କଟକ ଅଫିସ,୩୦।୪: ଶୈଳବାଳା ମହିଳା ସ୍ବୟଂଶାସିତ ମହାବିଦ୍ୟାଳୟ ପ୍ରେକ୍ଷାଳୟରେ ଶୁକ୍ରବାର ‘ମୋ କଲେଜ’ ଅଭିଯାନ ପକ୍ଷରୁ ‘ଆଜିର ଯୁବ ସମାଜ ନିମନ୍ତେ ମାନସିକ ସ୍ବାସ୍ଥ୍ୟ’ ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ‘ମୋ କଲେଜ’ ଅଭିଯାନର ରାଜ୍ୟ ସଭାପତି ଆକାଶ ଦାସ ନାୟକ ଯୋଗଦେଇ କେବଳ ଶିକ୍ଷାନୁଷ୍ଠାନ ନୁହେଁ, ପ୍ରତ୍ୟେକ ଛାତ୍ରୀଛାତ୍ରଙ୍କ ସର୍ବାଙ୍ଗୀନ ଉନ୍ନତି ଏହି ଅଭିଯାନର ଲକ୍ଷ୍ୟ ଓ ଉଦ୍ଦେଶ୍ୟ ବୋଲି କହିଥିଲେ। ସମ୍ମାନିତ ଅତିଥି ଭାବେ ପ୍ରଫେସର ଡାକ୍ତର ଯଶୋବନ୍ତ ମହାପାତ୍ର ଯୋଗଦେଇ କହିଥିଲେ, ଶାରୀରିକ ସୁସ୍ଥତା ସହ ମାନସିକ ସୁସ୍ଥତା ଅତ୍ୟନ୍ତ ଜରୁରୀ। ତେଣୁ ମାନସିକ ରୋଗୀଙ୍କ ପ୍ରତି ଆମେ ସହାନୁଭୂତିଶୀଳ ଓ ଯତ୍ନଶୀଳ ହେବା ଉଚିତ। କିନ୍ତୁ ଅନେକ କ୍ଷେତ୍ରରେ ମାନସିକ ରୋଗୀଙ୍କ ନିମନ୍ତେ ଆମ ପରିବାର ବା ସମାଜ କେହି ସହାନୁଭୂତିଶୀଳ ସମ୍ବେଦନା ପ୍ରଦର୍ଶନ କରି ନ ଥାନ୍ତି ବୋଲି ସେ କହିଥିଲେ। ମହାବିଦ୍ୟାଳୟ ଅଧ୍ୟକ୍ଷା ପ୍ରଫେସର ଡ. ସୁରେଖା ସୁନ୍ଦରୀ ସ୍ବାଇଁ ଅଧ୍ୟକ୍ଷତା କରି ମୋ କଲେଜ ଅଭିଯାନ ମାଧ୍ୟମରେ କଲେଜର ବିଭିନ୍ନ ଉନ୍ନତି ହୋଇଛି ବୋଲି କହିଥିଲେ। ସେହିପରି ମନସ୍ତତ୍ତ୍ବ ବିଜ୍ଞାନ ବିଭାଗ ମୁଖ୍ୟ ଡ. ବିକାଶ କୁମାର ଦାସ ଭିତ୍ତିପ୍ରବନ୍ଧ ଉପସ୍ଥାପନ କରି ଛାତ୍ରୀଙ୍କ ନିମନ୍ତେ ଉକ୍ତ ଆଲୋଚନାଚକ୍ରର ପ୍ରାସଙ୍ଗିତା ସମ୍ପର୍କରେ ମତ ଦେଇଥିଲେ। ପୁରାତନ ଛାତ୍ରୀ ସଂସଦର ସଭାପତି ଗୋପା ଦାସ ‘ମୋ କଲେଜ ଅଭିଯାନ ଯୋଜନାର ଦିଗ୍ବଳୟ ବିଶାଳ ବୋଲି କହିଥିଲେ। ଏହି ଅବସରରେ ‘ମୋ କଲେଜ’ ଅଭିଯାନର ରାଜ୍ୟ ସଭାପତି ନାୟକ ବିଜ୍ଞାନ ବିଭାଗରେ ବଟାନିକାଲ ଗାର୍ଡେନ ଓ ଶିକ୍ଷା ବିଭାଗରେ ପୁସ୍ତକ ଗ୍ରହଣକାରୀ ପାଠାଗାର ଉଦ୍ଘାଟନ କରିବା ସହ କ୍ରୀଡ଼ା ପ୍ରାଙ୍ଗଣରେ ବ୍ୟାଡମିଣ୍ଟନ କୋର୍ଟ ଓ ଟେନିସ କୋର୍ଟର ଭିତ୍ତିପ୍ରସ୍ତର ସ୍ଥାପନ କରିଥିଲେ। ସେହିପରି ମହାବିଦ୍ୟାଳୟର ମୁଖପତ୍ର ‘ମଧୁଶ୍ରୀ’, ଉଦ୍ଭିଦ ବିଜ୍ଞାନ ବିଭାଗର ବାର୍ଷିକ ପାଠଚକ୍ର ପତ୍ରିକା ‘ବନସ୍ପତି’ ଓ କଲେଜର ‘ନ୍ୟୁଜ ବୁଲେଟିନ’ ଉନ୍ମୋଚନ କରାଯାଇଥିଲା। ମୋ କଲେଜ ଅଭିଯାନ ସଂଯୋଜିକା ଡ. ପ୍ରୀତିପ୍ରଜ୍ଞା ରାୟ ଅତିଥି ପରିଚୟ ଓ ଡ. ଦୀପ୍ତି ପଣ୍ଡା କାର୍ଯ୍ୟକ୍ରମ ପରିଚାଳନା କରିଥିଲେ। ପୁରାତନ ଛାତ୍ରୀ ସଂସଦର ବରିଷ୍ଠ ସଦସ୍ୟା ଡ. ଇନ୍ଦୁରେଖା ମହାପାତ୍ର ଧନ୍ୟବାଦ ଦେଇଥିଲେ।
