ଭଞ୍ଜନଗର,୮।୬(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ତାରସିଂ ରେଞ୍ଜ ଗାୟଗଣ୍ଡା ନିକଟସ୍ଥ ପାଇଛାଲିଆ ଘଞ୍ଚ ଜଙ୍ଗଲ ଭିତରୁ ସୋମବାର ଏକ ହାତୀ ଛୁଆର କଙ୍କାଳ ବନ ବିଭାଗ ପକ୍ଷରୁ ଜବତ କରାଯାଇଛି। ହାତୀ ଛୁଆଟି ଗତ ମାର୍ଚ୍ଚ ମାସରେ ମୃତ୍ୟୁବରଣ କରିଥିଲା।
ପ୍ରାଣୀ ବିଶେଷଜ୍ଞମାନେ ହାତୀର କଙ୍କାଳ ଓ କିଛି ଚମଡ଼ାକୁ ଯାଞ୍ଚ କରିଥିଲେ। ଏହାପରେ ଅଧିକ ପରୀକ୍ଷା ପାଇଁ ହାଡ଼, ଚମଡ଼ା, ଦାନ୍ତକୁ ପରୀକ୍ଷା ପାଇଁ ଭୁବନେଶର ଓୟୁଏଟିକୁ ପଠାଇବା ବ୍ୟବସ୍ଥା କରାଯାଇଛି। ଏଥିସହ ଡିଏଫଓ ହିମାଂଶୁ ଶେଖର ମହାନ୍ତି, ରେଞ୍ଜର ପ୍ରଶାନ୍ତ ବେହେରା ପ୍ରମୁଖ ଘଟଣାର ଅଧିକ ତଦନ୍ତ ଚଳାଇଛନ୍ତି ମୃତ ହାତୀ ଛୁଆଟି ମାଈ ହାତୀ। କିନ୍ତୁ ହାତୀଟି ମାର୍ଚ୍ଚ ମାସରେ ମୃତ୍ୟୁବରଣ କରିଥିବା ଜଣାପଡ଼ିଛି। ତେବେ କେଉଁ କାରଣରୁ ମୃତ୍ୟୁବରଣ କରିଛି ସଠିକ ଜଣାପଡ଼ିନାହିଁ।
ସୂଚନାଯୋଗ୍ୟ, ଏହି ରେଞ୍ଜର ଗାୟଗଣ୍ଡା ନିକଟରେ ଗତ ମାସ ୧୦ ତାରିଖରେ ଗୋଟିଏ ୧୧ ବର୍ଷର ମାଇ ହାତୀ ଅସୁସ୍ଥତା ଯୋଗୁ ମୃତ୍ୟୁବରଣ କରିଥିଲା। ଏହି ଘଟଣା ପୂର୍ବରୁ ଆଉ ଗୋଟିଏ ହାତୀ ଛୁଆ ପାଇଛାଲିଆ ଜଙ୍ଗଲରେ ମୃତ୍ୟୁବରଣ କରିଥିଲା। କିନ୍ତୁ ତାହା ଲୋକ ଲୋଚନକୁ ଆସିପାରି ନ ଥିଲା । ଗତକାଲି ଜଣେ ଛେଳି ଚରାଳି ଜଙ୍ଗଲକୁ ଛେଳି ଚରାଇବାକୁ ଯାଇଥିବାବେଳେ ହାତୀ କଙ୍କାଳ ଦେଖି ଗ୍ରାମରେ କହିଥିଲେ। ଏହାପରେ କଥା ଯାଇ ବନ ବିଭାଗ ପାଖରେ ପହଞ୍ଚିଥିଲା। ଆଜି ବନ ବିଭାଗ ଅଧିକାରୀ ଏବଂ ଡାକ୍ତର ଟିମ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଥିଲେ। ଏହାପରେ ସେଠାରେ କଙ୍କାଳକୁ ପୋତି ଦିଆଯାଇଛି। ଉକ୍ତ ହାତୀର ମାଂସ ଓ ଚମଡ଼ାକୁ କଲରାପତରିଆ ବାଘ ଖାଇଥିବା ପ୍ରମାଣ ସେଠାରୁ ମିଳୁଛି।
ବନ ବିଭାଗ କର୍ମଚାରୀ ଆଜି ଘଟଣାସ୍ଥଳକୁ ଯାଇଥିବା ସମୟରେ ବାଘର ଏକାଧିକ ପାଦ ଚିହ୍ନ ସେଠାରେ ଦେଖିବାକୁ ପାଇଛନ୍ତି। କିନ୍ତୁ ହାତୀଟି କେଉଁଭଳି ପରିସ୍ଥିତିରେ ମୃତ୍ୟୁବରଣ କରିଛି ସେନେଇ କିଛି ସ୍ପଷ୍ଟ ସୂଚନା ମିଳିନାହିଁ। ଏଥିସହ ଆଉ ଏକ ମାଇ ହାତୀ ଗାୟଗଣ୍ଡା ନିକଟସ୍ଥ ଭୋଗରା ଜଙ୍ଗଲରେ ଗତ ମାର୍ଚ୍ଚ ମାସ ୧୦ ତାରିଖରେ ମୃତ୍ୟୁବରଣ କରିଥିବା ଜଣାପଡ଼ିଥିଲା।
ତାରସିଂ ରେଞ୍ଜରେ ବିଗତ ୩ ମାସ ମଧ୍ୟରେ ୩ଟି ହାତୀ ମୃତ୍ୟୁବରଣ କରିଥିବା ଜଣାପଡିଛି । ସମସ୍ତ ୩ଟି ଯାକ ହାତୀ ରୋଗ ଯୋଗୁ ମୃତ୍ୟୁବରଣ କରିଥିବା ଆଶଙ୍କା କରାଯାଉଛି। ଫଳରେ ହାତୀ ସଂଖ୍ୟା ଉକ୍ତ ରେଞ୍ଜରେ କମୁଛି। ଯାହାକି ଚିନ୍ତାଜନକ ବିଷୟ।
Dharitri – Odisha’s No.1 Odia Daily
