ଢେଙ୍କାନାଳ,୧୭ା୩(ରତନ ନାୟାର) ଖାଁ ଖାଁ ଲାଗୁଛି ପୂରା ପରିବେଶ। ସବୁଠି ଯେମିତି ଛାଇଯାଇଛି ନୀରବତା। ନିଶ୍ଚଳ ହୋଇଯାଇଛି ସବୁକିଛି। ଚୁପ୍ଚାପ୍ ହୋଇଯାଇଛନ୍ତି ମାହୁନ୍ତ ଦୀପୁଙ୍କ ସମେତ ଅନ୍ୟ କର୍ମଚାରୀ। ପଦ୍ମା, ଶ୍ୟାମା, ଶିବାଙ୍କ ଆଖି ଖୋଜୁଛି ଉମା, ଚନ୍ଦୁ ଓ କାର୍ତ୍ତିକଙ୍କୁ। ଢେଙ୍କାନାଳ ଜିଲା କପିଳାସ ପ୍ରାଣୀ ଉଦ୍ୟାନ ପରିସରରେ ଥିବା ହାତୀ ଉଦ୍ଧାର କେନ୍ଦ୍ରର ଏପରି ଦୃଶ୍ୟ ଏଠାକାର ଲୋକଙ୍କୁ ମଧ୍ୟ ବିଚଳିତ କରିଦେଉଛି। କାରଣ ଦୀର୍ଘବର୍ଷ ଧରି ଏଠାରେ ଥିବା ୭ ହାତୀଙ୍କ ମଧ୍ୟରୁ ପର୍ଯ୍ୟଟକଙ୍କ ପ୍ରମୁଖ ଆକର୍ଷଣ ସାଜିଥିବା ଉମା, ଚନ୍ଦୁ ଓ କାର୍ତ୍ତିକଙ୍କୁ ଶୁକ୍ରବାର ରାତିରେ ଚନ୍ଦକା ବନ୍ୟପ୍ରାଣୀ ଡିଭିଜନର କୁମାରଖୁଣ୍ଟିକୁ ପଠାଇ ଦିଆଯାଇଛି। ସେଠାରେ ସେମାନଙ୍କୁ ତାଲିମ ଦିଆଯାଇ ଜଙ୍ଗଲ ସୁରକ୍ଷା ଓ ବନ୍ୟପ୍ରାଣୀ ବିବାଦ ସମସ୍ୟାର ସମାଧାନ ନିମନ୍ତେ ନିୟୋଜିତ କରାଯିବ। ଏଠାରୁ ବିଦାୟ ଦେବା ବେଳେ ନିଜ ଅଶ୍ରୁକୁ ରୋକିପାରି ନ ଥିବା ମାହୁନ୍ତ ଦୀପୁ ଓ ଅନ୍ୟମାନେ ଏବେ ଝୁରି ହେଉଛନ୍ତି ଉମା, ଚନ୍ଦୁ ଓ କାର୍ତ୍ତିକଙ୍କୁ।
କପିଳାସରେ ଥିବା ୭ ହାତୀଙ୍କ ମଧ୍ୟରୁ ଉମା, ଚନ୍ଦୁ ଓ କାର୍ତ୍ତିକ ସମସ୍ତଙ୍କର ଅତି ପ୍ରିୟ ଥିଲେ। ଛୋଟ ବେଳୁ ଏହି ପରିବେଶ ସହ ଅଭ୍ୟସ୍ତ ଥିବାରୁ ସେମାନେ ମାହୁନ୍ତଙ୍କର ଅତ୍ୟନ୍ତ ବିଶ୍ୱସ୍ତ ହୋଇଯାଇଥିଲେ। ପର୍ଯ୍ୟଟକମାନେ ମଧ୍ୟ ଏମାନଙ୍କୁ ଦେଖି ଖୁସି ହୋଇଯାଉଥିଲେ। ହେଲେ ଏହି ୩ ହାତୀଙ୍କୁ କୁମାରଖୁଣ୍ଟି ପଠାଯିବା ନେଇ ରାଜ୍ୟ ବନ୍ୟପ୍ରାଣୀ ବିଭାଗ ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶ ସମ୍ପର୍କରେ ଜଣାପଡ଼ିବା ପରଠାରୁ ହାତୀ ଉଦ୍ଧାର କେନ୍ଦ୍ରର କର୍ମଚାରୀମାନେ ଯେମିତି ଭାଙ୍ଗି ପଡ଼ିଥିଲେ। ନିଜ ପରିବାର ସଦସ୍ୟଙ୍କ ପରି