ଚିତ୍ରଡ଼ା,୩ା୮(ଡି.ଏନ୍.ଏ.)- ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଚିତ୍ରଡ଼ା ପଞ୍ଚାୟତକୁ ସରପଞ୍ଚ ଦୁଲାରୀ ମାରାଣ୍ଡି ଆସନ୍ତା ୪୮ ଘଣ୍ଟା ପାଇଁ ଶଟ୍ ଡାଉନ ଘୋଷଣା କରିଛନ୍ତି। ପଞ୍ଚାୟତର ଜଣେ ଡ୍ରାଇଭର କରୋନା ଆକ୍ରାନ୍ତ ଚିହ୍ନଟ ହେବା ପରେ ଏହି ପଦକ୍ଷେପ ନିଆଯାଇଥିବା ସରପଞ୍ଚ ସୂଚନା ଦେଇଛନ୍ତି। ତେବେ ଶଟ୍ ଡାଉନ ଯୋଗୁ ରାଖୀ ବ୍ୟବସାୟୀ ଏବଂ ମିଠା ଦୋକାନୀ ପ୍ରଭାବିତ ହୋଇଥିବା ଦେଖିବାକୁ ମିଳିଛି। ଚିତ୍ରଡ଼ା ବଜାରରେ ରାଖୀ ଦୋକାନ ଖୋଲିବା ଲାଗି ସ୍ଥାନୀୟ ତହସିଲଦାର ୬ ଜଣଙ୍କୁ ଅନୁମତି ଦେଇଥିଲେ। ସେମାନେ ପ୍ରତ୍ୟେକ ୧୫ରୁ ୨୦ ହଜାର ଟଙ୍କା ଲେଖାଏଁ ରାଖୀ କିଣି ଦୋକାନ ଖୋଲିଥିଲେ। ହେଲେ ଶଟ୍ ଡାଉନ ଯୋଗୁ ସେମାନଙ୍କ ବେପାର ଠପ୍ ହୋଇପଡ଼ିଛି। ସେହିପରି ମିଠା ବ୍ୟବସାୟୀ ଜୟ କିଶୋର ସାହୁ ରାଖି ପୂର୍ଣ୍ଣମୀ ଲାଗି ୭୦ କେ.ଜି ଛେନା ଆଣି ମିଠା ତିଆରି କରିଥିଲେ। ଶଟ୍ ଡାଉନ ଯୋଗୁଁ ସମ୍ପୂର୍ଣ୍ଣ ଜିନିଷ ନଷ୍ଟ ହେବ ବୋଲି ସେ କହିଛନ୍ତି। ରବିବାର ସନ୍ଧ୍ୟାରେ ଶଟ୍ ଡାଉନ୍ ଲାଗି ପ୍ରଚାର କରାଯାଉଥିବା ବେଳେ ଦୋକାନୀମାନେ ପ୍ରଚାର ଗାଡ଼ିକୁ ଅଟକାଇ ଥିଲେ। ବ୍ୟବସାୟୀ ସଂଘ ସମ୍ପାଦକ ସୀମାନ୍ତ ବାରିକ ଦୋକାନ ଖୋଲା ରଖିବା ପାଇଁ ସରପଞ୍ଚଙ୍କୁ ଅନୁରୋଧ କରିଥିଲେ। ସୋମବାର ଅପରାହ୍ନ ଗୋଟାଏ ପର୍ଯ୍ୟନ୍ତ ଦୋକାନ ଖୋଲା ରହିବ ବୋଲି ସରପଞ୍ଚ ସୂଚନା ଦେଇଛନ୍ତି। ଏସମ୍ପର୍କରେ ବୁଦ୍ଧିଜୀବୀ ସନ୍ତୋଷ କୁମାର ବେହେରା କୁହନ୍ତି ଗହ୍ମାପୂର୍ଣ୍ଣିମା ଥିବାରୁ ପଞ୍ଚାୟତକୁ ଶଟ ଡାଉନ ଘୋଷଣା କରିବା ଅପେକ୍ଷା ଆକ୍ରାନ୍ତ ଚିହ୍ନଟ ହୋଇଥିବା ୱାର୍ଡକୁ କଣ୍ଟେନ୍ମେଣ୍ଟ ଜୋନ୍ ଘୋଷଣା କରିଥିଲେ ଭଲ ହୋଇଥାନ୍ତା ।
