ଭୁବନେଶ୍ୱର,୯।୭(ବ୍ୟୁରୋ): ଅତୁଟ ଓ ଅଖଣ୍ଡ ଭାରତ। ଏଠି ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ ଭାଇ ଭାଇ।ହିନ୍ଦୁ, ମୁସ୍ଲିମ୍, ଖ୍ରୀଷ୍ଟିଆନ୍ ଓ ଶିଖ୍ ସଭିଏଁ ସମାନ। ଯାହାକୁ ପ୍ରମାଣିତ କରି ଦେଖାଇଛନ୍ତି ରାଜଧାନୀ ଭୁବନେଶ୍ୱରର କିଛି ଯୁବଗୋଷ୍ଠୀ।ଶିଖ୍ ସମ୍ପ୍ରଦାୟର କିଛି ଯୁବକ ମିଶି ସହରରେ ଥିବା ମନ୍ଦିର, ମସ୍ଜିଦ୍ ଓ ଚର୍ଚ୍ଚ ସାନିଟାଇଜ୍ କରି ଧର୍ମନିରପେକ୍ଷ ଭାରତର ଉଦାହରଣ ସୃଷ୍ଟି କରିଛନ୍ତି।ଗୁରୁ ନାନକଙ୍କ ବାଣୀକୁ ଅନୁକରଣ କରି ‘ଶିଖ୍ ଏଡ୍’ ନାମକ ଏହି ଯୁବଗୋଷ୍ଠୀ ଭୁବନେଶ୍ୱରରେ ଥିବା ସମସ୍ତ ମନ୍ଦିର, ଚର୍ଚ୍ଚ, ମସ୍ଜିଦ୍, ଓ ଗୁରୁଦ୍ୱାରକୁ ନିଜସ୍ବ ଉଦ୍ୟମରେ ସାନିଟାଇଜ୍ କରିଛନ୍ତି।ଶ୍ରୁଦ୍ଧାଳୁମାନେ ଏହି ଧର୍ମାନୁଷ୍ଠାନ ଗୁଡ଼ିକରେ ଯେପରି କୋଭିଡ୍-୧୯ରେ ସଂକ୍ରମିତ ନ ହୁଅନ୍ତୁ ତାହାକୁ ଦୃଷ୍ଟିରେ ରଖି ଶିଖ୍ଏଡ୍ ଏଭଳି ନିଆରା ପଦକ୍ଷେପ ନେଇଛି।
କୋଭିଡ୍ ମହାମାରୀ ଲକ୍ଡାଉନ୍ କଟକଣା ଧୀରେ ଧୀରେ କୋହଳ ହେଉଥିବାବେଳେ ବିଭିନ୍ନ ଧର୍ମାନୁଷ୍ଠାନଗୁଡ଼ିକୁ ଶ୍ରଦ୍ଧାଳୁଙ୍କ ପାଇଁ ଖୋଲାଯାଉଛି। ଏଭଳିସ୍ଥଳେ ମନ୍ଦିର, ମସ୍ଜିଦ୍, ଚର୍ଚ୍ଚ ଆଦି ସ୍ଥାନରେ ଭକ୍ତମାନେ ଯେପରି ସୁରକ୍ଷିତ ରହିବେ ଏବଂ ଧାର୍ମିକସ୍ଥଳୀ ପରିସର ଯେପରି କୋଭିଡ୍ ମୁକ୍ତ ରହିବ ସେଥିଲାଗି ଭୁବନେଶ୍ୱର ଏବଂ କଟକ ଶିଖ୍ ସମ୍ପ୍ରଦାୟର କିଛି ଯୁବକ ମିଶି ସାନିଟାଇଜେଶନ ଅଭିଯାନ ଆରମ୍ଭ କରିଛନ୍ତି।ଜୁନ୍ ୨୪ରୁ ଭୁବନେଶ୍ୱରରେ ଆରମ୍ଭ ହୋଇଥିବା ସାନିଟାଇଜେଶନ ଅଭିଯାନରେ ଜନପଥରେ ଥିବା ଗୁରୁଦ୍ୱାରା ସିଂ ସଭା, ବିଗ୍ ବଜାର ନିକଟସ୍ଥ କ୍ୟାଥୋଲିକ୍ ଚର୍ଚ୍ଚ, ସତ୍ୟ ନଗର ଚର୍ଚ୍ଚ, ସତ୍ୟ ନଗର କାଳୀ ମନ୍ଦିର ଓ ସାଇ ମନ୍ଦିର, ରାମ ମନ୍ଦିର, ମା’ ତାରିଣୀ ମନ୍ଦିର, ହରିପୁର ଚଉଷଠି ଯୋଗିନୀ ମନ୍ଦିର, ବମିଖାଲ ମା’ ସନ୍ତୋଷୀ ମନ୍ଦିର, ବୁଦ୍ଧେଶ୍ୱରୀ ମନ୍ଦିର, ଶହୀଦନଗରସ୍ଥିତ ମା’ ମଙ୍ଗଳା ମନ୍ଦିରକୁ ପ୍ରଥମେ ସାନିଟାଇଜ୍ କରାଯାଇଥିଲା। କେବଳ ଏତିକି ନୁହେଁ ଭୁବନେଶ୍ୱରରେ ଥିବା ସମସ୍ତ ଛୋଟ ବଡ଼ ବିଷ୍ଣୁ ଓ ଶିବ ମନ୍ଦିର, ମସ୍ଜିଦ୍ଗୁଡ଼ିକରେ ମଧ୍ୟ ‘ଶିଖ୍ ଏଡ୍’ ପକ୍ଷରୁ ସାନିଟାଇଜେଶନ କରାଯାଇଛି। ପରମ୍ଜିତ ସିଂ, ସତବିର୍ ସିଂ, ଦେବେନ୍ଦର ସିଂ, ବିବେକ ସିଂ, ଉଦ୍ଧମ ସିଂ, ତନଜୋତ ସିଂ ଏବଂ ରମେଶ ଶର୍ମା ପ୍ରମୁଖ ସାନିଟାଇଜେଶନ ଡ୍ରାଇଭ୍ରେ ମୁଖ୍ୟ ଭୂମିକା ଗ୍ରହଣ କରିଥିଲେ। ତେବେ ଏହି ଯୁବକମାନଙ୍କ ମଧ୍ୟରେ ଅଧିକାଂଶ ସ୍ନାତ୍ତୋକ, ସ୍ନାତ୍ତକୋତ୍ତର ଏବଂ ମ୍ୟାନେଜମେଣ୍ଟ ଛାତ୍ର ରହିଛନ୍ତି। କେତେ ଜଣଙ୍କ ନିଜସ୍ବ ବ୍ୟବସାୟ ରହିଥିବାବେଳେ ଆଉକିଛି ଆଇଟି ସେକ୍ଟରରେ କାମ କରୁଛନ୍ତି। ‘ପ୍ରତି ମୁହୂର୍ତ୍ତରେ ଭଗବାନଙ୍କୁ ସ୍ମରଣ କରିବା ଓ ଭଗବାନଙ୍କ ଦୟା ଓ ଆଶୀର୍ବାଦକୁ ଗ୍ରହଣ କରି ଯାହା ବି ପାଇଛ ସେଥିରେ ପରିଶ୍ରମ ଓ ସଚ୍ଚୋଟତା ଦ୍ୱାରା ସଂସାରରେ ବଞ୍ଚତ୍ରହିବା’, ଗୁରୁ ନାନକଙ୍କ ଏହି ବାଣୀକୁ ଅକ୍ଷରେ ଅକ୍ଷରେ ପାଳନ କରୁଛନ୍ତି ଏହି ଯୁବଗୋଷ୍ଠୀ। ନିଜେ ପରିଶ୍ରମ କରି ଉପାର୍ଜନ କରିଥିବା ଅର୍ଥର କିଛି ଅଂଶ ଦରକାରୀ ଲୋକଙ୍କ ପାଇଁ ବ୍ୟୟ କରିବା ଆବଶ୍ୟକ ବୋଲି ପରମ୍ଜିତ କହିଛନ୍ତି।କେବଳ ଭୁବନେଶ୍ୱର ନୁହେଁ, କଟକରେ ମଧ୍ୟ ଜୁନ୍ ୨ରୁ ସାନିଟାଇଜେଶନ ଅଭିଯାନ ଆରମ୍ଭ ହୋଇ ୧୪ ତାରିଖ ପର୍ଯ୍ୟନ୍ତ ଚାଲିଥିଲା। ଆଗାମୀଦିନରେ ବିଭିନ୍ନ ଧର୍ମାନୁଷ୍ଠାନ ସହ ସର୍ବସାଧାରଣ ସ୍ଥାନକୁ ମଧ୍ୟ ସାନିଟାଇଜ୍ କରିବାକୁ ଟିମ୍ ‘ଶିଖ୍ ଏଡ୍’ ଲକ୍ଷ୍ୟ ରଖିଛି। କିଛିଦିନ ତଳେ ରଥଯାତ୍ରା ଆୟୋଜନ ନ କରିବାକୁ ସୁପ୍ରିମକୋର୍ଟ ଦେଇଥିବା ରାୟ ଉପରେ ସାନି ପିଟିଶନ୍ ଦାୟର କରି ନୟାଗଡ଼ ଜିଲାର ଜଣେ ମୁସ୍ଲିମ୍ ଯୁବକ ସମଗ୍ର ଦେଶବାସୀଙ୍କ ପାଇଁ ଉଦାହରଣ ସୃଷ୍ଟି କରିଥିଲେ।
