ବନ୍ତ, ୨୪।୮(ଡି.ଏନ.ଏ.)-ପାଠ ପଢିବା ସହିତ ଚିତ୍ର ଆଙ୍କିବା ଓ ମୂର୍ତ୍ତି ତିଆରି କରିବାରେ ନିଜକୁ ହଜାଇ ଦେଇଛନ୍ତି ଶୁଭଶ୍ରୀ ସୋନମ ରାଜ। ତାଙ୍କର ପ୍ରତିଭାକୁ ବିକାଶ କରାଇବା ଲାଗି ଲକ୍ଡାଉନ ସୁଯୋଗ ଆଣିଦେଇଛି ବୋଲି ସେ କୁହନ୍ତି। ଶୁଭଶ୍ରୀଙ୍କ ଘର ଭଦ୍ରକ ଜିଲା ବନ୍ତ ବ୍ଲକ ନିଳୋକ ଗ୍ରାମରେ। ଶ୍ରୀଧର ରାଜଙ୍କ ଝିଅ ଶୁଭଶ୍ରୀ ଚଳିତବର୍ଷ ମାଟ୍ରିକ୍ ପରୀକ୍ଷାରେ ୪୨୦ ନମ୍ବର ରଖି ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି।
ସେ ମାଟିରେ ବିଭିନ୍ନ ଦେବାଦେବୀଙ୍କ ମୂର୍ତ୍ତି ଓ ବିଭିନ୍ନ ଫଳ, ପନିପରିବା ଆକୃତି ତିଆରି କରି ଘରେ ରଖିଛନ୍ତି। ଆଖପାଖ ଗ୍ରାମରୁ ଲୋକମାନେ ତାଙ୍କ ଘରକୁ ଆସି ଏସବୁ ମୂର୍ତ୍ତି ଓ ସାମଗ୍ରୀ ଆସି ନେଉଛନ୍ତି। ପିଲାବେଳୁ ଚିତ୍ର ଆଙ୍କିବା ପ୍ରତି ତାଙ୍କର ଆଗ୍ରହ ଥିଲା। ପରେ ନିଜେ ମୂର୍ତ୍ତି ତିଆରି କରିବା ଆରମ୍ଭ କରିଥିଲେ। ୬ଷ୍ଠ ଶ୍ରେଣୀରୁ ଚିତ୍ର ଆଙ୍କିବା ଓ ମୂର୍ତ୍ତି ତିଆରି କରିବା ତାଙ୍କ ନିଶା ପାଲଟି ଯାଇଥିଲା। ସେ ବିଭିନ୍ନ ଦେବାଦେବୀ, ଦୃଶ୍ୟପଟ, ବିଦ୍ୟାଳୟ, ସ୍ବଚ୍ଛ ଭାରତ ସମ୍ପର୍କିତ ବିଭିନ୍ନ ଚିତ୍ର ଅଙ୍କନ କରିଛନ୍ତି। ସେ ଧାନରେ ଆକର୍ଷଣୀୟ ଜଗନ୍ନାଥଙ୍କ ଚିତ୍ରପଟ୍ଟ ପ୍ରସ୍ତୁତ କରିଛନ୍ତି। ଚିତ୍ରାଙ୍କନ ପାଇଁ ସେ ବହୁ ପ୍ରତିଯୋଗିତାରେ ପୁରସ୍କୃତ ହୋଇଛନ୍ତି। ସେ ୨୦୧୬ରେ ଭଦ୍ରକସ୍ଥିତ ନେତାଜୀ ସୁବାଷ ବାହିନୀ ପକ୍ଷରୁ ଆୟୋଜିତ ଜିଲାସ୍ତରୀୟ ପ୍ରତିଯୋଗିତାରେ ଭାଗ ନେଇ ପୁରସ୍କୃତ ହୋଇଥିଲେ। ସେହିପରି ବ୍ଲକସ୍ତରୀୟ ଶିଶୁ ମହୋତ୍ସବ ସୁରଭି, ତିଳୋତ୍ତମା ପହି ସ୍ମାରକୀ ଶିଶୁ ମହୋତ୍ସବ, ଓଷ୍ଟା ପକ୍ଷରୁ ଆୟୋଜିତ ବ୍ଲକସ୍ତରୀୟ ଶିଶୁ ଉତ୍ସବ, କେନ୍ଦୁଆପଦାସ୍ଥିତ ମାଳିରାମ ମେମୋରିଆଲ ଆୱାର୍ଡ ପ୍ରତିଯୋଗିତା, ଆଞ୍ଚଳିକ ସାଧନ କେନ୍ଦ୍ରସ୍ତରୀୟ ପ୍ରତିଯୋଗିତା, ନିଳୋକ ହାଇସ୍କୁଲର ବାର୍ଷିକ କ୍ରୀଡା ଉତ୍ସବ ଆଦିରେ ଭାଗ ନେଇ ପୁରସ୍କୃତ ହୋଇଛନ୍ତି। ପିଲାଟି ବେଳୁ ତାଙ୍କ ଭିତରେ ଥିବା ପ୍ରତିଭା ଏବେ ତାଙ୍କ ପାଇଁ ନିଶାରେ ପରିଣତ ହୋଇଛି। ନିଜର ପ୍ରଗାଢ ଇଚ୍ଛାଶକ୍ତି ଓ ମାତା ପିତା, ଗୁରୁଜନଙ୍କ ଆଶୀର୍ବାଦରେ ସେ ଆକର୍ଷଣୀୟ ଚିତ୍ର ଆଙ୍କିବା ସହ ମୂର୍ତ୍ତି ତିଆରି କରିପାରୁଛନ୍ତି। ଉପଯୁକ୍ତ ପ୍ରଶିକ୍ଷଣ ଓ ପ୍ରୋତ୍ସାହନ ମିଳିଲେ ଆହୁରି ଆଗକୁ ଯାଇପାରିବେ ବୋଲି ସେ କହିଛନ୍ତି।
