ନୂଆଦିଲ୍ଲୀ,୩ା୧୧: ୟୁଟ୍ୟୁବର ଏଲ୍ଭିଶ ଯାଦବ ବିଷାକ୍ତ ସାପ ଏବଂ ରେଭ୍ ପାର୍ଟି କରିବା ପ୍ରସଙ୍ଗରେ ନିଜର ପ୍ରଥମ ପ୍ରତିକ୍ରିୟା ଦେଇଛନ୍ତି। ସେ ତାଙ୍କ ସୋସିଆଲ ମିଡିଆ ପ୍ଲାଟ୍ଫର୍ମ ‘ X’ ରେ ଭିଡିଓ ଶେୟାର କରି କ୍ୟାପଶନ ଲେଖିଛନ୍ତି, ମୁଁ ଏଲ୍ଭିଶ ଯାଦବ। ମୁଁ ସକାଳେ ଉଠିଲି ଏବଂ ଦେଖିଲି ପୂରା ଗଣମାଧ୍ୟମରେ ମୋ’ ବିରୋଧରେ କି ପ୍ରକାର ଖବର ପ୍ରସାରିତ ହେଉଛି। ଏଲ୍ଭିଶଙ୍କୁ ଗିରଫ କରାଯାଇଛି, ଏଲ୍ଭିଶ ଡ୍ରଗ୍ସ କାରବାର କରି ଧରାପଡିଛନ୍ତି। ଏହିପରି କଥା ମୋ ବିରୋଧରେ ପ୍ରଚାର ପ୍ରସାର ହେଉଛି। ମୋ ବିରୋଧରେ କରାଯାଇଥିବା ସମସ୍ତ ଅଭିଯୋଗ ଭିତ୍ତିହୀନ।
ସେ ଆହୁରି ମଧ୍ୟ କହିଛନ୍ତି, ମୁଁ ୟୁପି ପୋଲିସ, ସମଗ୍ର ପ୍ରଶାସନ, ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଜୀଙ୍କୁ ଅନୁରୋଧ କରିବି, ଯଦି ମୋର ଏଥିରେ ଗୋଟିଏ ପ୍ରତିଶତ ଯୋଗଦାନ ଥାଏ ତେବେ ମୁଁ ସବୁକିଛି ଗ୍ରହଣ କରିବାକୁ ପ୍ରସ୍ତୁତ ଅଛି। ମିଡିଆ ମୋ ନାମରେ ଅପପ୍ରଚାର କରିବା ଉଚିତ ନୁହେଁ। ଯାହା ବି ଅଭିଯୋଗ ହେଉଛି ମୋର କୌଣସି ସମ୍ପର୍କ ନାହିଁ। ଯଦି ଏହା ପ୍ରମାଣିତ ହୁଏ ତେବେ ମୁଁ ଏଥିପାଇଁ ପ୍ରସ୍ତୁତ ରହିଛି। ପୋଲିସକୁ ସହଯୋଗ କରିବି।
