କଲମ୍ବୋ,୯ା୪(ପି.ଟି.): ଶ୍ରୀଲଙ୍କାରେ ଗମ୍ଭୀର ଆର୍ଥତ୍କ ସଙ୍କଟ ଯୋଗୁ ସାଧାରଣ ଲୋକେ ନାହିଁ ନ ଥିବା ହୀନସ୍ଥା ହେଉଛନ୍ତି। ଲୋକଙ୍କ ସମସ୍ୟା ଦୂର କରିବାରେ ରାଷ୍ଟ୍ରପତି ଗୋଟାବାୟା ରାଜପାକ୍ସେଙ୍କ ସରକାର ବିଫଳ ହେଲେ ଅନାସ୍ଥା ପ୍ରସ୍ତାବ ଅଣାଯିବ ବୋଲି ଶ୍ରୀଲଙ୍କାର ମୁଖ୍ୟ ବିରୋଧୀ ଦଳ ଏସ୍ଜେବି ଶୁକ୍ରବାର ଘୋଷଣା କରିଛି। ରାଷ୍ଟ୍ରପତି ଶାସନ ଉଚ୍ଛେଦ କରାଯାଇ କ୍ଷମତାକୁ କାର୍ଯ୍ୟପାଳିକା, ବ୍ୟବସ୍ଥାପକ ଏବଂ ନ୍ୟାୟପାଳିକା ମଧ୍ୟରେ ଭାଗ ଭାଗ କରିବା ଲାଗି ବିରୋଧୀ ଦଳ ନେତା ସାଜିଥ ପ୍ରେମଦାସା ଆହ୍ବାନ ଦେଇଛନ୍ତି। ଦେଶରେ ରାଜପାକ୍ସେ ଇସ୍ତଫା ଦାବି ଜୋର୍ ଧରିଥିବାବେଳେ ସରକାର ଏହାକୁ ଏଡ଼ାଇ ଯାଇପାରିବେ ନାହିଁ। ଯଦି ସରକାର ଇସ୍ତଫା ନ ଦିଅନ୍ତି, ତେବେ ଅନାସ୍ଥା ପ୍ରସ୍ତାବ ଅଣାଯିବ ବୋଲି ସମାଗି ଜନ ବଲଓ୍ବେଗୟା (ଏସ୍ଜେବି) ନେତା ପାର୍ଲାମେଣ୍ଟରେ କହିଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ ଅନାସ୍ଥା ପ୍ରସ୍ତାବ ଆଣିବା ଲାଗି ଏସ୍ଜେବି ଏମ୍ପିମାନଙ୍କଠାରୁ ଦସ୍ତଖତ ସଂଗ୍ରହ କରୁଛି।
ଦେଶରେ ମିଳିତ ସରକାର ଗଠନ ଲାଗି ଗୋଟାବାୟା ପୂର୍ବରୁ ପ୍ରସ୍ତାବ ଦେଇଥିଲେ। କିନ୍ତୁ ମୁଖ୍ୟ ବିରୋଧୀ ଦଳ ଏହାକୁ ପ୍ରତ୍ୟାଖ୍ୟାନ କରିଦେଇଥିଲା। ଗୋଟାବାୟାଙ୍କ ରାଷ୍ଟ୍ରପତିତ୍ୱରେ ଅନ୍ତରୀଣ ସରକାରରେ ରହିବାକୁ ସେ ରାଜି ନୁହନ୍ତି ବୋଲି ପ୍ରେମଦାସା କହିଥିଲେ। ରାଷ୍ଟ୍ରପତିଙ୍କ ବିରୋଧରେ ମହାଭିଯୋଗ ଆଣିବାକୁ ଏସ୍ଜେବି ପ୍ରସ୍ତୁତି ଚଳାଇଛି। ଦେଶରୁ ଆର୍ଥିକ ସଙ୍କଟ ଦୂର କରିବା ଲାଗି ଏସ୍ଜେବି ପକ୍ଷରୁ ପ୍ରେମଦାସା ପାର୍ଲାମେଣ୍ଟରେ କେତେକ ପ୍ରସ୍ତାବ ଦେଇଥିଲେ।
ଦରଦାମ୍ ବୃଦ୍ଧି ଓ ବିଦ୍ୟୁତ୍ କାଟ୍କୁ ନେଇ ଅତିଷ୍ଠ ଲୋକେ ରାଷ୍ଟ୍ରପତି ଓ ତାଙ୍କ ପରିବାରର ଇସ୍ତଫା ଦାବିରେ ଦେଶବ୍ୟାପୀ ଆନ୍ଦୋଳନ ଚଳାଇଥିବାବେଳେ ବିରୋଧୀ ଦଳ ଏହାକୁ ସମର୍ଥନ ଜଣାଇଛି। ରାଷ୍ଟ୍ରପତି ଯଦି ଇସ୍ତଫା ନ ଦିଅନ୍ତି, ତେବେ ତାଙ୍କୁ ବହିଷ୍କାର କରିବା ଲାଗି ମହାଭିଯୋଗ ଅଣାଯିବା ଆବଶ୍ୟକ ବୋଲି ବିରୋଧୀ ଜେଭିପି ଏମ୍ପି ବିଜିଥା ହେରାଥ କହିଛନ୍ତି।
