ଢେଙ୍କାନାଳ, ୧।୭(ରତନ ନାୟାର): ଢେଙ୍କାନାଳ ଜିଲାରେ ହାତୀ-ମଣିଷ ସଂଘର୍ଷ ରୋକିବାରେ ବାରମ୍ବାର ବିଫଳ ହେଉଥିବା ବନ ବିଭାଗ ପୁଣି ଥରେ ବୈଷୟିକ ଜ୍ଞାନକୌଶଳ ଉପରେ ନିର୍ଭର କରିଛି। ଗଁା ସୀମାନ୍ତରେ ହାତୀ ଉପସ୍ଥିତି ସମ୍ପର୍କରେ ଜନସାଧାରଣଙ୍କୁ ଅବଗତ କରାଇବା ଲାଗି ପ୍ରାରମ୍ଭିକ ଚେତାବନୀ ବ୍ୟବସ୍ଥା (ଏର୍ଲି ଓ୍ବାନିର୍ଂ ସିଷ୍ଟମ୍ ବା ଇଡବ୍ଲ୍ୟଏସ୍) ଆପଣାଯାଇଛି। ଫଳରେ ହାତୀ ଚଳପ୍ରଚଳ ଜାଣିବା ମାତ୍ରେ ୫ ମିନିଟ୍ ଧରି ସାଇରନ୍ ବାଜିବ। ଏଥିସହ ନାଲି ଲାଇଟ୍ ମଧ୍ୟ ଜଳିଉଠିବ। ହିନ୍ଦୋଳ ରେଞ୍ଜ୍ର ହାତୀ ଉପଦ୍ରୁତ ବମ୍ପା ସେକ୍ସନ ବ୍ରାହ୍ମଣିଆପାଳ ବିଟ୍ ଅନ୍ତର୍ଗତ ଗଞ୍ଜରା ଗ୍ରାମରେ ଶୁକ୍ରବାର ପରୀକ୍ଷାମୂଳକ ଭାବେ ଏହାର ଶୁଭାରମ୍ଭ ହୋଇଛି। ଏହା ସଫଳ ହେଲେ ଏହାକୁ ଅନ୍ୟତ୍ର ପ୍ରୟୋଗ କରାଯିବ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ଢେଙ୍କାନାଳ ଜିଲାରେ ହାତୀ ଉପଦ୍ରବକୁ ନେଇ ଆଇନଶୃଙ୍ଖଳା ବିଗିଡ଼ିବାରେ ଲାଗିଛି। ଏହା କେବଳ ବନ ବିଭାଗ ନୁହେଁ, ଜିଲା ପ୍ରଶାସନ, ପୋଲିସ ପ୍ରଶାସନର ମଧ୍ୟ ମୁଣ୍ଡବ୍ୟଥା ବଢ଼ାଇଛି। ଗତ ଦେଢ଼ମାସରେ ହାତୀ ଆକ୍ରମଣରେ ୧୫ ଜଣଙ୍କ ଜୀବନ ଯିବା ପରେ ଚାରିଆଡୁ ପ୍ରବଳ ଚାପର ସମ୍ମୁଖୀନ ହୋଇଥିବା ବନ ବିଭାଗର ଚେତା ପଶିଛି। ଗଞ୍ଜରା ଗ୍ରାମରେ ଆରମ୍ଭ ହୋଇଥିବା ଇଡବ୍ଲ୍ୟଏସ୍କୁ ଟେଲିଫୋନ୍ ଟାଓ୍ବାର ସହିତ ସଂଯୋଗ କରାଯାଇଛି। ସାଇରନ୍ ଏବଂ ଲାଇଟ୍କୁ ସ୍ବତନ୍ତ୍ର ଖୁଣ୍ଟରେ ଲଗାଯାଇଛି। ହାତୀଙ୍କ ଉପସ୍ଥିତି ଜଣାପଡ଼ିବା ମାତ୍ରକେ ବନ କର୍ମଚାରୀ କିମ୍ବା କଣ୍ଟ୍ରୋଲ ରୁମ୍ କର୍ମଚାରୀ ଏହାକୁ ରିମୋଟ ମାଧ୍ୟମରେ ସକ୍ରିୟ କରିବେ। ଏହାପରେ ୫ ମିନିଟ୍ ଧରି ତୀବ୍ର ଶବ୍ଦରେ ସାଇରନ୍ ବାଜି ଓ ନାଲି ଲାଇଟ୍ ଜଳିଉଠିବ। ଫଳରେ ଲୋକମାନେ ସତର୍କ ହୋଇଯିବେ ଏବଂ ଧନଜୀବନ ସୁରକ୍ଷା ଲାଗି ଆଗୁଆ ପଦକ୍ଷେପ ନେଇପାରିବେ। ଇଡବ୍ଲ୍ୟଏସ୍ ସୌରଶକ୍ତି ଦ୍ୱାରା ପରିଚାଳିତ ସ୍ବୟଂକ୍ରିୟ ବ୍ୟବସ୍ଥା। ଏଥିରେ ବିଦ୍ୟୁତ୍ ଶକ୍ତିର ଆବଶ୍ୟକତା ନାହିଁ। ତେଣୁ ଏହା ବର୍ଷସାରା କାର୍ଯ୍ୟକ୍ଷମ ହୋଇପାରିବ। ସ୍ଥାନୀୟ ଉଦ୍ୟୋଗୀଙ୍କ ସହାୟତାରେ ପରୀକ୍ଷାମୂଳକ ଭାବେ ଆରମ୍ଭ ହୋଇଥିବା ଏହି ବ୍ୟବସ୍ଥା ସଫଳ ହେଲେ ଏହାକୁ ଅନ୍ୟତ୍ର ଲାଗୁ କରାଯିବ ବୋଲି ଜିଲା ବନଖଣ୍ଡ ଅଧିକାରୀ ସୁମିତ କୁମାର କର ସୂଚନା ଦେଇଛନ୍ତି।
