ପୁରୀ ଅଫିସ,୨୨।୧୧: ଆସନ୍ତା ୨୪ତାରିଖରେ ଶ୍ରୀମନ୍ଦିର ପରିକ୍ରମା ଯୋଜନାର ଶିଳାନ୍ୟାସ ହେବ। ଏଥିପାଇଁ ସୋମବାରଠାରୁ ବିଧି ଓ ପରମ୍ପରା ଅନୁଯାୟୀ ମହାଯଜ୍ଞ ଆରମ୍ଭ କରାଯିବ। ମହାଯଜ୍ଞରେ ଗଜପତି ମହାରାଜା ଦିବ୍ୟସିଂହ ଦେବ କର୍ତ୍ତା ସାଜିବେ। ତେଣୁ ରବିବାର ଗଜପତି ମହାରାଜାଙ୍କ ଦ୍ୱାରା ଗୁଆଟେକା ନୀତି ସମ୍ପନ୍ନ ହୋଇଛି। ଏଥିସହ ଦ୍ୱିପ୍ରହରରେ ଯଜ୍ଞ ଅଧିବାସ ଓ ରାତ୍ରିରେ ଅଙ୍କୁରାରୋପଣ କରାଯାଇଛି। ୨୨ ଓ ୨୩ ତାରିଖରେ ମହାଯଜ୍ଞ ହେବାକୁ ଥିବାବେଳେ ୨୪ ତାରିଖରେ ପୂର୍ଣାହୁତି ଦିଆଯିବ। ପୂର୍ଣାହୁତି ଦିନ ଶ୍ରୀମନ୍ଦିର ପରିକ୍ରମା ଯୋଜନାର ଶିଳାନ୍ୟାସ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି କାର୍ଯ୍ୟକ୍ରମରେ ଯୋଗଦେଇ ଶ୍ରୀମନ୍ଦିର ପରିକ୍ରମା ଯୋଜନାର ଶିଳାନ୍ୟାସ କରିବେ।
ଶ୍ରୀମନ୍ଦିର ଉତ୍ତରଦ୍ୱାର ନିକଟ ଐଶାନ୍ୟ କୋଣରେ ଯଜ୍ଞମଣ୍ଡପ ପ୍ରସ୍ତୁତ ସରିଛି। ଯଜ୍ଞମଣ୍ଡପ ନିକଟକୁ କେବଳ ସ୍ବୀକୃତିପ୍ରାପ୍ତ ବ୍ୟକ୍ତିବିଶେଷଙ୍କୁ ଛଡ଼ାଯିବ। ଯଜ୍ଞମଣ୍ଡପ ଚାରିପଟେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ବରିଷ୍ଠ ପୋଲିସ ଅଧିକାରୀ, ଗୋଇନ୍ଦା ବିଭାଗ ଅଧିକାରୀ ଓ ସାଦା ପୋଷାକଧାରୀ ସୁରକ୍ଷା କର୍ମୀମାନଙ୍କୁ ମୁତୟନ କରାଯାଇଛି। ଗଜପତି ମହାରାଜା କହିଛନ୍ତି, ଶ୍ରୀମନ୍ଦିର ପରିକ୍ରମା ଯୋଜନା ପାଇଁ ରବିବାର ଶ୍ରୀନଅରରେ ଗୁଆଟେକା ନୀତିରୁ ଯଜ୍ଞବିଧିର ଶୁଭାରମ୍ଭ ହୋଇଛି। ରାଜଗୁରୁ ସୁଧାଂଶୁ ଶେଖର ରାଜଗୁରୁଙ୍କୁ ସେ ଆଚାର୍ଯ୍ୟ ଭାବେ ବରଣ କରିଛନ୍ତି। ପରବର୍ତ୍ତୀ ସମୟରେ ଯଜ୍ଞଶାଳରେ ଅଙ୍କୁରାରୋପଣ ହେବା ସହ ସୋମବାରଠାରୁ ପ୍ରାୟ ୩୨ଜଣ ବ୍ରାହ୍ମଣ ଆଚାର୍ଯ୍ୟ ବରଣ କରି ହୋମଯଜ୍ଞରେ ନିଯୋଜିତ ହେବେ। ୨୪ ତାରିଖରେ ପୂର୍ଣ୍ଣାହୁତି ହେବା ସହ ମୁଖ୍ୟମନ୍ତ୍ରୀ ଶିଳାନ୍ୟାସ କରିବେ। ଶ୍ରୀମନ୍ଦିର ପୂର୍ବଦିଗରେ ମେଘନାଦ ପାଚେରି ପାଖରେ ଶିଳା ପ୍ରତିଷ୍ଠା କରାଯାଇ ଶିଳାନ୍ୟାସ କରାଯିବ। ମହାପ୍ରଭୁଙ୍କ ଉଦ୍ଦେଶ୍ୟରେ ହୋଇଥିବା ଏହି ବୃହତ ଯୋଜନାକୁ ସେ ସଫଳ କରନ୍ତୁ ବୋଲି ତାଙ୍କ ଚରଣରେ ପ୍ରାର୍ଥନା କରୁଛି ବୋଲି ଗଜପତି କହିଛନ୍ତି। ଜିଲାପାଳ ସମର୍ଥ ବର୍ମା କହିଛନ୍ତି, ଯଜ୍ଞ କାର୍ଯ୍ୟକ୍ରମକୁ ଗଜପତି ମହାରାଜାଙ୍କ ତତ୍ତ୍ୱାବଧାନରେ କରାଯିବ। ପରିଚାଳନା ଦାୟିତ୍ୱରେ ସବୁ ପ୍ରକାର ସହଯୋଗ କରାଯିବ। ବ୍ରାହ୍ମଣମାନେ ସମ୍ପୂର୍ଣ୍ଣ ବୈଦିକ ରୀତିନୀତିରେ ଯଜ୍ଞ ଓ ହୋମ କାର୍ଯ୍ୟ କରିବେ। ସେହିପରି ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ କହିଛନ୍ତି, ଶ୍ରୀମନ୍ଦିର ପରିକ୍ରମା ଯୋଜନାର ପ୍ରଥମ ପର୍ବ ଆରମ୍ଭ ହୋଇସାରିଛି। ରବିବାର ରାତ୍ର ୮ଟାରେ ଯଜ୍ଞ ମଣ୍ଡପରେ ଅଙ୍କୁରାରୋପଣ କାର୍ଯ୍ୟକ୍ରମ ହୋଇଛି। ଶାସ୍ତ୍ରୀୟ ପରମ୍ପରା ଅନୁସାରେ ବ୍ରାହ୍ମଣମାନେ ଯଜ୍ଞ ଓ ପୂଜାର୍ଚ୍ଚନା କରିବେ। ଉଲ୍ଲେଖଯୋଗ୍ୟ, ଶ୍ରୀମନ୍ଦିର ପରିକ୍ରମା ଯୋଜନା ପାଇଁ ପ୍ରଶାସନ ପକ୍ଷରୁ ଜମି ଅଧିଗ୍ରହଣ ପ୍ରକ୍ରିୟା ଶେଷ ହୋଇଥିବା ବେଳେ ଶିଳାନ୍ୟାସ ପରେ ପରିକ୍ରମା ଯୋଜନା କାର୍ଯ୍ୟ ଆରମ୍ଭ ହେବ।
