ନୂଆଦିଲ୍ଲୀ,୯ା୧:ଏକଦା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଦଖଲରେ ଥିବା ସରକାରୀ ବଙ୍ଗଳା (ଭାଜପା ଭାଷାରେ ଶିଶ୍ମହଲ) ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲୋକ କଲ୍ୟାଣ ମାର୍ଗସ୍ଥିତ ସରକାରୀ ବାସଭବନ (ଆପ୍ ମତରେ ରାଜମହଲ)କୁ ନେଇ ବୁଧବାର ହାଇଡ୍ରାମା ଦେଖିବାକୁ ମିଳିଛି। ପ୍ରଧାନମନ୍ତ୍ରୀ ମୋଦିଙ୍କ ସମେତ ଭାଜପା ନେତାଙ୍କ ଅଭିଯୋଗ ହେଲା ପୂର୍ବରୁ ସରକାରୀ ସୁବିଧା ହାସଲ କରିବେ ନାହିଁ ବୋଲି ପଣ କରିଥିବା ଆପ୍ ରାଷ୍ଟ୍ରୀୟ ଆବାହକ କେଜ୍ରିଓ୍ବାଲ ବିଳାସପୂର୍ଣ୍ଣ ଜୀବନ ବିତାଇବା ପାଇଁ ମୁଖ୍ୟମନ୍ତ୍ରୀଙ୍କ ବାସଭବନକୁ ଦିଲ୍ଲୀବାସୀଙ୍କ ଟିକସ ଅର୍ଥରେ ଶିଶ୍ମହଲ ଭଳି ସଜାଇଥିଲେ। ଏହାର ତଦନ୍ତ କରି କେଜ୍ରିଓ୍ବାଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ। ଆପ୍ ନେତାମାନେ ଏହାର ପ୍ରତିବାଦରେ ତଥାକଥିତ ଶିଶ୍ମହଲକୁ ଯାଇ ପ୍ରକୃତ ସତ୍ୟ ଲୋକଲୋଚନକୁ ଆଣିବାକୁ ଉଦ୍ୟମ କରିଥିଲେ। କିନ୍ତୁ ଦିଲ୍ଲୀ ପୋଲିସ ସେମାନଙ୍କୁ ଭିତରକୁ ଯିବାକୁ ଦେଇ ନ ଥିଲା।
ପରେ ଆପ୍ କର୍ମୀମାନେ ପ୍ରଧାନମନ୍ତ୍ରୀଙ୍କ ବାସଭବନ ଅଭିମୁଖେ ଅଗ୍ରସର ହେଉଥିବାବେଳେ ପୋଲିସ ସେମାନଙ୍କୁ ପୁଣି ଅଟକାଇଥିଲା। ଫଳରେ ସେମାନେ ଧରାଣା ଦେଇଥିଲେ। ଏହା ପରେ ଦିଲ୍ଳୀ ଭାଜପା ଅଧ୍ୟକ୍ଷ ବୀରେନ୍ଦ୍ର ସଚଦେବାଙ୍କ ନେତୃତ୍ୱରେ ଦଳୀୟ କର୍ମୀମାନେ ମଥୁରା ରୋଡ୍ସ୍ଥିତ ମୁଖ୍ୟମନ୍ତ୍ରୀ ଆତିଶୀ ମାର୍ଲେନାଙ୍କ ଏବି-୧୭ ବାସଭବନକୁ ଯାଇଥିଲେ। ଆତିଶୀ ପୂର୍ବରୁ ଏକ ସରକାରୀ ବଙ୍ଗଳା ନିଜ ଦଖଲରେ ରଖିଥିବା ସତ୍ତ୍ୱେ ପୁଣି କ’ଣ ପାଇଁ ବଙ୍ଗଳା ମାଗୁଛନ୍ତି ବୋଲି ସେମାନେ ପ୍ରଶ୍ନ କରିଥିଲେ। ଇତିମଧ୍ୟରେ ଆପ୍ ନେତା ସଞ୍ଜୟ ସିଂ ଏବଂ ସୌରଭ ଭରଦ୍ୱାଜ ଉତ୍ତର ଦିଲ୍ଲୀ ସିଭିଲ୍ ଲାଇନ୍ସରେ ଭାଜପା ବିରୋଧରେ ବିକ୍ଷୋଭ କରି ଗଣମାଧ୍ୟମର ଦୃଷ୍ଟି ଆକର୍ଷଣ କରିଥିଲେ। ସେପଟେ ବିରୋଧୀ ଇଣ୍ଡିଆ ବ୍ଲକ୍ର ସମାଜବାଦୀ ପାର୍ଟି (ଏସ୍ପି) ଏବଂ ତୃଣମୂଳ କଂଗ୍ରେସ (ଟିଏମ୍ସି) କେଜ୍ରିଓ୍ବାଲଙ୍କ ଦଳକୁ ନିର୍ବାଚନରେ ସମର୍ଥନ ଘୋଷଣା କରିବା ପରେ କଂଗ୍ରେସ ଏକଘରିକିଆ ହୋଇଯାଇଛି।
