ଭୁବନେଶ୍ୱର,୨୯।୪ (ବନ୍ଦନା ସେଠୀ): ସ୍ମାର୍ଟସିଟି ଭୁବନେଶ୍ୱରକୁ ଭିକାରୀ ଏବଂ ଯାଯାବର (ବଞ୍ଜାରା)ମୁକ୍ତ କରିବାକୁ ଅଭିଯାନ ଆରମ୍ଭ କରିଥିଲା ବିଏମ୍ସି। ଯଦିଓ ପୂର୍ବଭଳି ସବୁ ମନ୍ଦିର ଆଗରେ ଭିକ୍ଷୁକମାନେ ବସୁ ନାହାନ୍ତି, ତଥାପି ଏବେ ବି ଅନେକ ସ୍ଥାନରେ ଭିକାରୀ ଭିକ୍ଷାବୃତ୍ତି କରୁଥିବା ଦେଖାଯାଉଛି। ସେହିପରି ସହରରେ ବଞ୍ଜାରାମାନଙ୍କର ପ୍ରାର୍ଦୁଭାବ ଲୋପ କରିବା ପାଇଁ ବିଏମ୍ସି ଓ କମିଶନରରେଟ୍ ପୋଲିସ ପକ୍ଷରୁ ସ୍ବତନ୍ତ୍ର ଅଭିଯାନ ଆରମ୍ଭ ହୋଇଥିଲା। ଏହି କ୍ରମରେ ବଞ୍ଜାରାମାନଙ୍କୁ ଭିକ୍ଷାବୃତ୍ତିରୁ ବାରଣ କରିବା ସହ ନିଜନିଜ ରାଜ୍ୟକୁ ଫେରିଯିବା ପାଇଁ ତାଗିଦ୍ କରାଯାଇଥିଲା। ତେବେ ପ୍ରାୟ ୨ବର୍ଷ ତଳୁ ଆରମ୍ଭ ହୋଇଥିବା ଏହି ଦୁଇ ଅଭିଯାନ ଏବେ ଦିଗହରା ହୋଇପଡିଛି। ସହରର ବିଭିନ୍ନ ଅଞ୍ଚଳରେ ଲୋକମାନେ ଭିକ୍ଷାବୃତ୍ତି କରୁଥିବାବେଳେ ପଟିଆ, ମାଷ୍ଟରକ୍ୟାଣ୍ଟିନ, ଖଣ୍ଡଗିରି, ରସୁଲଗଡ, ଜୟଦେବ ବିହାର ଭଳି ମୁଖ୍ୟ ରାସ୍ତା ଏବଂ ଓଭରବ୍ରିଜ୍ ତଳେ ବଞ୍ଜାରାମାନଙ୍କୁ ଦେଖିବାକୁ ମିଳୁଛି। ରାଜସ୍ଥାନ, ଉତ୍ତରପ୍ରଦେଶ, ମଧ୍ୟପ୍ରଦେଶ, ପଶ୍ଚିମବଙ୍ଗ, ବିହାର ଭଳି ରାଜ୍ୟରୁ ଆସି ଏଠାରେ ଆସ୍ଥାନ ଜମାଉଛନ୍ତି। ପିଲାଙ୍କୁ ଭିକ୍ଷାବୃତ୍ତିରେ ଲଗାଇ ଟ୍ରାଫିକ୍ ସମସ୍ୟା ସୃଷ୍ଟି କରିବା ସହ ଆଖପାଖ ଅଞ୍ଚଳ ଅପରିଷ୍କାର କରୁଛନ୍ତି। ଏପରିକି ଏଭଳି ପ୍ରଚଣ୍ଡ ଖରାରେ ମଧ୍ୟ ଛୋଟଛୋଟ କୋମଳମତି ଶିଶୁଙ୍କୁ ଧରି ମହିଳାମାନେ ଭିକ୍ଷା ମାଗୁଥିବା ଦେଖିବାକୁ ମିଳୁଛି। କିଛି ପଇସା ପାଇଁ ଛୋଟ ପିଲାଙ୍କ ଜୀବନ ବାଜିରେ ଲଗାଇବାକୁ ଏମାନେ ପଛାଉ ନାହାନ୍ତି। କେବଳ ସେତିକି ନୁହେଁ, କିନ୍ନରମାନଙ୍କୁ ଭିକ୍ଷାବୃତ୍ତିରୁ ଦୂରେଇ ରଖିବା ପାଇଁ ହେଉଥିବା