ଭଞ୍ଜନଗର,୧୫।୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ବ୍ରହ୍ମକୁମାରୀ ଇଶ୍ୱରୀୟ ବିଶ୍ଵବିଦ୍ୟାଳୟ ଶାଖା ପକ୍ଷରୁ ଗତ ୨ ତାରିଖରୁ ବାହାରିଥିବା ଶିବ ସନ୍ଦେଶ ଅଭିଯାନ ରଥ ପରିଭ୍ରମଣ କାର୍ଯ୍ୟକ୍ରମ ରବିବାର ରାତିରେ ଉଦଯାପିତ ହୋଇଯାଇଛି । ପରମାତ୍ମା ଶିବଙ୍କ ଦିବ୍ୟ ଅବତରଣ, ଦୈନନ୍ଦିନ ଜୀବନରେ ଆବଶ୍ୟକତା ହେଉଥିବା ମାନବୀୟ ମୂଲ୍ୟବୋଧ ସହ ଆଧ୍ୟାତ୍ମିକ ଜ୍ଞାନ ସଂପର୍କରେ ଜନ ସମାଜକୁ ସଚେତନତା କରାଇବା ନିମନ୍ତେ ବ୍ରହ୍ମକୁମାରୀ ସଂସ୍ଥା ତରଫରୁ ସାରା ବିଶ୍ୱର ବିଭିନ୍ନ ଦେଶର ବିଭିନ୍ନ ସ୍ଥାନରେ ଶିବ ରାତ୍ରି ଉପଲକ୍ଷେ ଶିବ ସନ୍ଦେଶ ଅଭିଯାନ ରଥ ପରିକ୍ରମା କରିଥିଲା।
ଭଞ୍ଜନଗର ଉପସେବା କେନ୍ଦ୍ରରୁ ଆୟୋଜିତ ଉଦଘାଟନୀ ଉତ୍ସବରେ ଘୁମୁସର ଉତ୍ତର ବନଖଣ୍ଡ ଅଧିକାରୀ ହିମାଂଶୁ ଶେଖର ମହାନ୍ତି ମୁଖ୍ୟ ଅତିଥି ଭାବେ ଯୋଗଦେଇ ଶିବ ସନ୍ଦେଶ ଅଭିଯାନ ରଥର ଉଦଘାଟନ କରିଥିଲେ । ବିଭିନ୍ନ ଦିବସରେ ରଥ ୬୦ରୁ ଉର୍ଦ୍ଧ ପାଠଶାଳା ପରିକ୍ରମା କରିବା ସହ ଜନ ସଚେତନତା ମୂଳକ ବାର୍ତ୍ତା ଦିଆଯାଇଥିଲା। ଗତ ୧୩ ତାରିଖରେ କଳସ ଯାତ୍ରା, ୧୪ ତାରିଖରେ ମୋଟର ବାଇକ୍ ରାଲି, ୧୫ରେ ଶାନ୍ତି ଶୋଭାଯାତ୍ରା ହୋଇଥିଲା ।
ଦୈନନ୍ଦିନ କାର୍ଯ୍ୟକ୍ରମକୁ କେନ୍ଦ୍ର ସଞ୍ଚାଳିକା ରାଜଯୋଗିନୀ ସନ୍ତୋଷିନୀ ଭଉଣୀ ସଂଯୋଜନା କରିଥିଲେ । ବିଭିନ୍ନ ଦିବସରେ ସହରର ବହୁ ବିଶିଷ୍ଟ ବ୍ୟକ୍ତି ସମେତ ସିଡ଼ିପିଓ ମିଲୀମା କୁମାରୀ ପଣ୍ଡା, ତହସିଲଦାର ଅଭିପସା ପଟ୍ଟନାୟକ, ଶିକ୍ଷକ ନେତା ଜଗବନ୍ଧୁ ଜେନା, ସନ୍ତୋଷ ଜେନା, ରୋଟାରୀ କ୍ଲବ ସଭାପତି ରଞ୍ଜିତ ବାରିକ, ଶୂଳପାଣି ଶତପଥୀ , ରଞ୍ଜିତ ଆରୁଖ ପ୍ରମୁଖ ଅତିଥି ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ ।
