକୁ କେହିନାହିଁ। ଏପରିକି ଲୋକ ପ୍ରତିନିଧିମାନେ ପରିଦର୍ଶନ କରୁ ନ ଥିବାରୁ ଜିଲା ପ୍ରଶାସନ ଏନେଇ ପଦକ୍ଷେପ ଗ୍ରହଣ କରିବା ଆବଶ୍ୟକତା ରହିଛି ବୋଲି ଆଦିବାସୀ ନେତା ତଥା ବରିଷ୍ଠ ଆଇନଜୀବୀ କୈଳାସ ନାୟକ କହିଛନ୍ତି। ଆଦିବାସୀମାନେ ହେଉଛନ୍ତି ସରଳ ଲୋକ ା ସରକାରୀ ନୀତିନିୟମକୁ ମାନିଥାନ୍ତି ା ଏଣୁ ଭୋକ ଉପାସରେ ରହୁଥିଲେ ହେଁ କଟକଣାକୁ ମାନି ଘରେ ରହିଛନ୍ତି। ଏଣୁ ସେମାନଙ୍କ ସମସ୍ୟାକୁ ପ୍ରଶାସନ ଗୁରୁତ୍ୱ ଦେଇ ଅନୁଧ୍ୟାନ କରିବା ଉଚିତ ବୋଲି ସାମାଜିକ କର୍ମୀ ଦୀପକ କୁମାର ପତି କହିଛନ୍ତି ା
କରୋନା କଟକଣା ଯୋଗୁ ଦୁର୍ଗମ ଅଞ୍ଚଳରେ ରହୁଥିବା ଆଦିବାସୀ ଅଧିକ କ୍ଷତିଗ୍ରସ୍ତ ହେଉଛନ୍ତି ା ଗାଡ଼ି ଚଳାଚଳ ହେଉ ନ ଥିବା ଏବଂ କଟକଣା ଲାଗି ଯାତାୟତ କରି ପାରୁନାହାନ୍ତି। କରୋନା କଟକଣା ଆଳରେ ସରକାରୀ ବାବୁମାନେ ଗ୍ରସ୍ତ କରୁ ନ ଥିବାରୁ ସେମାନଙ୍କ ସମସ୍ୟା ଅପହଞ୍ଚ ହୋଇ ରହିଛି ବୋଲି ବରିଷ୍ଠ ଆଇନଜୀବୀ ଚନ୍ଦନ ମିଶ୍ର କହିଛନ୍ତି।