ମିଳାମିଶା କରୁଥିବା ଉମା, ଚନ୍ଦୁ ଓ କାର୍ତ୍ତିକଙ୍କୁ ସେମାନେ କିପରି ଦୂରେଇ ଦେଇ ରହିପାରିବେ ସେ ନେଇ ବ୍ୟଥିତ ହୋଇପଡ଼ିଥିଲେ। ଏପରି କି ବିଭାଗୀୟ ନିଷ୍ପତ୍ତିରେ କାଳେ ପରିବର୍ତ୍ତନ ହେବ ସେ ନେଇ ମଧ୍ୟ ଆଶାବାଦୀ ଥିଲେ। ହେଲେ ସମସ୍ତଙ୍କୁ ନିରାଶ କରି ବିଭାଗ ପକ୍ଷରୁ ତାରିଖ ନିର୍ଦ୍ଧାରଣ ସହ ଶୁକ୍ରବାର ରାତିରେ ହାତୀ ଉଦ୍ଧାର କେନ୍ଦ୍ରରେ ୩ଟି ହାଇଓ୍ବା ପହଞ୍ଚିବା ପରେ ନିଜ ଲୁହ ଓ କୋହ ସମ୍ଭାଳିପାରି ନ ଥିଲେ ସେମାନେ। ଛଳ ଛଳ ଆଖିରେ ସେମାନେ ସରକାରୀ ନିର୍ଦ୍ଦେଶ ପାଳନ କରି ଉମା, ଚନ୍ଦୁ ଓ କାର୍ତ୍ତିକଙ୍କୁ ଉକ୍ତ ଗାଡ଼ିରେ ଚଢ଼ାଇ କୁମାରଖୁଣ୍ଟି ଅଭିମୁଖେ ବାହାରିଯାଇଥିଲେ। କପିଳାସରୁ ଶୋରିିଷିଆପଦା ଓ କଟକ ଜିଲା ଟାଙ୍ଗି ଦେଇ ଶନିବାର ଭୋର୍ ସମୟରେ ୩ ହାତୀଙ୍କୁ ଚନ୍ଦକା କୁମାରଖୁଣ୍ଟିରେ ପହଞ୍ଚାଯାଇଥିଲା। ହାତୀ ଉଦ୍ଧାର କେନ୍ଦ୍ରର ମାହୁନ୍ତ, କର୍ମଚାରୀ ଓ ଅଧିକାରୀଙ୍କ ସହ ଢେଙ୍କାନାଳ, କଟକ, ଆଠଗଡ଼ ଓ ଚନ୍ଦକା ବନ ଡିଭିଜନର ସମସ୍ତ ଅଧିକାରୀ ଓ କର୍ମଚାରୀ ଏହି କାର୍ଯ୍ୟକୁ ସଫଳତାର ସହ ସମ୍ପନ୍ନ କରିଥିଲେ। ସେଠାରେ ଏହି ହାତୀମାନଙ୍କୁ ତାଲିମ ଦେବାକୁ ଆସାମ ସମେତ ଦେଶର ବିଭିନ୍ନ ରାଜ୍ୟରୁ କୁମ୍କି ତାଲିମପ୍ରାପ୍ତ ମାହୁନ୍ତମାନଙ୍କୁ ନିୟୋଜିତ କରାଯିବ। ରାଜ୍ୟ ବନ୍ୟପ୍ରାଣୀ ବିଭାଗ ପିସିସିଏଫ୍ଙ୍କ ନିର୍ଦ୍ଦେଶରେ ଏହି ୩ ହାତୀଙ୍କୁ କପିଳାସ ହାତୀ ଉଦ୍ଧାର କେନ୍ଦ୍ରରୁ ସ୍ଥାନାନ୍ତର କରାଯାଇଥିବା ଜିଲା ବନଖଣ୍ଡ ଅଧିକାରୀ ସୁମିତ କର ସୂଚନା ଦେଇଛନ୍ତି। ଏ ସମ୍ପର୍କରେ କପିଳାସ ରେଞ୍ଜର ତରୁଣ ମହାନ୍ତି କହିଛନ୍ତି, ବହୁଦିନ ହେଲା ଉକ୍ତ ୩ ହାତୀ ସମସ୍ତଙ୍କ ସାଙ୍ଗ ପାଲଟିଯାଇଥିଲେ। କଥା ମାନୁଥିଲେ, ମିଶୁଥିଲେ। ତେଣୁ ହାତୀମାନଙ୍କୁ ମାହନ୍ତ ଓ କର୍ମଚାରୀମାନେ ଝୁରି ହେଉଛନ୍ତି।
