ଭୁବନେଶ୍ୱର, ୨୭।୯(ବ୍ୟୁରୋ):ସର୍ବଭାରତୀୟ ମହାତ୍ମା ଗାନ୍ଧୀ ଜାତୀୟ ଫେଲୋଙ୍କୁ ନେଇ ୱାର୍ଲଡ୍ ସ୍କିଲ ସେଣ୍ଟରରେ ଦୁଇଦିନିଆ କର୍ମଶାଳା ଅନୁଷ୍ଠିତ ହୋଇଯାଇଛି। ରାଜ୍ୟରେ କାର୍ଯ୍ୟକାରୀ ହେଉଥିବା ବିଭିନ୍ନ ଦକ୍ଷତା ବିକାଶ କାର୍ଯ୍ୟକ୍ରମ ସମ୍ପର୍କରେ ଏଠାରେ ଆଲୋଚନା ହୋଇଥିଲା। ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଅଧ୍ୟକ୍ଷ ସୁବ୍ରତ ବାଗ୍ଚୀ ମୁଖ୍ୟଅତିଥି ଭାବେ ଯୋଗଦେଇ ୬ବର୍ଷର ଓଡ଼ିଶାର ଦକ୍ଷତା ବିକାଶ ଯାତ୍ରା ସମ୍ପର୍କରେ କହିଥିଲେ। ସେ କହିଲେ, ଓ୍ବାର୍ଲଡ ସ୍କିଲ୍ ସେଣ୍ଟର ମାଧ୍ୟମରେ ୨୦୨୬ ସୁଦ୍ଧା ରାଜ୍ୟର ୧୫ଲକ୍ଷ ଯୁବଗୋଷ୍ଠୀ ନିଯୁକ୍ତି ପାଇବେ। ଦେଢ଼ଲକ୍ଷ ଯୁବଗୋଷ୍ଠୀ ପ୍ରତ୍ୟକ୍ଷ ବା ପରୋକ୍ଷ ଭାବେ ନିଯୁକ୍ତି ପାଇବେ। ରାଜ୍ୟରେ କୃଷି କ୍ଷେତ୍ରରେ ପ୍ରଯୁକ୍ତିବିଦ୍ୟାର ପ୍ରୟୋଗ ସହ ଉପତ୍ାଦନ ବୃଦ୍ଧି ନିମନ୍ତେ ଲକ୍ଷ୍ୟ ରଖାଯାଇଛି। ତେଣୁ ବର୍ତ୍ତମାନ ଓଡ଼ିଶାର କୃଷି କ୍ଷେତ୍ରରେ ଦକ୍ଷତା ବିକାଶକୁ ପ୍ରୋତ୍ସାହିତ କରାଯିବ ବୋଲି ବାଗ୍ଚୀ କହିଛନ୍ତି।
ବେଙ୍ଗାଲୁରୁର ପ୍ରଫେସର ଶଙ୍କରନ୍ ବାସୁ ଏବଂ ପ୍ରଫେସର ଅର୍ଣ୍ଣବ ମୁଖାର୍ଜୀ ଏହି ଫେଲୋଶିପ ବିଷୟରେ ବିସ୍ତୃତ ବିବରଣୀ ରଖିଥିଲେ। ହସ୍ତତନ୍ତ, ବୟନ ଓ ହସ୍ତଶିଳ୍ପ କ୍ଷେତ୍ରରେ ଦକ୍ଷତା ବିକାଶ କାର୍ଯ୍ୟକ୍ରମକୁ କାର୍ଯ୍ୟକାରୀ କରିବାରେ କ’ଣ ସବୁ ଆହ୍ବାନ ରହୁଛି, ସେ ସମ୍ପର୍କରେ ମହିଳା ଓ ଶିଶୁ ବିକାଶ କମିଶନର ଶୁଭା ଶର୍ମା କହିଥିଲେ। ଓଏମ୍ସି ପରିଚାଳନା ନିର୍ଦ୍ଦେଶକ ବଲୱନ୍ତ ସିଂ ତୃଣମୂଳ ସ୍ତରରେ କିଭଳି ଭାବେ ଯୋଜନା ପ୍ରଣୟନ କରାଯିବ ଏବଂ ତାହାକୁ କିଭଳି ସଫଳ ରୂପେ କାର୍ଯ୍ୟକାରୀ କରାଯାଇ ନିଯୁକ୍ତି ସୁଯୋଗ ସୃଷ୍ଟି କରାଯିବା, ତା’ ଉପରେ ଆଲୋକପାତ କରିଥିଲେ। ଓଏସ୍ଡିଏ ସିଇଓ ରେଘୁ ଜି ଏବଂ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ଅତିରିକ୍ତ ସଚିବ ପିନାକୀ ପଟ୍ଟନାୟକ ଉପସ୍ଥିତ ଥିଲେ।
ମହାତ୍ମା ଗାନ୍ଧୀ ଜାତୀୟ ଫେଲୋଶିପ କାର୍ଯ୍ୟକ୍ରମ ଭାରତ ସରକାରଙ୍କ ଦକ୍ଷତା ବିକାଶ ଏବଂ ଉଦ୍ୟୋଗ ମନ୍ତ୍ରଣାଳୟ ଦ୍ୱାରା ପରିକଳ୍ପନା କରାଯାଇଛି। ଓଡ଼ିଶାରେ ରାଜ୍ୟ ଦକ୍ଷତା ବିକାଶ ମିଶନ ସହଯୋଗରେ ଏହାକୁ କାର୍ଯ୍ୟକାରୀ କରାଯାଉଛି। ରାଜ୍ୟର ପ୍ରତ୍ୟେକ ଜିଲାରେ ଜଣେ ଲେଖାଏ ମୋଟ ୩୦ଜଣ ମହାତ୍ମା ଗାନ୍ଧୀ ଜାତୀୟ ଫେଲୋ କାର୍ଯ୍ୟ କରୁଛନ୍ତି। ଗ୍ରାମାଞ୍ଚଳରେ ରୋଜଗାର, ଅର୍ଥନୈତିକ ଉପତ୍ାଦନ ବୃଦ୍ଧି ତଥା ଜୀବିକା ନିର୍ବାହରେ ପ୍ରତିବନ୍ଧକ ଚିହ୍ନଟ କରି ଯୋଜନା ପ୍ରସ୍ତୁତ କରିବା ପାଇଁ ଏହି ଅଧିକାରୀମାନେ ଲୋକନୀତି ଓ ପରିଚାଳନା କ୍ଷେତ୍ରରେ ଦୁଇବର୍ଷର ତାଲିମ ନେଇଥାନ୍ତି।
