ଢାକା, ୧୭।୫ : ଏବେ ବାଂଲାଦେଶରେ ଶ୍ରୀଲଙ୍କା ପରି ସଙ୍କଟ ଦେଖାଦେଇଛି। ଲଗାତାର ବାଂଲାଦେଶର ବିଦେଶୀ ମୁଦ୍ରା ଭଣ୍ଡାର ପରିମାଣ କମିବାରେ ଲାଗିଛି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳଠାରୁ ଆରମ୍ଭ କରି ଅନ୍ୟ ସମସ୍ତ ସାମଗ୍ରୀର ଦାମ ବଢ଼ିବାରେ ଲାଗିଛି।
ଏହା ସହିତ ବାଂଲାଦେଶର ଘରୋଇ ଖର୍ଚ୍ଚ ମଧ୍ୟ ବୃଦ୍ଧି ପାଉଛି। ୨୦୨୧ ଜୁଲାଇରୁ ୨୦୨୨ ମାର୍ଚ୍ଚ ମଧ୍ୟରେ ବାଂଲାଦେଶର ଖର୍ଚ୍ଚ ବଢ଼ିବା ଚାଲିଛି। ଆମଦାନୀ ଖର୍ଚ୍ଚ ବଢୁଥିବାବେଳେ ରପ୍ତାନୀ ଖର୍ଚ୍ଚ କମିବାରେ ଲାଗିଛି। ଫଳରେ ବିଦେଶୀ ମୁଦ୍ରା ଭଣ୍ଡାର କମିବା ଯୋଗୁ ଟ୍ରେଡ୍ ଡେଫିସିଟି ବୃଦ୍ଧି ପାଉଥିବା ଅର୍ଥମନ୍ତ୍ରଣାଳୟ ପକ୍ଷରୁ କୁହାଯାଇଛି। ଏନେଇ ସରକାରଙ୍କ ଚିନ୍ତା ବଢ଼ିବାରେ ଲାଗିଛି।
ଖବର ଅନୁଯାୟୀ ବୈଦେଶିକ ମୁଦ୍ରା ଭଣ୍ଡାରରେ ହ୍ରାସ ଘଟିଛି। ବୈଦେଶିକ ମୁଦ୍ରା ଭଣ୍ଡାର ପରିମାଣ ମାଧ୍ୟମରେ ଆମଦାନୀ ଆବଶ୍ୟକତା କେବଳ ୫ ମାସ ପୂରଣ ହୋଇପାରିବ। ଜୁଲାଇରୁ ମାର୍ଚ୍ଚ ୨୦୨୧-୨୨ ମଧ୍ୟରେ ବାଂଲାଦେଶ ୨୨ ବିଲିୟନ ଡଲାର ମୂଲ୍ୟର ଶିଳ୍ପ କଞ୍ଚାମାଲ ଆମଦାନୀ କରିଛି। ଯାହା ଗତ ବର୍ଷ ତୁଳନାରେ ୫୪ ପ୍ରତିଶତ ଅଧିକ। ଅଶୋଧିତ ତୈଳ ଦର ବୃଦ୍ଧି ଯୋଗୁଁ ଆମଦାନୀ ବିଲ ୮୭ ପ୍ରତିଶତ ବୃଦ୍ଧି ପାଇଛି। ଉପଭୋକ୍ତା ଉତ୍ପାଦ ଆମଦାନୀ ଉପରେ ଆମଦାନୀ ବିଲ ୪୧ ପ୍ରତିଶତ ବୃଦ୍ଧି ପାଇଛି। ଏହି ଆକଳନରୁ ଏହା ସ୍ପଷ୍ଟ ଯେ ଆମଦାନୀ ପାଇଁ ଖର୍ଚ୍ଚ ବଢୁଛି।
୨୦୨୧-୨୨ ଆର୍ଥିକ ବର୍ଷର ୧୦ ମାସ ମଧ୍ୟରେ ବାଂଲାଦେଶର ରପ୍ତାନି ଲକ୍ଷ୍ୟ ପୂରଣ ହୋଇ ପାରିନି। ବାଂଲାଦେଶ ୪୩.୩୪ ବିଲିୟନ ଡଲାର ମୂଲ୍ୟର ଉତ୍ପାଦ ରପ୍ତାନି କରିଛି । ଯାହା ଗତ ବର୍ଷ ତୁଳନାରେ ୩୫ ପ୍ରତିଶତ ଅଧିକ। ଜୁଲାଇ ୨୦୨୧ ରୁ ଏପ୍ରିଲ ୨୦୨୨ ମଧ୍ୟରେ, ପୋଷାକ ରପ୍ତାନୀ, ଚମଡା ଏବଂ ଏହାର ଉତ୍ପାଦ ରପ୍ତାନୀ ଏକ ବିଲିୟନ ଆମେରିକୀୟ ଡଲାରରୁ ଅଧିକ ବୃଦ୍ଧି ପାଇଛି । ଏଭଳି ପରିସ୍ଥିତିରେ ବାଂଲାଦେଶର ଆମଦାନୀ ବିଲ ବୃଦ୍ଧି ହୋଇଥିଲେ ମଧ୍ୟ ରପ୍ତାନିରୁ ଆୟ ବୃଦ୍ଧି ହୋଇ ପାରୁନି।