ବିଭିନ୍ନ ଯୋଜନା ମଧ୍ୟ ଏକ ପ୍ରକାର ଫେଲ୍ ମାରିଛି। ଭିକ୍ଷାବୃତ୍ତି କରୁଥିବା କିନ୍ନରମାନଙ୍କୁ ଥଇଥାନ କରିବା ଏବଂ ସେମାନଙ୍କ ଦକ୍ଷତା ବିକାଶ କରିବା ପାଇଁ ବିଏମ୍ସି କରିଥିବା ଯୋଜନା ଏବେ ମଧ୍ୟ ନାଲି ଫିତା ତଳେ ଚାପିହୋଇ ରହିଛି। ଫଳରେ କିଛିଜଣଙ୍କୁ ଛାଡିଦେଲେ ଅନେକ କିନ୍ନର ସହରର ବିଭିନ୍ନ ପାର୍କ, ମାର୍କେଟ୍ ଆଦି ଅଞ୍ଚଳରେ ଭିକ୍ଷାବୃତ୍ତି କରୁଥିବା ଦେଖାଯାଉଛି। ଯାହାଦ୍ୱାରା ସ୍ମାର୍ଟସିଟିର ଛବି ମଳିନ ହେଉଛି।
ବିଏମ୍ସିର ଜଣେ ଅଧିକାରୀଙ୍କ ସୂଚନା ଅନୁଯାୟୀ, ଭିକାରୀଙ୍କ ପାଇଁ ସହରର ୩ଟି ସ୍ଥାନରେ ୫ଟି ଆଶ୍ରୟସ୍ଥଳ ନିର୍ମାଣ କରାଯାଇଛି। ମହିଳା ଓ ଛୋଟପିଲାଙ୍କ ପାଇଁ ନୀଳାଦ୍ରୀ ବିହାରରେ ସ୍ବତନ୍ତ୍ର ଆଶ୍ରୟସ୍ଥଳ ନିର୍ମିତ ହୋଇଛି। ବିଭିନ୍ନ ଅଞ୍ଚଳରୁ ଭିକାରୀମାନଙ୍କୁ ଉଦ୍ଧାର କରି ଆଶ୍ରୟସ୍ଥଳରେ ରଖିବା ତଥା ସେମାନଙ୍କର ଯତ୍ନ ନେବାପାଇଁ ୩ଟି ସ୍ବେଚ୍ଛାସେବୀ ସଂସ୍ଥା ‘ବିକାଶ’, ‘ବିଜେଏସ୍ଏସ୍’ ଏବଂ ‘ଓଡ଼ିଶା ପତିତ ଉଦ୍ଧାର ସମିତି’କୁ ନିୟୋଜିତ କରାଯାଇଛି। ସେହିପରି ବଞ୍ଜାରାମାନଙ୍କ ପାଇଁ ଯେପରି କୌଣସି ସମସ୍ୟା ସୃଷ୍ଟି ନ ହୁଏ ସେଥିପ୍ରତି ଦୃଷ୍ଟି ଦିଆଯାଉଛି। ଭିକ୍ଷୁକ ବସୁଥିବାର ଖବର ମିଳିଲେ, ସ୍ବେଚ୍ଛାସେବୀ ସଂଗଠନର କର୍ମକର୍ତ୍ତାମାନେ ସେଠାକୁ ଯାଇ ତାଙ୍କୁ ଆଶ୍ରୟସ୍ଥଳକୁ ଆଣୁଛନ୍ତି। ତେବେ ଅଧିକାଂଶ ସମୟରେ ଦେଖା ଯାଉଛି ଯେ ଭିକାରିମାନେ କାହାକୁ କିଛି ନ କହି ହଠାତ୍ ଚାଲି ଯାଉଛନ୍ତି। ତେଣୁ ଭୁବନେଶ୍ୱରକୁ ଭିକ୍ଷୁକମୁକ୍ତ କରିବାରେ କିଛିଟା ସମସ୍ୟା ଦେଖା ଦେଉଛି। ତେବେ ଗତ ୩ବର୍ଷ ମଧ୍ୟରେ ବିଏମ୍ସି ୬ଶହ ଭିକାରୀଙ୍କୁ ସେମାନଙ୍କ ପରିବାର ସହିତ ମିଶାଇବାରେ ସଫଳ ହୋଇଥିବା ସେ ସୂଚନା ଦେଇଛନ୍ତି।
