ଖୋର୍ଦ୍ଧା ଅଫିସ,୧୩।୭: ଚଳିତ ବର୍ଷ କରୋନା ସଂକ୍ରମଣ ପାଇଁ ଶ୍ରୀକ୍ଷେତ୍ର ବ୍ୟତୀତ ରାଜ୍ୟର ଅନ୍ୟ ସ୍ଥାନରେ ରଥଯାତ୍ରା ବନ୍ଦ ରହିଛି। ଶ୍ରୀକ୍ଷେତ୍ରକୁ ଯାଇ ନ ପାରି ଭକ୍ତମାନେ ନିଜ ମନର କଥାକୁ ବିଭିନ୍ନ ଉପାୟରେ ଜଣାଇଛନ୍ତି। କିଏ ରଙ୍ଗତୂଳିରେ ଚକାନୟନକୁ ଆଙ୍କଲାଣି ତ, ଆଉ କିଏ ମହାପ୍ରଭୁଙ୍କ ବିଭିନ୍ନ ବେଶକୁ କାନଭାସରେ ସଜ୍ଜାଇଛନ୍ତିି। ଆଉ କିଏ ଚାଉଳ ଓ ଧାନରେ ମହାପ୍ରଭୁଙ୍କ ରଥ ଗଢ଼ିଛନ୍ତି। ଏହି କ୍ରମରେ ଖୋର୍ଦ୍ଧା ପଲଟନ ପଡିଆର ଦୀପ୍ତିରଞ୍ଜନ ଓ ସ୍ନେହଲତାଙ୍କ ପୁଅ ଶୁଭ୍ରାଂଶୁ ରଞ୍ଜନ ସାହୁ ୮ଫୁଟ ଉଚ୍ଚର ନନ୍ଦିଘୋଷ ରଥ ଗଢ଼ିଛନ୍ତି। ରଥରେ ମହାପ୍ରଭୁ ବିଜେ କରିଛନ୍ତି। ଖୋର୍ଦ୍ଧାର ଏକ ଘରୋଇ ଇଂଲିଶ ମିଡିୟମ ସ୍କୁଲରେ ୯ମ ଶ୍ରେଣୀରେ ପଢୁଥିବା ଶୁଭ୍ରାଂଶୁ ବିଭିନ୍ନ ସମୟରେ ମହାପ୍ରଭୁଙ୍କ ଚିତ୍ର ଅଙ୍କନ କରିଥାନ୍ତିି। ଚଳିତବର୍ଷ ଶ୍ରୀକ୍ଷେତ୍ରରେ ବିନା ଭକ୍ତରେ ରଥଯାତ୍ରା ହୋଇଥିବାରୁ ସେ ଆଉ ମହାପ୍ରଭୁଙ୍କୁ ଦର୍ଶନ କରପାରିବେ ପାହିଁ। ଫଳରେ ସେ ନନ୍ଦିଘୋଷ ରଥ ପ୍ରସ୍ତୁତ କରି ସେଥିରେ ମହାପ୍ରଭୁଙ୍କୁ ବିଜେ କରାଇ ପୂଜାର୍ଚ୍ଚନା ଲାଗି ସ୍ଥିର କରିଥିଲେ। କାର୍ଟୁନ, ଖବରକାଗଜ, ରଙ୍ଗ, ରଙ୍ଗିନ ପେପର, ଆଇସକ୍ରିମ କାଠିକୁ ବ୍ୟବହାର କରି ସେ ଏହି ରଥ ପ୍ରସ୍ତୁତ କରିଛନ୍ତି। ଏଥିଲାଗି ଏକ ମାସ ସମୟ ଲାଗିଥିଲା। ଶୁଭ୍ରାଂଶୁଙ୍କ ଏଥିପ୍ରତି ଆଗ୍ରହ ଦେଖି ପରିବାର ସଦସ୍ୟମାନେ ତାଙ୍କୁ ଏଥିରେ ସହଯୋଗ କରିଥିଲେ। ସୋସିଆଲ ମିଡିଆରେ ସେ ଏହି ରଥ ନିର୍ମାଣର କଳା ପ୍ରଦର୍ଶନ କରିଛନ୍ତି। ଏହାକୁ ୧୪ହଜାରରୁ ଊର୍ଦ୍ଧ୍ୱ ଲୋକେ ଦେଖିଛନ୍ତି। ଶୁଭ୍ରାଂଶୁଙ୍କ ଏହି ରଥ ଦେଖିବା ଲାଗି ଲୋକଙ୍କ ଭିଡ଼ ଜମିଛି। ମହାପ୍ରଭୁଙ୍କ ପ୍ରତି ରହିଥିବା ଭକ୍ତି ଓ ସମର୍ପଣ ଶୁଭ୍ରାଂଶୁଙ୍କୁ ଏହି ସଫଳତା ମିଳିଛି ବୋଲି ତାଙ୍କ ବାପା ଦୀପ୍ତିରଞ୍ଜନ କହିଛନ୍ତି। ଏ ସମ୍ପର୍କରେ ଶୁଭ୍ରାଂଶୁୁ କୁହନ୍ତି, ରଥଯାତ୍ରାରେ ପରିବାର ସହ ଶ୍ରୀକ୍ଷେତ୍ରକୁ ଯାଇଥାଏ। ରଥାଋଢ ଠାକୁର, ଆଢ଼ପ ଦର୍ଶନରେ ଅପୂର୍ବ ଆନନ୍ଦ ମିଳେ। କରୋନା କଟକଣା ଯୋଗୁ ଲୋକେ ମହାପ୍ରଭୁଙ୍କ ଦର୍ଶନରୁ ବଞ୍ଚିତ ହୋଇଛନ୍ତି। ସମସ୍ତଙ୍କ ଆଶା ମଉଳି ନ ଯାଉ, ରଥରେ ମହାପ୍ରଭୁଙ୍କୁ ସମସ୍ତଙ୍କୁ ଦର୍ଶନ କରିବାର ଲକ୍ଷ୍ୟ ନେଇ ଏହି ରଥ ପ୍ରସ୍ତୁତ କରଛି। ଆଗକୁ ଜଗନ୍ନାଥଙ୍କ ବିଭିନ୍ନ ବେଶ ଚିତ୍ର ଅଙ୍କନ କରିବାର ଯୋଜନା ରଖିଛି। ଏଥିଲାଗି ସେ ସବୁ ସମୟରେ ମହାପ୍ରଭୁଙ୍କ ଆଶୀର୍ବାଦକୁ ଅନୁଭବ କରିଥିବା ସେ କହିଛନ୍ତି।
