ବ୍ରହ୍ମପୁର ଅଫିସ,୧୪ା୧: ପୁରୁଷ ହକି ବିଶ୍ୱକପ ଅବସରରେ ବ୍ରହ୍ମପୁର ମହାନଗର ନିଗମ (ବିଇଏମ୍ସି) ପକ୍ଷରୁ ଜିଲା ପ୍ରଶାସନର ମିଳିତ ସହଯୋଗରେ ଶୁକ୍ରବାରଠାରୁ ୟୁସିପି ଇଞ୍ଜିନିୟରିଂ ସ୍କୁଲ ପଡ଼ିଆରେ ୫ଦିନିଆ ସିଲ୍କସିଟି ଫେଷ୍ଟ ମହୋତ୍ସବ ଉଦ୍ଘାଟିତ ହୋଇଛି। ଏଥିରେ ଗୃହ ଓ ନଗର ଉନ୍ନୟନ ବିଭାଗ ମନ୍ତ୍ରୀ ଉଷା ଦେବୀ ମୁଖ୍ୟ ଅତିଥି ରୂପେ ଯୋଗ ଦେଇଥିଲେ। ହକି ପାଇଁ ଆଜି ଓଡ଼ିଶା ସମଗ୍ର ବିଶ୍ୱରେ ସ୍ବତନ୍ତ୍ର ପରିଚୟ ପାଇଛି। ବିଶ୍ୱରେ ଯେଉଁଆଡ଼େ ଗଲେ ବି ଓଡ଼ିଶା ଓ ଓଡ଼ିଆ ଲୋକଙ୍କୁ ସ୍ବାଗତ କରାଯାଉଛି। ମୁଖ୍ୟମନ୍ତ୍ରୀ କ୍ରୀଡ଼ାକୁ ବହୁତ ଭଲ ପାଆନ୍ତି। ଏଥିପାଇଁ ସେ ରାଜ୍ୟରେ ଦ୍ୱିତୀୟ ଥର ପାଇଁ ହକି ବିଶ୍ୱକପର ଆୟୋଜନ କରିଛନ୍ତି। ଆଗାମୀ ଦିନରେ ସଭିଏଁ ଏକାଠି ହୋଇ ବ୍ରହ୍ମପୁରର ଉନ୍ନତି ପାଇଁ ଆଗଭର ହେବା ବୋଲି ସେ କହିଥିଲେ। ଅନ୍ୟତମ ଅତିଥି ରୂପେ ବ୍ରହ୍ମପୁର ମେୟର ସଂଘମିତ୍ରା ଦଳେଇ କହିଥିଲେ ଯେ, କରୋନା ମହାମାରୀ କାରଣରୁ ଦୀର୍ଘ ୨ ବର୍ଷ ପରେ ସହରରେ ମନୋରଞ୍ଜନ ଭିତ୍ତିକ କାର୍ଯ୍ୟକ୍ରମ ହୋଇଛି। ଏହି ମହୋତ୍ସବ ଭାଇଚାରାରା ମହୋତ୍ସବ ବୋଲି କହିଥିଲେ। ବ୍ରହ୍ମ୍ପୁର ଏମପିି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ କୁମାର ପଣ୍ଡା, ଆସିକା ବିଧାୟିକା ମଞ୍ଜୁଳା ସ୍ବାଇଁ, ରାଜ୍ୟ ଯୋଜନା ବୋର୍ଡ ସଦସ୍ୟ ଡା.ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ରାଜ୍ୟ କାଜୁ ନିଗମ ଅଧ୍ୟକ୍ଷ ସୁବାସ ମହାରଣା, ଗଞ୍ଜାମ ଜିଲାପାଳ ଦିବ୍ୟଜ୍ୟୋତି ପରିଡା, ବିଇଏମସି କମିଶନର ଜେ ସୋନାଲ, ବ୍ରହ୍ମପୁର ଏସ୍ପି ଡା. ଶ୍ରବଣା ବିବେକ ଏମ ପ୍ରମୁଖ ଅତିଥି ଭାବେ ଯୋଗଦେଇଥିଲେ। ସନ୍ଧ୍ୟାରେ ପଶ୍ଚିମବଙ୍ଗର ପଲ୍ଲବୀ ଓ ତାଙ୍କ ସହଯୋଗୀଙ୍କ ଦ୍ୱାରା କଥକ ନୃତ୍ୟ ଦର୍ଶକଙ୍କ ମନ ମୋହିଥିଲା। ଏହାପରେ କୋରାପୁଟ ଢେମସା ନୃତ୍ୟ, ଡୁମ୍ପା ବାଦ୍ୟ ନୃତ୍ୟ କଳାକାରଙ୍କ ଦ୍ୱାରା ପରିବେଷଣ ହୋଇଥିଲା। ମେଗା ନାଇଟ ସେଲିବ୍ରିିଟି କାର୍ଯ୍ୟକ୍ରମରେ ଲସା ମିଶ୍ର ଓ ବେନି ଦୟାଲ ସଂଗୀତରେ ଦର୍ଶକଙ୍କୁ ବିମୋହିତ କରିଥିଲେ। ତେବେ ମହୋତ୍ସବରେ କର୍ପୋରେଟରଙ୍କ ପ୍ରବେଶକୁ ଅନୁମତି ନ ମିଳିବାରୁ ସମସ୍ତ କର୍ପୋରେଟର ଅସନ୍ତୋଷ ପ୍ରକାଶ କରି ମହୋତ୍ସବ ଛାଡି ପଳାଇଥିଲେ। ପରେ ବିଧାୟକ ବୁଝାଶୁଝା ପରେ କର୍ପୋରେଟରମାନେ ମହୋତ୍ସବରେ ଯୋଗ ଦେଇଥିଲେ।
